Məhərrəm Zülfüqarlı: "Çünki bu qədər idman kompleksinin tikintisi, gələn qonaqların yüksək standartlara uyğun qarşılanması..."
Bir çox beynəlxalq tədbirlərin Azərbaycanda keçirilməsi ölkəmizin regionun siyasi-iqtisadi və mədəni mərkəzinə çevrildiyini göstərir. Bakı şəhərinin mühüm beynəlxalq tədbirlərə ev sahibliyi etməsi artıq ənənə halını alıb. Bu ilin 4 ayı ərzində Bakıda bir neçə beynəlxalq miqyaslı iri tədbir keçirilib. Belə ki, mart ayında "Beynəlxalq münasibətlərin gələcəyi: güc və maraqlar" mövzusuna həsr olunmuş V Qlobal Bakı Forumu keçirilib.
Forumda bir sıra dövlət başçıları, beynəlxalq qurumların təmsilçiləri və dünyada tanınmış siyasətçilər iştirak edib. Həmçinin, apreldə Beynəlxalq Şahmat Yarışması oldu. Mayın 4-6-da IV Ümumdünya Mədəniyyətlərarası Forum təşkil olundu. Tədbir UNESCO, BMT Sivilizasiyalar Alyansı, Avropa Şurası və digər beynəlxalq təşkilatların əməkdaşlığı ilə baş tutdu. Forum çərçivəsində mədəniyyət və turizm nazirlərinin üçüncü, maliyyə, iqtisadiyyat, siyasət, mədəniyyət, sosial sferada fəaliyyət göstərən beynəlxalq təşkilatların birinci görüşü keçirildi. Eyni zamanda, Bakıda IV İslam Həmrəyliyi Oyunlarının keçirilməsinə start verildi. 10 gün ərzində keçiriləcək tədbirin proqramına 20 idman növü daxil edilib. Bunlar sırasında ağır atletika, futbol, voleybol, üzgüçülük, su polosu, uşu, cüdo, yunan-roma güləşi, karate, taekvando, boks, ağır atletika və digərləri var. İslam Oyunlarında 56 müsəlman ölkəsi iştirak edir. Bundan başqa, bir sıra nazirliklərin xətti ilə bir sıra mötəbər tədbirlər keçirilib. Ümumilikdə, 4 ay ərzində bu qədər mötəbər tədbirin keçirilməsi Azərbaycan dövlət üçün nə deməkdir?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, Bakıda bu cür tədbirlərin keçirilməsi Azərbaycanın beynəlxalq nüfuzunun artması deməkdir: "Çünki ölkənin nüfuzu olmasa, bu qədər mötəbər tədbir keçirilməz. Əlbəttə, bu, ölkənin yüksək nüfuza malik olmasından xəbər verir. Azərbaycanın gündən-günə güclənən iqtisadiyyatı buna imkan verir. Azərbaycan iqtisadi baxımdan güclü olmasaydı, bu tədbirlərin öhdəsindən gələ bilməzdi. Çünki bu qədər idman kompleksinin tikintisi, gələn qonaqların yüksək standartlara uyğun qarşılanması, yola salınması və s. - bunlar hamısı şərtdir. Azərbaycan son illər bu nəticəni əldə etdiyinə görə artıq belə yarışların burada keçirilməsi ənənə halını alıb. Buna da ancaq sevinmək lazımdır". Vidadi ORDAHALLI
