Kremlin Suriyadan qəfil çıxma qərarı qəbul etməsi Qərb analitiklərini əməlli-başlı təəccübləndirib. Hətta bu təəccüb o dərəcədədir ki, onlar nəticədən çox səbəbi müzakirə etməyə başlayıblar.
Məsələ burasındadır ki, Putinin Rus HKQ qüvvələrinin əsas hissəsinin Suriyadan çıxarılması qərarı Qərb dairələri üçün olduqca gözlənilməz olub. "The Wall Street Journal” yazır ki, bu qərar ABŞ hökumətindən ötrü əsl sürpriz oldu. Lakin bununla belə qeyd olunur ki, belə bir günün uzaqda olmadığı ehtimal edilirdi. Belə ki, nəşrin yazdığına görə, son zamanlar Rusiyanın Suriyada əməliyyatlarda istifadə etdiyi texnika – tanklar, təyyarələr və artilleriya Suriya ərazisindəki bazalar arasında rotasiya olunmurdu. "Politico” analitik nəşri isə Barak Obamanın bu günlərdə "The Atlantic” portalına verdiyi açıqlamanı xatırladaraq ABŞ prezidentinin "Rusiya və Suriya çox irəli getdi və bununla münasibətlərdə dəyişmə risqini xeyli artırdı” fikrinə diqqət çəkir. "İki il öncə Krımın ilhaqından sonra Putin özünün gözlənilməz addımları ilə amerikan analitikləri dəfələrlə çaşdırıb və Obamanın məyusluğuna baxmayaraq, onun addımlarını öncədən proqnozlaşdırmaq mümkün olmayıb”- Politico yazır. Rusiya liderinin sözü ilə əməlinin üst-üstə düşmədiyini bildirən portal istisna etmir ki, sözügedən qərarın belə tələsik verilməsinin kökündə konfliktin episentrinə düşmək qorxusu olub. Portalın versiyasına görə, son həftələrdə Rusiya HKQ müxalifətin zəifləməsində Əsədə misilsiz xidmət göstərib. İndi Qərb analitiklərini qorxudan odur ki, Rusiya ABŞ-a ekstremizmlə birgə mübarizə təklif etməsi qorxudur. Belə olarsa, bu, Əsəd rejiminin susqun şəkildə müdafiəsi ola bilər.
Digər tərəfdən, analitiklər bildirir ki, bu həm də Əsədə ciddi siqnal ola bilər ki, müxalifətlə danışıqlarda daha sıx iştirak etsin: burada qısamüddətli məqsəd hakimiyyətin qismən verilməsi, uzunmüddətli məqsəd isə konstitusiya islahatı və təkrar seçki ola bilər.
"Bloomberg” agentliyindən Leonid Berşidskinin mövzu ilə bağlı fikirləri daha maraqlıdır. O yazır ki, əslində Rusiya özünün Suriyadakı mövcudluğundan tamamən imtina etmək niyyətində deyil. Onun sözlərinə görə, Putinin bu ritorikası daha çox 2014-cü ildə Normandiyada etdiyi sülhməramlı jesti və ya 2015-də Ukrayna ilə bağlı imzaladığı Minsk-2 razılaşmasını xatırladır.
Beləliklə, Putin dünyanı yeni bir tapmaca ilə üz-üzə qoyub. Cavabını isə yalnız özü bilir. Yəni elə Qərb analitiklərinin dili ilə desək, onun addımlarını proqnoz etmək mümkünsüzdür.
Samirə
