Bloomberg View Rusiyanın Qərbin sanksiyaları ilə üzləşdikdən sonra istər siyasi, istərsə də iqtisadi sahədə yaşadıqlarını analiz edib. "Rusiya son ana kimi Yaxın Şərqdə dəstəyə ümid edirdi, amma onu ala bilmədi” sözlərilə başlayan məqalədə əsasən Ukrayna siyasəti üzündən Rusiyanın ötən ildən bəri üzləşdiyi iqtisadi çətinliklərə diqqət çəkilir. Vladimir Putinin "Bizi heç kəs sevmir, amma vecimizə də deyil” sözlərini sitat gətirən müəllif yazır ki, o zaman Pusiya prezidentinin özünü arxayın aparması onun tezliklə özünə yeni partnyorlar tapacağını düşünməyə əsas verirdi. Lakin ötən müddət ərzində Rusiya nəinki Avropa Birliyi ölkələrinə alternativ investisiya bazarı tapmayıb, üstəlik bir çox dost ölkələrlə də münasibətləri pisləşdirib. Bu üzdən müəllif yaxın tezlikdə ölkədə neftin qiymətinin qalxacağına ümid etməyin yersiz olduğunu bildirir, qeyd edir ki, artıq Putinin ötənilki arxayın davranışından əsər-əlamət qalmayıb.
Yazı müəllifi dediklərinə sübut kimi Rusiyanın Çinlə qurulan əlaqələrini göstərir və bildirir ki, bu ölkə ilə qaz boru xəttinin çəkilməsi yönündə razılaşmanın imzalanmasından il yarımdan çox zaman keçsə də, nəinki bu istiqamətdə addım atılmayıb, üstəlik bu mövzuda danışıqlardakı əvvəlki pafos da qalmayıb. Eyni zamanda sğzügedən ölkə ilə mal dövriyyəsi də əhəmiyyətli dərəcədə enib.
Müəllifin fikrincə, apardığı aqressiv siyasət Putinin bir çox ölkələrə çıxışını əngəlləyib. Misal kimi Bolqarıstanı göstərən müəllif bildirir ki, Rusiya "Cənub axını” qaz xəttini bu ölkədən keçirməklə AB ölkələrinə daşımağı düşünürdü, lakin Ukraynanın şərqində situasiyanın gərginləşməsilə Bolqarıstan kəmərin tikintisini dayandırdı. Bundan sonra Putin üzünü Türkiyəyə çevirdi və büləliklə də "Cənub axını” "Türk axını”na çevrilmək perspektivi qazandı. Eyni zamanda Rusiya Türkiyədə AES tikməyə başladı. Lakin yaşanan təyyarrə olayı iki ölkə arasında münasibətləri o dərəcədə gərginləşdirdi ki, onlar bir-birilə sanksiya dilində danışmağa başladılar. Nəticədə "Qazprom”un əlində 2 milyard dollarlıq borular qaldı ki, onlar ancaq Qara dənizin dibilə kəmər çəkməyə yarayır. Üstəlik Rusiya ölkə əhalisinin Türkiyə çimərliklərinə gedişini də qadağan etdi. Hərçənd, ölkənin turizm naziri rusiyalıların bu çimərliklərsiz keçinə bilməyəcəyini deyir.
Müəllif sonda bildirir ki, Rusiya hələlik bütün olanlara duruş gətirir, Putin də əvvəlki populyarlığını qoruyur, lakin Moskva əsas ticari və iqtisadi partnyorları ilə münasibətlərini düzəltməsə, bunların heç biri uzunömürlü olmayacaq. Çünki, onun fikrincə, Putini bəlkə də heç kəs sevmir, lakin patnyorlara Rusiya gərəkdir. O üzdən müəllif düşünür ki, Putin özünü heç nə vecinə deyilmiş kimi aparmağa son qoysa, yaxşı olar.
Baki-xeber.com
