"Zərdabi Mətbuat Mərkəzi" İctimai Birliyinin Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə gerçəkləşdirdiyi "İlk mənbədən informasiya alınmasının təşviqi ilə "Açıq hökumət" quruculuğuna dəstək" layihəsi çərçivəsindəki ikinci toplantı mayın 11-də Salyan rayonunun Mərkəzi Kitabxanasında keçirilib. "İlk mənbədən informasiya alınması: mövcud durum və perspektiv vəzifələr" mövzusundakı tədbirdən öncə Zərdabi MM təmsilçiləri ümummilli lider Heydər Əliyevin rayon mərkəzində ucaldılmış abidəsini ziyarət edib. Onlar, həmçinin, Salyanda ulu öndərin anadan olmasının 94-cü ildönümü münasibəti gerçəkləşdirilmiş ağacəkmə kampaniyasına da qatılıblar.
Tədbiri giriş sözü ilə Salyan Rayon İcra Hakimiyyətinin ictimai-siyasi və humanitar məsələlər şöbəsinin baş məsləhətçisi Rahab Həsənov açıb. O bildirib ki, mətbuata münasibətdə "açıq qapı" siyasətinin həyata keçirilməsi həm də cəmiyyətdə şəffaflıq mühitinin təminatına dəstək baxımından çox vacib məsələdir. Salyanda da buna ciddi yanaşıldığını vurğulayan İH rəsmisi Zərdabi Mətbuat Mərkəzi tərəfindən gerçəkləşdirilən layihənin maarifləndirici mahiyyətinin zəruriliyinə aydınlıq gətirib.
"Zərdabi Mətbuat Mərkəzi" İB-nin sədri, "İlk mənbədən informasiya alınmasının təşviqi ilə "Açıq hökumət" quruculuğuna dəstək" layihəsinin koordinatoru Rəhim Hüseynzadə rəhbərlik etdiyi təşkilatın ilk mənbədən informasiya alınması ilə bağlı problemlərin həllinə həssas yanaşdığını, mövcud istiqamətdə təşəbbüs və təkliflərlə çıxış etdiyini vurğulayıb. O, layihənin məqsəd və vəzifələri barədə məlumat verərək bildirib ki, açıq hökumət quruculuğu mahiyyət etibarilə daim diqqətdə saxlanmalı prosesdir. Çünki bəzən ilk mənbə kimi çıxış etməyin demokratik və hüquqi cəmiyyət quruculuğu baxımdan önəmi kifayət qədər dərk edilmir. Bunun obyektiv və bir çox hallarda subyektiv səbəbləri də ola bilir. Bəzən informasiya verilməsinə məsul ayrı-ayrı məmurlar üzərinə düşən öhdəliyə biganə yanaşır, bəzən də ilk mənbə ilə işləməli olan jurnalistlər öz missiyalarını səriştəsizliklə icra edir. "Ümumən hər bir halda cəmiyyətə informasiya verilməsinə məsul iki qütb iştirak edir. Onlardan birini informasiya daşıyıcıları, digərini isə həmin informasiyanı bilavasitə çatdıran kimi qəbul etsək, mövcud problemin mahiyyətində jurnalistlərin və dövlət qurumlarının, müxtəlif idarə, müəssisə və təşkilatların dayandıqları qaçılmazdır. Hər iki qütbün fəaliyyətinin günün tələbləri səviyyəsində qurulmasına ciddi ehtiyac duyulur ki, bu işdə də ictimai fəallıq dərəcəsinin artırılması mühüm əhəmiyyət daşıyır. Mövcud layihə bunu bəlli fəaliyyət kursu ilə dəyərləndirmək zərurətindən irəli gəlməklə ölkədə açıq cəmiyyət quruculuğu prosesinə dəstək göstərilməsini, bu işə məsul tərəflər arasında qarşılıqlı inam və etimadı möhkəmləndirməyi, həmçinin qarşılıqlı məsuliyyət hissini artırmağı nəzərdə tutur", - deyən R.Hüseynzadə layihə çərçivəsində ilk tədbirin Lənkəranda keçirildiyi və daha bir toplantının da təşkil ediləcəyini diqqətə çatdırıb.
Layihənin eksperti, Jurnalist Araşdırmaları Mərkəzinin sədri Seymur Verdizadə bildirib ki, informasiyalı cəmiyyət anlamının formalaşması birbaşa medianın durumu, informasiya əldə etmə imkanları və informasiya mənbələrinin onun üzünə nə dərəcədə açıqlığı ilə sıx surətdə bağlıdır. İnsan haqlarından, demokratikləşmədən bəşəri miqyasda söhbətlərin getdiyi, müzakirələrin açıldığı bir vaxtda indi dünya dövlətlərinin əksəriyyətində söz və mətbuat azadlığının, o cümlədən ilk mənbədən məlumat alınmasının təminatına yönələn hüquqi aktlar mövcuddur. "Ümumən ilk mənbədən informasiya alma imkanları dövlət və ictimai institutların nə dərəcədə cəmiyyətə açıq olmasını göstərir. Bu məsələyə nəzərən qarşılıqlı əlaqələrin səviyyəsini də müəyyən etmək mümkündür. Dünyamız demokratikləşməyə məhkumdur. Belə bir dövrdə inam və etimada əsaslanan vətəndaş cəmiyyəti quruculuğuna ehtiyac var. Prosesdə ilk mənbədən informasiya verilməsi məsələsində dövlət qurumlarının üzərinə də mühüm məsuliyyətin düşür", - deyə S.Verdizadə bu istiqamətdəki xarakterik tendensiyalara diqqət çəkərək fikrini tamamlayıb.
Çıxış edənlərdən Yeni Azərbaycan Partiyasının Salyan Rayon Təşkilatının əməkdaşı Taleh Pənahov, Salyanda nəşr olunan "Qələbə" və "Ana Kür" qəzetlərinin baş redaktoru Rüstəm Məlikov, 4 nömrəli məktəbin müəllimi İbrahim Davudzadə, "Qələbə" qəzetinin əməkdaşı Əzizağa Məmmədov, Salyan Rayon Mərkəzi Kitabxanasının direktoru Səidə Əliyeva, idman mütəxəssisi Akif Cəfərov və başqaları bildiriblər ki, şəffaf informasiya təminatını müşahidəçilklə yox, əməli fəaliyyətlə-praktikada özünü doğruldan monitorinqlər, sorğular, ictimai rəyə təsir göstərən digər üsullarla sürələndirmək olar. Zərdabi Mətbuat Mərkəzinin maarifləndirici əhəmiyyət daşıyan layihəsinin fəaliyyət istiqamətləri bu baxımdan vacibdir. Natiqlər müzakirə edilən mövzunun əhəmiyyətini vurğulayıblar, qarşılaşdıqları konkret məqamları təsvir ediblər. Onların sualları cavablandırılıb.
Qeyd edək ki, "Zərdabi Mətbuat Mərkəzi" İctimai Birliyi "İlk mənbədən informasiya alınmasının təşviqi ilə "Açıq hökumət" quruculuğuna dəstək" layihəsi çərçivəsində sonuncu toplantısı İsmayıllı rayonunda keçiriləcək.
