Azərbaycan Türkiyəyə qardaş münasibətini bir daha göstərdi. Trend-in məlumatına görə, bunu Türkiyə-Azərbaycan Yüksək Səviyyəli Strateji Əməkdaşlıq Şurasının Ankarada keçirilən V iclasından sonra mətbuata bəyanatlarla çıxışında Türkiyə Prezidenti Rəcəb Tayyib Ərdoğan deyib.
R.T.Ərdoğan bildirib: "Azərbaycan Prezidentinə minnətdaram".
Dövlət başçısı qeyd edib ki, Türkiyə əvvəlki kimi Azərbaycanı Dağlıq Qarabağ münaqişəsi məsələsində dəstəkləyəcək.
O, həmçinin vurğulayıb ki, Azərbaycan Prezidenti ilə görüşdə energetika və müdafiə sahələrində bir sıra məsələlər müzakirə olunub: "Bundan başqa, Azərbaycan Prezidenti ilə regional məsələlər müzakirə edilib".
Prezident əlavə edib ki, Yüksək Səviyyəli Strateji Əməkdaşlıq Şurasının V iclası çərçivəsində 6 sənəd imzalanıb: "Türkiyə Azərbaycanın müstəqillik qazandığı gündən bəri 25 il ərzində əldə etdiyi uğurlarla fəxr edir".
TANAP Azərbaycan və Türkiyənin vacib layihələrindən biridir
Ərdoğan deyib ki, TANAP-ın (Transanadolu qaz kəməri) tikintisi Türkiyə və Azərbaycanın reallaşdırdığı vacib layihələrdən biridir. Onun sözlərinə görə, hazırda Türkiyədə TANAP-ın tikintisi davam edir.
Prezident bildirib ki, Türkiyə və Azərbaycan, eyni zamanda Avropa ilə Asiyanı birləşdirəcək Bakı-Tbilisi-Qars (BTQ) dəmir yolunun tikintisi üzrə vacib layihəni həyata keçirir: "BTQ Türkiyə üçün yüklərin daşınması sahəsində prioritet layihədir və dəmir yolunun tikintisi cari ilin dekabrında başa çatacaq".
Dövlət başçısı əlavə edib ki, dünya neft qiymətlərinin ucuzlaşması Türkiyə və Azərbaycan arasında əmtəə dövriyyəsinə cüzi təsir edib: "Buna baxmayaraq, iki ölkə yaxın 5 il ərzində əmtəə dövriyyəsinin 20 milyard dollaradək artırılmasına hədəflənib".
Onun sözlərinə görə, Türkiyə Naxçıvandan malların idxalında da maraqlıdır.
R.T.Ərdoğan Türkiyə vətəndaşlarına Naxçıvana səfər etməyi tövsiyə edib: "Naxçıvan böyük turizm potensialına malikdir".
