Ənvər Fərəcov: "Hər dəfə keçirilən tədbirlər daha möhtəşəm səviyyədə təşkil olunur"
"Biz İslam Həmrəyliyi Oyunlarında da yeni yanaşmanı ortaya qoyduq, yeni standartlar tətbiq etdik. Əlbəttə ki, bu, bizim qonaqlara olan hörmətimizin əlamətidir, məsuliyyətin təzahürüdür. Eyni zamanda, bu, ümumiyyətlə, bizim siyasətimizi göstərir". Bunu Prezident İlham Əliyev IV İslam Həmrəyliyi Oyunlarında qalib gəlmiş idmançılarımız, onların məşqçiləri və Azərbaycanın idman ictimaiyyətinin nümayəndələri ilə görüşdə bildirib.
Dövlət başçısı vurğulayıb ki, Bakı bu gün dünyanın ən gözəl şəhərlərindən biridir. Azərbaycana gələn turistlərin sayı milyonlarla ölçülür. Bu Oyunlardan sonra ölkəmizə daha çox turist axını olacaq: "Azərbaycan xalqı öz milli-mənəvi dəyərlərinə sadiq qaldığını və bu dəyərləri qoruduğunu, islamın sülh, mədəniyyət dini olduğunu göstərib. Azərbaycanın zəngin mədəniyyəti və tarixini bütün dünyaya nümayiş etdirib. Bağlanış mərasimində isə Azərbaycan dünyaya mütərəqqi və müasir ölkə kimi təqdim olundu. Bu iki amil müasir Azərbaycan dövlətini təcəssüm etdirir. Biz görürdük ki, idmançılar necə sevinirlər, xalqımız necə sevinir. 10 gün ərzində bir daha gördük ki, xalqımız, cəmiyyətimiz birdir. Bizi əqidəmiz, tariximiz, baxışlarımız birləşdirir".
Oyunlar zamanı Azərbaycan tarixini, zəngin mədəniyyətini bütün dünyaya nümayiş etdirdi. İslamiadanın Azərbaycanın İslam dünyasında daha da tanıdılması baxımından əhəmiyyəti böyükdür. İslam dünyası bir daha Azərbaycanın sülhsevər, tolerant ölkə olduğunu gördü.
Məsələyə münasibət bildirən ekspert Ənvər Fərəcovun sözlərinə görə, bu kimi tədbirlər ölkənin təbliğində mühüm rol oynayır: "Bu nəinki bizdə, bütün dünyada belədir. Çünki keçirilən tədbirin miqyasının geniş olması və dünyanın əksər ölkələri tərəfindən izlənməsi buna şərait yaradır. Nəticədə milyonlarla insan həmin ölkənin tarixi, mədəniyyəti və digər xüsusiyyətləri ilə tanış olur. Elə ölkə var ki, ümumiyyətlə belə oyunların timsalında dünyada tanınır. Düzdür, həmin ölkələrdən fərqli olaraq, Azərbaycan dünyada yetərincə tanınıb. Müstəqillikdən üzü bəri aparılan məqsədyönlü siyasət öz səmərəsini verir. Ancaq Bakıda keçirilən IV İslam Həmrəyliyi Oyunları bu yöndə yeni imkanlar yaratdı. Nəticədə İslam ölkələri Azərbaycanın tarixi, mədəniyyəti, məişəti ilə daha yaxından tanış oldular. Bir məqamı unutmaq olmaz ki, Azərbaycanın indiyə qədər bir sıra beynəlxalq tədbirlərə ev sahibliyi etməsi bu sahədə təcrübəsini daha da artırıb. Ona görə də hər dəfə keçirilən tədbirlər daha möhtəşəm səviyyədə təşkil olunur".
Vidadi ORDAHALLI
