Rauf Zeyni: "Bu yubiley münasibətilə ölkəmizdə bir sıra mühüm tədbirlərin keçirilməsi planlaşdırılır"
Prezident İlham Əliyevin 18 iyun 2007-ci il tarixli Sərəncamı ilə iyunun 18-i ölkədə İnsan Hüquqları Günü kimi qeyd olunur və bu il həmin sərəncamın imzalanmasının 10 ili tamam olur.
Ombudsman Aparatının mətbuat xidmətindən verilən məlumata görə, bu əlamətdar tarixlə əlaqədar olaraq, ötən dövrdəki fəaliyyəti bir daha nəzərdən keçirmək, əldə edilən nailiyyətləri, habelə qarşıda duran məsələləri müəyyənləşdirmək məqsədilə, hər il olduğu kimi, bu il də insan hüquqları üzrə müvəkkil Elmira Süleymanovanın təşəbbüsü ilə mayın 18-dən iyunun 18-dək respublikamızda "İnsan hüquqları aylığı" elan olunub. Bununla bağlı ombudsman dövlət orqanlarına, şəhər və rayon icra hakimiyyətlərinə, Milli QHT Forumuna məktubla müraciət edib.
Qeyd olunub ki, hər il keçirilən bu aylıq çərçivəsində dövlət qurumları, QHT və KİV, icmalar və beynəlxalq təşkilatlar tərəfindən insan hüquqları sahəsində səmərəli əməkdaşlığın davamı olaraq, ölkə Prezidentinin 27 dekabr 2011-ci il tarixli Sərəncamı ilə təsdiq olunmuş "Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı"nın icraatda olan bəndləri əsasında respublikanın bütün şəhər və rayonlarında insan hüquqları ilə bağlı silsilə tədbirlər və müzakirələr təşkil edilir.
Bu 10 illik müddətdə Azərbaycanda insan haqlarının vəziyyətini necə dəyərləndirmək olar?
Milli QHT Forumunun prezidenti Rauf Zeyni qəzetimizə açıqlamasında bildirdi ki, bu 10 il ərzində ölkəmizdə görülən işləri çox müsbət dəyərləndirə bilərik: "Bu sahədə Milli Fəaliyyət Proqramının reallaşdırılmasını, qanunvericilik bazasının insan hüquq və azadlıqlarının tam təmin olunması istiqamətinə köklənməsini görülən uğurlu işlər sırasına aid edə bilərik. Eləcə də beynəlxalq qurumlarla bu sahədə ciddi əməkdaşlığın qurulmasını göstərə bilərik. Dövlət qurumlarının da bu istiqamətdə lazımi fəaliyyət göstərməsi və vətəndaş cəmiyyəti institutları ilə sıx koordinasiyada işləməsini müsbət işlər sırasına aid edə bilərik. Həmçinin milli donor təşkilatının dövlətin maliyyə dəstəyi ilə bu qəbildən olan işlərə ciddi dəstək verməsini də müsbət dəyərləndirə bilərik. Ümumən 10 illik müddəti müsbət və qənaətbəxş saya bilərik. Bu yubiley münasibətilə ölkəmizdə bir sıra mühüm tədbirlərin keçirilməsi planlaşdırılır".
Məhəmmədəli QƏRİBLİ
