Rumıniyanın paytaxtı Buxarest şəhərində Avropa Jurnalistlər Federasiyasının (AFJ) illik toplantısı keçirilib. 18-19 may tarixlərində keçirilən və 30 ölkədən EFJ-yə üzv təşkilatların qatıldığı toplantıda Azərbaycandan AFJ-nin yerli üzv təşkilatı olan Jurnalistlərin Həmkarlar İttifaqı iştirak edib.
JuHİ sədri Müşfiq Ələsgərli bildirib ki, toplantıda öncə AFJ-nin təşkilati məsələləri müzakirə edilib - AFJ strukturlarının (prezident Moqan Bliçerin və ayrı-ayrı departamentlərin) hesabatları dinlənərək qəbul edilib.
Daha sonra Avropa qitəsində medianın durumu müzakirəyə çıxarılıb. Müzakirələr bölümündə öncə ATƏT-in media ofisinin təmsilçisi Patrik Penninksin və Avropa Şurasının İnformasiya ofisindən Merilin Clarkın məruzələri dinlənib. Hər iki məruzəçi dünyada, o cümlədən Avropada media azadlığı kontekstində neqativ tendensiyaların çoxalmasından narahatlıqlarını qeyd edib: "Xüsusilə Şərqi Avropa məkanında durum pisləşməkdə davam edir. Əksər ölkələrdə ictimai yayım qanunları pisə doğru dəyişdirilir. Həmçinin media, əmək, təhlükəsizlik sahəsində qəbul edilən qanunvericiliklərə media azadlığının məhdudlaşdırılmasına yönələn maddələr daxil edilir".
Polşada ictimai yayım haqqında qanuna antidemokratik maddələrin əlavə edilməsinin ardınca Macarıstanda da analoji proseslər gedib və bu tendensiya güclənməkdə, digər ölkələrə yayılmaqda davam edir. Toplantıda ictimai yayım haqqında qanunlara neqativ dəyişikliklərin durdurulması çağırışı edilib.
AFJ prezidenti Moqan Bliçer isə çıxışında xüsusi vurğulayıb ki, son illərdə "əmək qanunlarına və media yayımını tənzimləyən qanunlara edilən dəyişikliklər KİV qurumları sahiblərinə jurnalist kollektivləri üzərində daha artıq səlahiyyətlər verir ki, bu da jurnalistləri, peşə standartlarından daha çox, sahibkarların istəklərinə uyğun davranışa sövq edir". O, Avropa məkanında "kollektiv sövdələşmələr" mövzusuna yenidən qayıdışın, jurnalist hüquqları mövzusunun aktuallaşdırılmasının zəruri olduğunu önə çəkib.
Məruzələrdə vurğulanıb ki, xüsusi olaraq Balkan ölkələrində media və əmək qanunvericiliyinə edilən neqativ dəyişikliklər medianın maliyyə sıxıntılarının artması, jurnalistlərin sosial durumunun pisləşməsi kimi proseslərə yol açıb, bu tendensiya getdikcə genişlənir və digər ölkələrə də yayılır. Məruzələrdə media və əmək qanunvericiliyinə edilən neqativ dəyişikliklərin aradan qaldırılmasına çağırış ifadə edilib.
Məruzələrdə internetin inkişafı ilə əlaqədar olaraq ortaya çıxan problemlər də qeyd edilib: "İnternetin sürətli inkişafı müəllif hüquqlarının qorunmasını çətinləşdirir, xəbər istehsalı zamanı etik standartın qorunması sahəsində problemləri artırır. Bu problemlərin qarşısını almaq üçün qəbul edilən qanunlar isə bəzən əlavə problemərə, ifadə azadlığının məhdudlaşdırılmasına yol açır. AFJ və İFJ mövzu üzrə müvafiq təşəbbüslər hazırlamaq üçün internet tənzimlənməsi və müəllif hüquqlarını araşdıran komissiyaların fəaliyyətinin gücləndirilməsinə qərar verib".
Toplantının gedişində ciddi müzakirə edilən mövzulardan biri də jurnalist təhlükəsizliyi olub. Həbslər, təqiblər, ölüm halları ilə yanaşı, münaqişə bölgələrində jurnalist fəaliyyətinin çətinləşməsi xüsusi qeyd edilib. Jurnalist təhlükəsizliyi mövzusunun aktual saxlanması, problemin qarşısının alınması üçün yeni təşəbbüslər hazırlanmasına qərar verilib.
Çıxışlarda qeyd edilib ki, Avropa qitəsində media sahəsində önə çıxan problemlər və yeni çağırışlar sonradan örnək olaraq çox sürətlə digər ərazilərə də yayılır və qloballaşır. Bu baxımdan qitə ərazisində meydana çıxan problemlər operativ şəkildə həll edilməlidir ki, sonradan kütləviləşməsin.
JuHİ sədri Müşfiq Ələsgərli toplantı çərçivəsində müzakirələrə qatılmaqla yanaşı, bir sıra ölkələrin jurnalist təşkilatlarının təmsilçiləri ilə ikitərəfli görüşlər keçirib, ölkələrimizin media qurumları arasında əməkdaşlıq qurulması üçün razılıq əldə edilib.
Məlumatı JuHİ mətbuat xidməti yayıb.
Baki-xeber.com
