Daxili İşlər Nazirliyinin mətbuat xidmətindən baki-xeber.com-a verilən məlumata görə, nazir iyunun 25-də saat 10:00-da Quba Rayon Polis Şöbəsində Quba, Qusar, Xaçmaz, Şabran, Siyəzən, Xızı şəhər və rayonlarının sakinlərini qəbul edəcək.
Vətəndaşlar daxili işlər orqanları əməkdaşlarının fəaliyyətinə və Daxili İşlər Nazirliyinin səlahiyyətlərinə aid məsələlərlə bağlı müraciət etməklə qəbula yazıla bilər.
Qəbula gələnlər şəxsiyyət vəsiqəsini təqdim etməlidir.
Daxili İşlər Nazirliyi rəhbərliyinin tapşırığı, Baş Pasport, Qeydiyyat və Miqrasiya İdarəsinin təşəbbüsü ilə ölkəmizin şəhər və rayonlarında şəxsiyyət vəsiqələrinin verilməsi və etibarlılıq müddəti bitmiş sənədlərin yeniləri ilə dəyişdirilməsi sahəsində vətəndaş məmnunluğunun təmin edilməsi məqsədilə səyyar xidmətlərin keçirilməsi də davam etdirilir.
Nazirliyin mətbuat xidmətindən baki-xeber.com-a verilən məlumata görə, növbəti belə tədbirlər respublikanın Gəncə və Sumqayıt şəhərlərində, eləcə də Qazax, Samux, İsmayıllı və Xızı rayonlarında baş tutub.
Səyyar xidmətlər zamanı adları çəkilən şəhər və rayonlarda 463 vətəndaşa yeni şəxsiyyət vəsiqələrinin verilməsi təmin edilib. Bu zaman qaçqınların və məcburi köçkünlərin vəsiqə ilə sənədləşdirilməsinə xüsusi diqqət yetirilib.
Belə ki, Qubadlı Rayon Polis Şöbəsinin Qeydiyyat və şəxsiyyət vəsiqəsi xidmətinin əməkdaşları tərəfindən Sumqayıt şəhərində fəaliyyət göstərən Əliquluuşağı kənd tam orta məktəbində qubadlılar üçün, eləcə də Samux Rayon Polis Şöbəsinin müvafiq xidmətinin əməkdaşları tərəfindən Kolayır kəndində yerləşən orta məktəbdə kəlbəcərlilər üçün səyyar xidmətlər keçirilib.
Gəncədə şəhər və şəhərətrafı qəsəbələrdə keçirilmiş səyyar xidmətlər zamanı ümumilikdə 102 vətəndaş, Qazax rayonunun Talıblar və Üaylı kəndlərində ümumilikdə 165 nəfər, İsmayıllı rayonunun Qubaxəlilli kəndində, eləcə də Xızı rayonunda keçirilmiş səyyar xidmətlər zamanı ümumilikdə 196 vətəndaş yeni şəxsiyyət vəsiqəsi ilə təmin edilib.
