Yeganə Hacıyeva: "Həmin qrupların belə bir müddəanın yer almasına etirazı..."
Avropa Parlamentinin Xarici Əlaqələr Komitəsinin sədri David MakAllisterin rəhbərlik etdiyi nümayəndə heyəti mayın 22-dən 25-dək Azərbaycan, Gürcüstan və Ermənistanda səfərdə olacaq.
Səfər zamanı ölkə prezidentləri, parlament sədrləri, hakim və müxalifət partiyalarının üzvləri, vətəndaş cəmiyyətinin nümayəndələri ilə görüşlər keçiriləcək.
"Avropa Parlamentinin 8 üzvü son əldə edilən yeni Avropa Birliyi (AB)-Ermənistan sazişinin hazırkı mərhələdə nəticələrini, AB-Azərbaycan yeni razılaşması istiqamətində əldə olunan tərəqqi və AB-Gürcüstan münasibətlərinin möhkəmləndirilməsi ilə bağlı olan məsələləri ümumiləşdirəcək",- deyə Avropa Birliyinin bəyanatında bildirilib.
Bəyanatda daha sonra qeyd edilib: "Hazırda Avropa Birliyi Ermənistan və Azərbaycanla əlaqələrin formalaşdırılmasını yeni razılaşmalar vasitəsilə nəzərdən keçirir. Ermənistanla danışıqlar son zamanlarda yekunlaşdırılıb, Azərbaycanla isə bütövlükdə danışıqlar başlayıb. Deputatların səfəri qeyd olunan razılaşmalarla bağlı hesabat və təsdiqləmələrin inkişaf prosesinə fayda verəcək ki, Avropa Parlamenti tərəfindən ən geci bu il təqdim ediləcək".
Azərbaycan Prezidenti İlham Əliyev mayın 22-də Avropa Parlamentinin Xarici Əlaqələr Komitəsinin yeni sədri Devid MakAllisterin başçılıq etdiyi nümayəndə heyətini qəbul edib.
Məlum olduğu kimi, Azərbaycan Avropa Birliyilə münasibətlərin yaxşılaşdırılmasına böyük önəm verir. Azərbaycanın irəli sürdüyü şərtlərdən biri də budur ki, imzalanacaq sazişdə işğal edilmiş torpaqlarla da bağlı müddəa öz əksini tapsın. Belə bir müddəanın gələcəkdə imzalanacaq sazişdə yer alması nə dərəcədə mümkündür?
Avropa Parlamenti ilə sıx təmaslarda olan politoloq Yeganə Hacıyeva qəzetimizə açıqlamasında bildirdi ki, əvvəlcə Avropa İttifaqı ilə Azərbaycanın münasibətlərini nəzərdən keçirmək lazımdır: "Azərbaycan-Avropa Birliyi münasibətləri tərəflər üçün strateji əhəmiyyət daşıyır və beş əsas istiqamət - qanunvericilik, nəqliyyat, struktur dəyişikliyi, enerji və mübadilə və s. proqramlar üzrə inkişaf edir. 2009-cu ildən viza və readmissiya haqqında sazişlər imzalanıb, hazırda isə bərabər tərəfdaşlıq və qarşılıqlı faydalılıq prinsiplərinə əsaslanan strateji tərəfdaşlıq sazişinin imzalanması nəzərdə tutulur.
Aİ Azərbaycanın müstəqilliyini və ərazi bütövlüyünü dəstəkləyir və Dağlıq Qarabağ münaqişəsinin sülh yolu ilə və Azərbaycanın ərazi bütövlüyü təmin edilməklə həll olunmasına tərəfdardır. Münaqişənin həlli istiqamətində Minsk Qrupunun səylərini dəstəkləyir.
Həmçinin, Avropa Birliyi münaqişənin sülh yolu ilə həlli istiqamətində mövcud status-kvonun saxlanmasının doğru olmadığını qəbul edir.
Avropa Parlamenti isə Avropa Birliyinin siyasətinin həyata keçirilməsi üçün fəaliyyət göstərən bir siyasi qurum kimi Azərbaycanla əməkdaşlığa can atır və bunda maraqlıdır. AP ilə Azərbaycan arasında imzalanacaq istənilən sazişdə işğal olunmuş torpaqlarımıza aid müddəanın olması mütləqdir. Əlbəttə, etiraf etmək lazımdır ki, müxtəlif ölkələrin siyasi qruplarından formalaşan bir təşkilatda, müxtəlif lobbi qruplarının təsiri altında fərdlərin ölkəmizə qarşı fəaliyyəti mövcuddur və biz zaman-zaman bunun şahidi oluruq. Həmin qrupların belə bir müddəanın yer almasına etirazı mütləq mənada olacaq. Ancaq mənfi səylərin qarşısının alınması istiqamətində də səylərimizi artırmalıyıq".
Məhəmmədəli QƏRİBLİ
