Zahid Oruc: "İlham Əliyevin ən böyük missiyası bu xalqa əvvəlcə idman cəbhəsində uğurlar qazandırıb onu gələcəyə inandırmaqdır"
Günel Fərhadqızı: "Bu həm də həmin ölkələrin investorlarının Azərbaycana gəlməsi, eləcə də gələcəkdə ölkəmizə daha çox sayda turistin cəlb olunması deməkdir"
Ceyhun Məmmədov: "Azərbaycanın belə bir yarışda qalib olması idmanımızın tanıdılması baxımından olduqca əhəmiyyətlidir"
Azərbaycanın ev sahibliyi etdiyi mühüm tədbirlərdən biri də yekunlaşdı. Mayın 22-də İslam Oyunlarının bağlanış mərasimi keçirildi. Mayın 12-də başlayan yarışlara Bakı Olimpiya Stadionunda keçirilən bağlanış mərasimi ilə son verilib. Bu yarışın Azərbaycan üçün nə kimi siyasi-iqtisadi və idman nəticəsi və əhəmiyyəti oldu?
Oyunların siyasi əhəmiyyətindən danışan millət vəkili Zahid Orucun sözlərinə görə, İslamiadanın Bakıda keçirilməsi Azərbaycan üçün yalnız idman hadisəsi deyil, həm də idman arenalarından böyük hərbi-siyasi meydanlara çıxmaq üçün vasitədir: "Bu gün Azərbaycanda beynəlxalq idman turniri keçirilir, sabah qlobal mədəniyyət tədbiri, daha sonra böyük iqtisadi-biznes forumlar ola bilər. Amma süjet xətti, məqsəd, seçilən hədəf dəyişmir. Doğrudur, 2015-ci ildəki Avropa Oyunlarından fərqli olaraq, İslam Həmrəyliyi Oyunları nisbətən başqa prinsiplər əsasında təşkil olunub. Yəni burada əhalisinin əksəriyyətini müsəlmanlar təşkil edən ölkələr toplaşıb. Təəssüf ki, müsəlman dünyasının bir sıra regionlarında ağır münaqişələr var, silahlı qarşıdurma gedir. Prezident İlham Əliyevin ən böyük missiyası bu xalqa əvvəlcə idman cəbhəsində uğurlar qazandırıb onu gələcəyə inandırmaqdır. Etiraf edək ki, birinci Qarabağ savaşında uduzmuşuq. Qarşı tərəfdə bizə qarşı kimin vuruşması, hadisələrin necə inkişaf etməsi tamam ayrı bir söhbətin mövzusudur. Reallıq ondan ibarətdir ki, ərazilərimiz işğal altındadır. Bu millət mədəni, mənəvi, iqtisadi, diplomatik və informativ cəbhədə uğur qazanmalıdır ki, onların hamısı toplanıb bizim bu təcavüzdən, məğlub durumdan çıxmağımızda rol oynasın. Tarixdə də belə nümunələr olub. Fikrimcə, Prezident İlham Əliyevin yürütdüyü bu siyasət II Dünya Müharibəsindən sonra Konrad Adenauerin Almaniyadakı fəaliyyəti ilə xeyli oxşardır".
Tədbirin iqtisadi əhəmiyyətilə bağlı fikir bildirən iqtisadçı Günel Fərhadqızı hesab edir ki, IV İslam Həmrəyliyi Oyunları çox əhəmiyyətli tədbirdir və onun Bakıda keçirilməsi Azərbaycan üçün müsbət nəticələr verəcək: "Çünki, əslində, belə tədbirlər birbaşa idmanla bağlı olsa da, dolayısı ilə həm də iqtisadi əhəmiyyət kəsb edir.
Bu həm də həmin ölkələrin investorlarının Azərbaycana gəlməsi, eləcə də gələcəkdə ölkəmizə daha çox sayda turistin cəlb olunması, Azərbaycan həqiqətlərinin bilinməsi deməkdir. Oyunlar, ən azından, iştirakçı ölkələrdə kütləvi informasiya vasitələrində işıqlandırılır, əhalisi tərəfindən izlənir. Eyni zamanda, ölkəmiz translyasiyadan, turist və idmançıların ölkəmizdə xərclədiyi puldan da xeyir götürür".
İdman mütəxəssisi Ceyhun Məmmədov isə ev sahibliyi etdiyimiz yarışların idman əhəmiyyətinin də az olmadığını bildirdi: "Bu Oyunlar həm idman ictimaiyyətinə, həm Azərbaycanda idmanın, həm də müsəlman ölkələri ilə münasibətlərin inkişafına töhfə verəcək. Qeyd edək ki, IV İslam Həmrəyliyi Oyunları Bakıda mayın 12-dən 22-dək keçirilib. Lakin Oyunların təqviminə görə, bəzi idman yarışlarına mayın 8-dən başlanıb. İslam Həmrəyliyi Oyunları 2005-ci ildən bəri keçirilir. Burada İslam Əməkdaşlıq Təşkilatına üzv olan ölkələrdən idmançılar iştirak edir. Dörd ildən bir keçirilən bu Oyunlar ilk dəfə Səudiyyə Ərəbistanında - Məkkə, Mədinə və Ciddə şəhərlərində təşkil olunub. IV İslam Həmrəyliyi Oyunlarının Azərbaycanda keçirilməsi haqqında qərar İslam Həmrəyliyi İdman Federasiyasının 2013-cü il iyulun 24-də Səudiyyə Ərəbistanının Ciddə şəhərində keçirilən toplantısında verilib. Yəni idman ictimaiyyəti bu yarışlara böyük maraq göstərməyə başlayıb. Azərbaycanın belə bir yarışda qalib olması idmanımızın tanıdılması baxımından olduqca əhəmiyyətlidir. Bu həm də idmançılarımızın peşəkarlığının artırılması və mühüm bir idman ölkəsi kimi dünyaya tanıdılmağımız baxımından çox vacibdir".
Məhəmmədəli QƏRİBLİ
