Mayın 2-də Parisdə Azərbaycanın Dostları Assosiasiyası və Paris Azərbaycan Evinin təşkilatçılığı ilə "Azərbaycana səyahət" adlı foto-sərginin vernisajı keçirilib. Sərgi Şərq və Türkdilli dövlətlərin arasında ilk respublika olan Azərbaycan Demokratik Respublikasının 99-cu müstəqillik ildönümü münasibətilə təşkil olunub. Vernisajı Azərbaycanın Dostları Assosiasiyasının baş katibi, Paris Azerbaycan Evinin sedri Mirvari Fətəliyeva açaraq, qonaqlara sərginin məqsədi barədə məlumat verib, fotoların müəlliflərini təqdim edib.
Daha sonra vernisajda iştirak edən Azərbaycanın Fransadakı səfiri Elçin Əmirbəyov çıxış edərək Azərbaycan Demokratik Respublikasının yaranışı və tarixi barədə danışaraq, bu günün ölkə tarixindəki çox mühüm bir gün olduğunu qeyd edib.
Azərbaycanın Dostları Assosiasiyasının prezidenti Jan Fransua Mansel öz növbəsində Azərbaycan Fransa dostluq əlaqələrinin getdikcə daha da genişləndiyini və Azərbaycanın məhz bu kimi tədbirlər sayəsində Fransada daha da tanındığını bildirib.
Sərgidə Azərbaycan fotoqrafları Vuqar Ibadov, Etibar Cəfərov və Kərim Abbasovun fotoları təqdim olunub. Azərbaycanın rəngarəng təbiətini, zəngin memarlıq abidələrini əks etdirən fotolar seyrçilər tərəfindən geniş rəğbətlə qarşılanıb.
Tədbirdə Fransa Parlament və Senat üzvləri, fransız jurnalistləri, şirkət rəhbərləri və diaspora nümayəndələri iştirak edib.
Sərgi mayın 31-nə kimi davam edəcək.
Baki-xeber.com
