Ümumdünya Antidopinq Agentliyinin (WADA) rəsmi nümayəndəsi Ben Nikols bəyan edib ki, qadağan olunmuş "meldoniy" dopinqi yoxlama-testdən keçmiş 60 idmançıda aşkarlanıb. Bu barədə The New York Times xəbər yayıb.
Xəbərdə bildirilir ki, bu, 7 mart tarixinə olan məlumatdır və yoxlamalar davam edir. Qurum qanında dopinq aşkarlanmış idmançıların siyahısını açıqlamasa da, onlardan 12 nəfərinin adı ictimaiyyətə bəlli olub. Bunlar velosiped yarışmaçısı Eduard Vorqanov, fiqurist Yekaterina Bobrova, tennisçi Mariya Şarapova, konkisürən Pavel Kulijnikov, voleybolçu Aleksandr Markin, biatlonçu Eduard Latıpov , həmçinin Semyon Elistratov və Yekaterina Konstantinovadır. Eyni zamanda İsveçdən Abeba Areqava, gürcü sərbəst güləşçisi David Modzmanaşvili, Ukrayna biatlonçuları Olqa Abramova və Artyom Tişşenkonun da test nəticələrinin müsbət olduğu ortaya çıxıb.
Lakin xəbərdə o da bildirilir ki, sözügedən preparat 1 yanvar 2016-cı il tarixdən qadağan olunmuşlar siyahısına daxil edilib. Onun yaradıcısı – latviyalı İvar Kalvinıts isə "meldoniy" preparatının dopinq kimi qəbul olunmasına qətiyyətlə qarşı çıxır, bildirir ki, bu preparat ürəyi artıq yüklənmədən qoruyur. Preparata qadağa qoyulmasını isə o, insan haqlarının pozulması kimi qiymətləndirir.
Xatırladaq ki, dünən erməni saytları dopinq qalmaqalına özünəməxsus reaksiya verərək, ötən il Bakıda keçirilən ilk Avropa Oyunları zamanı 490 idmançının sözügedən preparatdan istifadə etdiyini, 12 nəfərin isə məhz bu dərman hesabına qızıl medala yiyələndiyini yazmışdı. Lakin göründüyü kimi, hələlik qanında dopinq aşkarlanan idmançıların heç biri həmin oyunlar zamanı Azərbaycanda olmayıb, daha doğrusu, Oyunlarda onların təmsil olunduğu idman növlərində yarışmalar keçirilməyib. Üstəlik, bu preparat 1 yanvar 2016-cı il tarixdən qadağan olunmuş preparatlar sırasına daxil edilib, yəni ilk Avropa Oyunlarından 6 ay sonra... Əlavə şərhə ehtiyac varmı?
Samirə
