Mehman Muradlı: "Mən bunu, başlıca olaraq, son bir neçə il ərzində məhkəmə sistemində aparılan islahatlarla əlaqələndirirəm"
"Azərbaycana qarşı Avropa Məhkəməsi tərəfindən çıxarılan qərarların sayı digər ölkələrlə müqayisədə qat-qat azdır. Belə ki, 2016-cı ildə Azərbaycana qarşı çıxarılan qərarların sayı cəmi 16 təşkil edib. Halbuki, əhalisinin sayı Azərbaycanla təxminən eyni olan Bolqarıstana qarşı 33, Macarıstana qarşı 40, Yunanıstana qarşı isə 41 qərar çıxarılıb". Bunu ədliyyə naziri Fikrət Məmmədov AzərTAc-a müsahibəsində deyib.
Nazir bildirib ki, ümumiyyətlə, çıxarılan bütün qərarların təxminən yarısı yalnız 4 ölkəyə: Rusiya, Ukrayna, Türkiyə və Rumıniyaya qarşı olub: "Avropa Məhkəməsinə Azərbaycandan daxil olan şikayətlərin sayı isə ümumi Avropa göstəricisindən, demək olar ki, 2 dəfə azdır. Belə ki, Avropada 10 min əhaliyə orta hesabla 0.64 şikayət düşdüyü halda, bu göstərici Azərbaycan üzrə 0.34 təşkil edir. Ölkəmizlə müqayisədə digər dövlətlərdən, o cümlədən Avropa İttifaqının üzvlərindən olan Macarıstandan 16 dəfə, Rumıniyadan 12 dəfə, habelə Bosniya və Herseqovinadan 8 dəfə çox şikayət daxil olub. Amma bu bizdə heç də arxayınlıq yaratmır, Avropa Konvensiyasının və məhkəmə presedentlərinin öyrənilməsi və tətbiqi, habelə hüquq sistemimizin inkişafı naminə istifadəsi işi əzmlə davam etdirilir".
Azərbaycanın belə göstəriciyə imza atması nə ilə bağlıdır?
Hüquqşünas Mehman Muradlı qəzetimizə bildirdi ki, bunun bir neçə səbəbi var: "Əvvəla Avropa İnsan Haqları Məhkəməsinə edilən müraciətlərdə heç bir qəbahət görmürəm. Çünki biz Avropa Şurasına qəbul olunarkən üzərimizə götürdüyümüz vacib öhdəliklərdən biri də bununla əlaqəlidir. Həmin quruma üzv olan ölkələrin hər birinin vətəndaşları sözügedən məhkəməyə müraciət edə bilər. Azərbaycanda bunun proseduru belədir ki, bütün daxili məhkəmə instansiyaları bitdikdə hökmdən narazı qalan həmin məhkəməyə müraciət ünvanlaya bilər. Çox təəssüflər olsun ki, bəzi insanlar və vəkillər bunu bir biznesə çevirmək istəyir. Əsasən siyasi mənsubiyyəti olan insanları etdikləri hansısa cinayətə görə müdafiə edən müxalif vəkillər hüquqlarını qoruduğu şəxsə deyirlər ki, mütləq Avropa Məhkəməsinə müraciət edilməlidir. Maraq ancaq Azərbaycanın cərimələnməsi nəticəsində verilən kompensasiyanın mənimsənilməsidir. Avropa Məhkəməsinə edilən müraciətlərin statistikasına diqqət yetirsəniz görərsiniz ki, çoxu siyasi çalarların qatılmasına cəhd edilən işlərdir. Təəssüflə qeyd etməliyəm ki, əksər hallarda Avropa Məhkəməsi həmin müraciətləri təmin edir və Azərbaycanı cərimələyir. Belə hallar da bir neçə dəfə yaşanıb ki, vəkillər ordan alınan kompensasiyanı müdafiə etdiyi şəxsdən gizlin alıb xərcləyib. Bütün bunlara rəğmən, nazirin açıqladığı statistika ürəkaçandır. Mən bunu, başlıca olaraq, son bir neçə il ərzində məhkəmə sistemində aparılan islahatlarla əlaqələndirirəm".
Məhəmmədəli QƏRİBLİ
