Əli Orucov: "Onlar öz qanı, canı bahasına tarix yazıb"
Məlum olduğu kimi, Prezident İlham Əliyev "20 Yanvar şəhidi" fəxri adının verilməsi haqqında Sərəncam imzalayıb.
Sərəncama əsasən, Azərbaycan Respublikası Prezidentinin 1998-ci il 29 dekabr tarixli, 51 nömrəli Fərmanı ilə təsdiq edilmiş "20 Yanvar şəhidi" fəxri adı haqqında Əsasnamə"yə uyğun olaraq, 1990-cı il 20 Yanvar hadisələri nəticəsində aldıqları xəsarətlərdən vəfat etmiş aşağıdakı şəxslərə "20 Yanvar şəhidi" fəxri adı verilib:
Adilov Musa Ramazan oğlu,
Məmmədova Rəna Təyyar qızı.
Azərbaycan Respublikasının Əmək və Əhalinin Sosial Müdafiəsi Nazirliyinə bu sərəncamdan irəli gələn məsələləri həll etmək tapşırılıb.
20 Yanvar Azərbaycan tarixində qanla yazılmış bir səhifədir, ancaq təkcə faciə deyil. Bu tarix Azərbaycanın istiqlal yolunun ilk zirvəsi, milli azadlıq istəyinin oyanış günüdür. 1990-cı ilin 20 Yanvar günü uzun illər sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir.
1990-cı il yanvarın 19-dan 20-nə keçən gecə Bakıda sovet ordusu tərəfindən dinc əhaliyə qarşı dəhşətli, kütləvi qırğın hadisəsi törədildi. Bu qanlı hadisənin törədilməsində əsas məqsədlərdən biri azadlıq uğrunda gedən mübarizəni boğmaq idi. Eyni zamanda, Azərbaycan xalqının iradəsini qırmaq, insanların müstəqillik arzularını məhv etmək idi. Sovet imperiyası günahsız insanların qanını axıtsa da, xalqımıza qarşı misli görünməmiş qəddarlıq etsə də, istəyinə nail ola bilmədi.
20 Yanvar hadisələri zamanı 131 nəfər qətlə yetirildi, 744 nəfər ağır xəsarət aldı, 4 nəfər itkin düşdü, 400 nəfər isə həbs edildi.
Azərbaycanda 20 Yanvar hadisələri zamanı həlak olan şəxslərin ailə üzvlərinə, yaralananlara dövlət qayğı göstərir. Bu baxımdan daha iki nəfərə "20 Yanvar şəhidi" fəxri adının verilməsi cəmiyyətdə vətənpərvərlik tərbiyəsinin inkişafında nə kimi rol oynayacaq? Məsələyə münasibət bildirən AMİP Siyasi Şurasının üzvü Əli Orucovun sözlərinə görə, 20 Yanvar Azərbaycanın qanla yazılan bir tarixidir: "Özü də azadlıq, müstəqillik yolunda aparılan mübarizədə şanlı bir səhifədir. O zaman minlərlə soydaşımız imperiyanın sərt idarəçiliyindən çəkinməyərək öz sözünü deyib. Onlar öz qanı, canı bahasına tarix yazıb. Əlbəttə, biz bu tarixi yaşatmalıyıq. İllər, əsrlər keçsə də, 20 Yanvar unudulmamalı və yaşananların tarixi gənc nəslə aşılanmalıdır. Yeni nəsil bilməlidir ki, azadlıq uğrunda mübarizə itkisiz keçmir. O üzdən, bu kontekstdən çıxış edərək gəncləri vətənpərvər ruhda böyütməliyik. Onlara bunu əhatəli, sistemli şəkildə aşılamalıyıq. Bu baxımdan hesab edirəm ki, sözügedən qərar vətənpərvərlik hisslərinin aşılanmasında müəyyən rol oynaya bilər. Hesab edirəm ki, bu kimi məsələlər hər zaman diqqət mərkəzində olmalıdır".
Vidadi ORDAHALLI
