Rusiya Hərbi Kosmik Qüvvələrinin Suriyada hava əməliyyatlarına başlamasının 100 günü tamam oldu. "Terrorizmlə mübarizə” apardığını deyən Moskva ötən müddət ərzində İŞİD-i bölgədən sıxışdıra bilmədi, əvəzində müxalifətin önü kəsildi, Əsəd rejimi isə yerini möhkəmləndirdi, itirdiyi ərazilərin bir qismini nəzarətinə qaytara bildi. Bütün bunlar isə mindən çox suriyalının ölməsi, yüz minlərlə dinc sakinin yurd-yuvasını tərk etməsilə müşayiət olundu.
Əməliyyata başladığı ilk ayda Rusiya HKQ İdlib, Homs, Həma əyalətlərini və Hələbin şimalını hədəfdə saxladı. İkinci ayın – oktyabrın ikinci yarısından Suriya müxalifətinin nəzarətində olan Hələbin şimalı, İdlibin cənubu, eyni zamanda türkmən rayonları Bayırbucaq və Lazkiyə Rusiyanın əsas hədəf nöqtəsinə çevrildi. Dekabrın ortalarından bu günə kimi isə Rusiya hərbi aviasiyası Hələbin şimal və cənub rayonlarını, Bayırbucaq və İdlibi bombalayır. Beləliklə də Rusiya HKQ nəinki İŞİD-i zəiflətmədi, hətta əksinə, İŞİD və PYD-nin genişlənərək Hələblə Türkiyə sərhədi arasında koridoru tutmasına yardımçı oldu. Nəticədə İŞİD Türkiyə ilə sərhəd Azez rayonunun 3 kilometr içərilərinə daxil ola bildi.
Rusiyanın Əsəd qüvvələrinə intensiv dəstəyi müxalifəti özünümüdafiə pozisiyasına keçməyə sövq etdi. Halbuki, Rusiyanın buradakı əməliyyatlarına qədər müxalifətin "Fəth ordusu” İdlibi tamamilə öz nəzarətində saxlayırdı. Bu 100 günün ən ağır cəzasını isə mülki insanlar çəkdi. Anadolu Agentliyinin məlumatına görə, bu müddət ərzində mindən çox dinc sakin həyatını itirib, BMT-nin noyabr ayı üçün açıqlamasına görə 123 min insan yurd-yuvasını tərk edib.
Bəs qazanan kim olub? Rusiya ötən ilin oktyabrından PKK-nın Suriyadakı radikal qolu PYD ilə münasibətlərini ən yüksək həddə gətirib. Öz növbəsində PYD ABŞ-la Rusiya arasında rəqabətdən istifadə edərək Rusiyanın gözünə girmək fürsəti qazanıb. Bununla da Moskvanın silah-sursat dəstəyinə nail olub. 2 dekabr tarixində Rusiyanın hərbi-nəqliyyat təyyarəsi Hələbin şimalında PYD qüvvələri üçün döyüş meydanına 5 ton silah-sursat aparıb. Elə həmin ərəfədə Suriya-Türkiyə sərhədində irəliləməsi üçün Azez-Cerablus cəbhəsində PYD-yə dəstəyini göstərib. Nəticədə bir cəbhədə İŞİD-lə döyüşən PYD digər cəbhədə müxalifəti əzməklə məşğul olub. Beləliklə də Teneb, Meryemen, Keştar əyalətlərini müxalifətin nəzarətindən çıxaran PYD Fəratın qərbində 12 yaşayış məntəqəsi üzərində özünün nəzarətini təmin edib.
Rusiyanın bundan sonrakı planlarına nələr daxildir?
Baki-xeber.com
