Üzeyir Cəfərov: "Bu, müdafiə sənayesinə qoyulan vəsaitin özünü doğrultmasından xəbər verir"
Azərbaycan Müdafiə Sənayesi Nazirliyi "Yalquzaq" snayper tüfənginin ixracına başlayır. Bu barədə mətbuata açıqlamasında müdafiə sənayesi naziri Yavər Camalov bildirib. Nazirin sözlərinə görə, bir neçə xarici ölkədən "Yalquzaq" tüfəngi üçün böyük həcmli sifarişlər alınıb. Hazırda sifarişlərin icrası istiqamətində işlər gedir.
Y.Camalov silahın Azərbaycanda Sərhəd Qoşunlarına da verildiyini qeyd edib. Nazir bildirib ki, "Yalquzaq" texniki-taktiki imkanlarına görə öz sinfindəki bir çox tüfəngləri üstələyir.
Məlumat üçün qeyd edək ki, 7.62 x 51 mm (308 Win) çaplı "Yalquzaq" Azərbaycan MSN-nin mühəndisləri tərəfindən yaradılmış və tam olaraq NATO standartlarına cavab verən ilk milli silahdır. Məhz "Yalquzaq" snayper tüfənginin özəlliklərindən bəhs edilərkən ilk olaraq bu məqamın üzərində dayanılır. "Yalquzaq" sınaqlar zamanı həm dəqiqlik, həm erqonomika, həm də keyfiyyət baxımından qarşıya qoyulan tələblərə tam cavab verdiyini sübuta yetirib.
Mütəxəssislərin fikrincə, "Yalquzaq" snayper tüfəngində Azərbaycan hərbi sənayesində ilk dəfə olaraq tətiyin tənzimlənməsi mexanizmi tətbiq edilib. Bu da tətik mexanizminin sərtliyini, məsafəsini atıcının rahatlığı üçün öncədən nizamlamağa imkan verir. Tüfəngin zərbə-tətik mexanizmi xüsusi dizayn üzrə hazırlanıb ki, (3 elementdən ibarətdir) bu da qısa zaman kəsiyində ona texniki qulluq göstərməyə və dəyişməyə imkan yaradır. Silahın lüləsində əlavə sərtlik, çəkinin yüngülləşdirilməsi və soyumanın yaxşılaşdırılması məqsədilə kanallar açılıb.
Bütün bu deyilənlərin fonunda, "Yalquzaq" snayper tüfənginin ixracı Azərbaycana nə verir?
Məsələyə münasibət bildirən hərbi ekspert Üzeyir Cəfərovun sözlərinə görə, MSN bir sıra diqqəti cəlb edən məhsullar istehsal edir: "O cümlədən, həmin məhsulların bir qismi dünya dövlətlərinin diqqətini cəlb edir. "Yalquzaq" snayper tüfəngləri isə ölkənin daxili tələbatını ödəyib. Bundan başqa, Dövlət Sərhəd Xidməti üçün də həmin silahlardan sifariş olunub. Artıq istehsal səviyyəsi o həddə gəlib çatıb ki, sözügedən tüfənglər xaricə ixrac edilir. Bu il həmin silahların satılmasından Azərbaycan müəyyən valyuta gəlirləri əldə edəcək. Bundan başqa, MSN xüsusi təyinatlılar üçün tapança istehsalına başlayıb. Bu, müdafiə sənayesinə qoyulan vəsaitin özünü doğrultmasından xəbər verir. Biz yaxın perspektivdə ixrac olunan silah növlərinin sayını bir qədər də artıracağıq".
Vidadi ORDAHALLI
