Bu gün Milli Məclisdə (MM) İnsan hüquq məsələləri üzrə Birgə İşçi Qrupun (BİQ) iclası keçirilib.
APA-nın xəbərinə görə, iclasda çıxış edən irgə BİQ-in həmsədri, Azərbaycanın Avropa Şurası Parlament Assambleyasındakı nümayəndə heyətinin rəhbəri Səməd Seyidov deyib ki, bu qurum nə Avropa Şurası, nə Avropa Birliyi, nə də digər beynəlxalq təşkilatlar üçün yaradılıb: "Bu qrup Azərbaycanda insan hüquqları problemlərinin həlli üçün müvafiq qurumlara tövsiyə vermək üçün formalaşıb. Ona görə də Avropa Şurasının baş katibi Tyorbyorn Yaqlandın öz nümayəndəsini qrupdan geri çağırması bizim üçün əhəmiyyətli məsələ deyil”.
S. Seyidov bildirib ki, T.Yaqlandın hərəkəti ümumiyyətlə, qəribədir: "Çünki əvvəlcə öz nümayəndəsini geri çağırır. Sonra isə insan haqları ilə bağlı Azərbaycana öz nümayəndəsini göndədir”.
Həmsədr qeyd edib ki, qrup öz fəaliyyətini davam etdirəcək: "Bu qrup Azərbaycanda insan haqlarını qorunması ilə bağlı müvafiq qurumlara qərar qəbul etmək üçün tövsiyələr verəcək”.
Birgə İşçi Qrupun üzvü, deputat Azay Quliyev isə deyib ki, bu qrup Azərbaycanda daxili mexanizm kimi yaradılıb və elə daxili mexanizm kimi də fəaliyyətini davam etdirəcək.
Bundan sonra BİQ-in iclası jurnalistlərin iştirakı olmadan davam etdirilib.
İşçi qrupun katibi, hüquq müdafiəçisi Sahib Məmmədov bildirib ki, 2 saat davam edən iclasda bir sıra məsələlər müzakirə edilib: "İclasda işçi qrupun həmsədri Səməd Seydirov çıxış elədi. Ötən dövrlə ərzində işçi qrup tərəfindən görülən işlər barəsində məlumat verdi. İclasda çıxış edən hüquq müdafiəçiləri müxtəlif məsələlərə toxundular. Bildirildi ki, işçi qrupun fəaliyyətini istəməyən qüvvələr var. Buna baxmayaraq, qrup özü fəaliyyətini davam etdirəcək. Əfv Komissiyasının üzvü , deputat Azy Quliyev isə bildirdi ki, işçi qrup tərəfindən Əfv Komissiyasına göndərilən tövsiyələr diqqətlə araşdırılıb”.
Dilarə Əliyeva adına Qadına Hüquqları Cəmiyyətinin sədri, hüquq müdafiəçisi Novella Cəfəroğlu bildirib ki, insan hüquq məsələləri üzrə Birgə İşçi Qrup tərəfindən həbsdə olan şəxslərlə bağlı 22 nəfərlik siyahı hazırlanıb. N.Cəfəroğlu qeyd edib ki, hazırlanmış siyahı Prezident yanında Əfv Komissiyasına təqdim edilib: "Siyahıda bir çox tanınmış şəxslərin adı var. Biz siyahını komissiyaya təqdim etmişik. Həmin siyahı prezidentə də təqdim ediləcək. Biz siyahıda adları olan şəxslərin əfv olunmalarını istəyirik”.
N. Cəfəroğlu qeyd edib ki, Əfv Komissiyaya təqdim olunan siyahıda Tofiq Yaqublu, İlqar Məmmədov, İntiqam Əliyev, Anar Məmmədli, Rəsul Cəfərov, Yadigar Sadıqlı və digər şəxslərin adı var.
