Türkiyənin paytaxtı Ankarada baş vermiş son terror hadisəsinin qurbanlarının xatirəsi Milli Məclisin bu gün keçirilən plenar iclasında bir dəqiqəlik sükutla yad edilib.
Trend-in məlumatına görə, spiker Oqtay Əsədov terror qurbanlarının yaxınlarına başsağlığı verib və səbr diləyib.
Spikeri deyib ki, Azərbaycan 2015-ci ildə də investisiya qoyuluşuna görə cəlbedici ölkə olub. O.Əsədov qeyd edib ki, ötən il infrastruktur layihələrinə və digər sahələrə 16 milyard manata yaxın investisiya qoyulub. Bunun 56 faizi daxili investisiya olub.
2015-ci ildə neft sektoruna 7,1 milyard, qeyri neft sektoruna isə 8.8 milyard manat investisiya qoyulub.
O.Əsədov deyib ki, Azərbaycan dünyanın 165 ölkəsi ilə ticarət dövriyyəsi həyata keçirib. Bu ölkələrdən 65 faizi Avropa ölkələrinin payına düşür.
2015-ci ildə Azərbaycanda Ordu quruculuğu, Silahlı Qüvvələrin maddi-texniki bazasının gücləndirilməsinə xüsusi diqqət yetilib. Bunu isə Azərbaycanın Baş naziri Artur Rəsi-zadə Milli Məclisin iclasında "Azərbaycan Respublikası Nazirlər Kabinetinin 2015-ci ildə fəaliyyəti haqqında hesabat”ı təqdim edərkən deyib.
A.Rəsi-zadə bildirib ki, bunun da səbəbi Dağlıq Qarabağ münaqişəsinin davam etməsidir.
Baş nazir qeyd edib ki, qarşı tərəf yenə də vaxtı uzadaraq problemin həllindən yayınır və beynəlxalq qurumlar bu məsələdə hüquqa zidd mövqe tutub.
A.Rəsi-zadə deyib ki, bunu nəzərə alaraq Ordunun gücləndirilməsinə xüsusi diqqət yetirilib və Ordumuz xeyli güclənib: "Düşmənin təxribatlarına Ordumuzun verdiyi tutarlı cavablar da bunu sübut edir”.
Baş nazir əlavə edib ki, hərbi qulluqçuların təminatının yaxşılaşdırılması məqsədilə yeni hərbi hissələr və şəhərciklər tikilib istifadəyə verilib, 1500 zabit ailəsi mənzillə təmin edilib.
A.Rəsi-zadə vurğulayıb ki, Silahlı Qüvvələrə Yardım Fonduna cəmiyyətin müxtəlif təbəqələri tərəfindən ianə kimi daxil olan vəsait artaraq 70 milyon manatdan çox olub: "Ümumilikdə, Silahlı Qüvvələrlə bağlı görülən bütün işlərin maliyyələşməsinə 3.3 milyard manat vəsait ayrılıb. Fərəhləndirici haldır ki, bu gün Azərbaycanda hərbi-sənaye kompleksi müəssisələrində 1000-dən artıq çeşiddə müdafiə təyinatlı məhsullar istehsal edilir”.
A.Rəsi-zadə bildirib ki, Sahibkarlığa Kömək Milli Fondu 2004-2015-ci illlərdə sahibkarlara 1,7 milyard manat güzəştli kredit verib.
O bildirib: "İl ərzində sahibkarlıq subyektləri 10,7 faiz - 84 minədək, fərdi sahibkarlıq subyektləri isə 11 faiz -577 min nəfərədək artıb. 2015-ci ildə sahibkarlığın inkişafı üzrə ciddi addımlar atılıb".
Baş nazir qeyd edib ki, ötən il əsas kapitala 16 milyard manat ayrılıb: "Bunun 55 faizindən çoxu qeyri-neft sektorunun payına düşüb. İllik inflyasiya 4 faiz səviyyəsində qeydə alınıb".
İqtisadi siyasət, sənaye və sahibkarlıq komitəsinin üzvü Əli Məsimli isə bildirib ki, Azərbaycanda devalvasiyanın fəsadlarının aradan qaldırılması üzrə təkliflər hazırlanır.
Onun sözlərinə görə, müvafiq sənəd mütəxəssislərin iştirakı ilə hazırlanır.
