Üzeyir Cəfərov: "Bu, eyni zamanda, icra strukturları və güc nazirliklərinin üzərinə əlavə öhdəliklər qoymuş olur"
Prezident İlham Əliyev "Cəbhəboyu zonada yerləşən yaşayış məntəqələrində gücləndirilmiş təhlükəsizlik rejiminin təmin edilməsi Qaydaları"nın təsdiq edilməsi haqqında Fərman imzalayıb. Fərmanda deyilir: "Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, cəbhəboyu zonada yerləşən yaşayış məntəqələrində təhlükəsizlik tədbirlərini gücləndirmək məqsədilə qərara alıram:
1. "Cəbhəboyu zonada yerləşən yaşayış məntəqələrində gücləndirilmiş təhlükəsizlik rejiminin təmin edilməsi Qaydaları" təsdiq edilsin.
2. Azərbaycan Respublikasının Nazirlər Kabineti bu fərmandan irəli gələn məsələləri həll etsin".
İmzalanan fərmanı mövcud reallıqlar baxımından nə dərəcədə əsaslı saymaq olar?
Hərbi ekspert Üzeyir Cəfərov qəzetimizə açıqlamasında bildirdi ki, imzalanan fərman olduqca vacibdir: "Regionda baş verən hadisələrin fonunda belə bir fərmanın imzalanmasına böyük ehtiyac vardı. Bu, eyni zamanda, icra strukturları və güc nazirliklərinin üzərinə əlavə öhdəliklər qoymuş olur. Onların məsuliyyətini bir qədər artırır. Təbii ki, düşmən tərəfin ayıq düşməməsi üçün biz bunun detallarını tam açıqlamırıq. Çünki qabaqlayıcı tədbirlərə əl ata bilərlər. Düşmən hər zaman cəbhəyə yaxın ərazilərdə təxribat törətməkdə, əhalini vahiməyə salmaqda maraqlı olur. İmzalanan fərmanda həmin hallarla mübarizə aparılması ilə bağlı ciddi müddəalar mövcuddur. Bundan sonra cəbhəyə yaxın rayon və şəhərlərimizin təhlükəsizliyinin təmin olunması işinə Müdafiə Nazirliyi ilə yanaşı, digər qurumlar da cavabdehlik daşıyacaq. Hesab edirəm ki, cəbhəyə yaxın ərazidə baş verən son proseslərin də belə bir fərmanın imzalanmasında böyük rolu olub. Bunu yalnız müsbət və vaxtında verilən fərman kimi dəyərləndirə bilərik. Hesab edirəm ki, fərmandan irəli gələn tələblərin yerinə yetirilməsi işinə əlaqədar qurumlar da olduqca diqqətli yanaşacaq".
Məhəmmədəli QƏRİBLİ
