Ukraynalı pilot, Xocalı hadisələrinin şahidi Leonid Kravets 24 il əvvəl baş vermiş faciə barədə danışıb.
O, Bakıda keçirilən mətbuat konfransında deyib: "Fevralın 27-də Gəncədən istiqamət alaraq Xocalı üzərindən uçurduq və bilmirdik ki, bu şəhərə hücum olub. Yüksəklikdən hansısa rəngli sahə gördük. Aşağı enəndə başa düşdük ki, bu sahə mülki əhalinin cəsədləri ilə örtülüb. Orada hələ canlı insanlar var idi, ermənilər onları öldürürdülər. Vertolyotumuza silahlı şəxslər atəş açmağa başladı".
L. Kravets bildirib ki, sonra ekipaj Gəncəyə uçaraq rəhbərliyə raport verib: "Biz Sovet ordusuna tabe idik, komandanlığın əmrlərini icra edirdik. Lakin Xocalı hadisələri zamanı əmr gözləmədən oralara uçduq. Sonra o zamankı prezidentin köməkçisi Gəncəyə gəlib və xahiş edib ki, jurnalistləri həmin yerə aparsınlar. Biz təxminən faciənin baş verdiyi andan bir neçə saat sonra hadisə yerini görmüşdük. Azərbaycanda bu barədə heç kəs bilmirdi. Sonra Çingiz Mustafayev və iki nəfər köməkçi ilə hadisə yerinə getdik. 10 dəqiqə çəkiliş apara bildik. Çəkiliş qrupunda və bizdə qoruyucu jiletlər yox idi. Havaya qalxdıq, ermənilərin olduğu hərbi maşınların yaxınlaşdığını gördüm və çəkiliş qrupunu götürərək oradan uzaqlaşmalı oldum".
L. Kravets qeyd edib ki, vaxt azlığından böyük ərazini çəkmək mümkün olmayıb: "Ümumi mənzərəni ancaq havadan çəkmək mümkün idi, vəziyyət pis idi. Bu dəhşətli mənzərə idi. Ölənlər çox idi, meyitlər böyük əraziyə səpələnmişdilər. Bizimlə birlikdə iki polis əməkdaşı var idi. Hətta onlardan biri meyitlərə baxanda, başından güllə ilə vurulmuş uşağını gördü. Onu helikopterə güclə apardıq, dəli olmuşdu".
L.Kravets qeyd edib ki, bu yaxınlarda guya bu hadisələri "azərbaycanlıların özləri törətməsi" barədə şayiələr eşidib: "Şokda idim. Oxumuşdum ki, ermənilər dinc əhalinin çxıması üçün dəhliz açmışdıar. Lakin bununla belə, bütün bu insanları məhv etmək üçün pulemyotdan istifadə edirdilər. Bu, bir Azərbaycanın ağrısı və faciəsi idi".
