Bu günlərdə bir neçə rayonda süni qiymət artımından narazı qalmış ictimaiyyət nümayəndələri etiraz hərəkətləri və şikayətlər etməyə cəhd ediblər. Baş verən hadisələrin müqayisəsi göstərir ki, əsasən sosial-iqtisadi məsələlərdən ictimai narahatlıqlar var və bunu da bir çox hallarda başa düşmək çətin deyil.
Xüsusilə də siyasi xarakterli tələblərin yoxluğu ciddi bir faktordur və bunun üzərində düşünməyə ehtiyac var. Qəzetimizin baş redaktoru Aydın Quliyev də məhz bu məqam üzərində xüsusi dayandı: "Süni artırılan qiymətlərdən, yaradılan mal qıtlığından narahat olan insanları başa düşmək olar. Bu cür narazılıqlar elə bir vaxtda ifadə edilir ki, ölkə Prezidenti özü də mövcud sosial-iqtisadi problemlərin obyektiv və subyektiv kökləri barədə çox açıq danışır, ictimaiyyətin bunlarla əlaqədar müzakirələrə qoşulmasına təkan verir. Əgər ölkə Prezidentinin süni qiymət artıranlarla qəti mübarizə başlatdığı bir vaxta bölgə sakinləri də süni bahalaşmadan fəal narazılıq bildirirsə, bu elə əslində Prezidentin başlatdığı prosesə ictimai dəstək hərəkatları kimi də nəzərdən keçirilə bilər. Belə bir maraqlı mənzərə yaranır. Yuxarıdan Prezident süni qiymət artıran monopolistləri və məmurları özü sıxır, aşağıdan isə onları cəmiyyət sıxır. Prezidentin və etirazçı insanların hədəfi əslində birdir. Qiymətlərə etiraz edən insanların heç bir siyasi tələb, şüar səsləndirməməsi də belə qənaəti möhkəmləndirir. Həm də onu göstərir ki, narazı insanlar əslində Prezidentin də onları narahat edən problemlərlə mübarizə apardığını, bu mübarizədə maraqlı olduğunu başa düşürlər. Yəni bilirlər ki, Prezident də elə onlar deyəni deyir. Odur ki, qiymətlərə etiraz edən insanlardan qorxmaq yox, əksinə, onları iddialı siyasi qrupların əlində alətə çevrilməkdən qorumaq lazımdır. Qiymət etirazları Prezidentin monopolistlərə, süni bahalaşmalara və süni mal qıtlığı yaradanlara qarşı başladığı mübarizəyə böyük dəstək qüvvəsinə çevrilə bilər və bilməlidir. Bu isə səmərəli perspektiv vəd edən prosesdir".
İradə SARIYEVA
