Rusiyada anti-Türkiyə təbliğatının yeni dalğasına start verilib. Moskvadakı qaynaqlardan əldə etdiyimiz xəbərə görə, yerli telekanallar və mətbu orqanlar artıq Türkiyədə vətəndaş müharibəsinin başladığını ictimai şüura yeritməyə çalışır. Məqsəd isə aydındır: yüksək səviyyədə qoyulan qadağalara rəğmən hələ də hansısa yolla Türkiyəyə dincəlməyə getmək istəyənləri öz arzusu ilə bundan çəkindirmək.
Yəqin məlum təyyarə olayından sonra Rusiyada preident səviyyəsində bu ölkəyə tətilə gedilməsinə qadağa qoyulduğu hər kəsin xatirindədir. Hətta bundan dərhal sonra ölkə boyu turoperatorların öz səyahət paketlərindən Türkiyənin adını çıxardığı da bəllidir. Lakin hər kəs onu da xatırlamamış deyil ki, RF turizm naziri ölkə əhalisinin Türkiyə çimərliklərindən asanlıqla əl çəkməyəcəyini bildirmişdi. Görünən odur ki, Türkiyədə qeyri-stabilliyin hökm sürdüyü, hətta vətəndaş müharibəsinin başladığı barədə xəbərləri dövriyyəyə buraxmaqla hakimiyyət insanların öz istəyilə "bu sevdadan vaz keçməsinə” çalışır.
Burada bir nüans da var ki, Türkiyənin turizm sektoru "erkən rezervasion” deyilən qabaqcadan sifariş əsasında turpaketlərə əhəmiyyətli endirimlər edir. Yəni qışda istirahət rayonunu, hətta otelini seçməklə qabaqcadan ödəniş edənlər yaydakı qiymətlərlə müqayisədə xeyli irəli düşür ki, əhalinin aztəminatlı hissəsi də məhz bu üsulla istirahətini təmin edir. O kontekstdən yanaşılarsa, hazırki "vətəndaş müharibəsi” təbliğatının da məhz "erkən rezervasionçulara” hesablandığı şübhə doğurmur. Axı Türkiyə haqqında azacıq təsəvvürü olanlar bilməmiş deyil ki, bu ölkənin turizm rayonları ilə Türkiyə dövlətinin PKK-çılara qarşı əməliyyatlar keçirdiyi bölgələr tamamilə bir-birinə əks qütblərdə yerləşir...
Baki-xeber.com
