Məhərrəm Zülfüqarlı: "Fikrimcə, bu, Azərbaycanın son uğurlarından ən böyüyüdür"
"Bakıda keçirilmiş Oyunlar sayca üçüncü İslam Həmrəyliyi Oyunlarıdır. Birinci Oyunlar Səudiyyə Ərəbistanında, ikinci İndoneziyada, üçüncü isə Azərbaycanda keçirilib. Səudiyyə Ərəbistanı müsəlman aləminin mərkəzidir, İndoneziya müsəlman aləmində əhali baxımından ən böyük ölkədir. Müsəlman aləminin bu iki aparıcı ölkəsindən sonra üçüncü Oyunların, - halbuki, bu Oyunların adı dördüncüdür, amma biz bilirik ki, cəmi üçüncü dəfə keçirilib, - Azərbaycanda keçirilməsi, əlbəttə, bizə olan böyük hörmətin və inamın təzahürüdür".
Bunu Prezident İlham Əliyev IV İslam Həmrəyliyi Oyunlarında qalib gəlmiş idmançılarımız, onların məşqçiləri və Azərbaycanın idman ictimaiyyətinin nümayəndələri ilə görüşdə bildirib.
Dövlət başçısı onu da xüsusi olaraq vurğulayıb ki, bu Oyunlar, eyni zamanda, islam həmrəyliyini gücləndirəcək: "Mən Oyunlar ərəfəsində demişdim, bizim əsas məqsədimiz ondan ibarətdir ki, müsəlman ölkələrini təmsil edən idmançılar, qonaqlar Bakıda bir yerdə olsunlar, bir-birilə tanış olsunlar, bir-birinin əlini sıxsınlar və dostluq, əməkdaşlıq güclənsin. Belə də oldu. Biz bunu yarışlarda gördük ki, bəzi hallarda siyasi cəhətdən bir-birilə o qədər də yaxın münasibətləri olmayan ölkələrin nümayəndələri bir-birini təbrik edir, bir-birinin uğuruna sevinir, bir-birinin əlini sıxırlar".
Bu faktor Azərbaycanın İslam ölkələri arasında olan nüfuzundan və təşkilatçılığın yüksək səviyyədə qurulmasından irəli gəlir. Bunun nəticəsidir ki, Oyunlar zamanı islam həmrəyliyi gücləndi.
Məsələyə münasibət bildirən tarix elmləri üzrə fəlsəfə doktoru Məhərrəm Zülfüqarlının sözlərinə görə, Oyunların islam həmrəyliyinə müsbət təsir göstərməsi bir reallıqdır: "İslam birliyinə çalışan bir dövlət kimi ölkəmizdə keçirilən yarışlar Azərbaycan dövlətçiliyi tarixində böyük rol oynayır. Nəzərə almaq lazımdır ki, İslam dünyasında parçalanma var. Bunu hamı bilir. Məsələn, Ərəb dünyasında İsrailə münasibət birmənalı deyil. Həmin dövlətlərin bir hissəsi İsraillə əməkdaşlıq edir, digərləri fərqli mövqedən çıxış edir. Suriya, Livan bu ölkə ilə düşmən münasibətdədir. Başqa bir tərəfdən, İranla Səudiyyə Ərəbistanı arasında indiki dövrdə münasibətlər çox gərgindir. Bu baxımdan sözügedən dövlətlərin idmançılarının burada bir araya gəlməsi, bir-birini təbrik etməsi yaxşı haldır. Bu amil İslam dünyasında münasibətlərin normallaşmasına kömək edə bilər. Fikrimcə, bu, Azərbaycanın son uğurlarından ən böyüyüdür. O üzdən biz çalışmalıyıq ki, bu cür tədbirləri çox keçirək, Azərbaycanın sülhsevər, əməkdaşlığa hazır dövlət imicini daha da gücləndirək".
Vidadi ORDAHALLI
