Kamerunun Universal Maidens Association Cameroon (UNIMAC) təşkilatı, Azərbaycanın “XXI Əsrin Qadınları” İctimai Birliyi və “Konstitusiya” Araşdırmalar Fondu arasında üçtərəfli əməkdaşlıq haqqında Memorandum imzalanıb.
Memorandum insan hüquqlarının müdafiəsi, qadınların və həssas qrupların imkanlarının genişləndirilməsi, insan alverinin və müxtəlif istismar formalarının qarşısının alınması, korrupsiyaya qarşı mübarizə, şəffaflıq və hesabatlılığın təşviqi, eləcə də vətəndaş cəmiyyəti institutları arasında beynəlxalq əməkdaşlığın genişləndirilməsini nəzərdə tutur. Sənədə əsasən, tərəflər birgə tədqiqat və monitorinqlər aparacaq, hüquqi və siyasət tövsiyələri hazırlayacaq, maarifləndirmə təşəbbüsləri həyata keçirəcək, ekspert və təcrübə mübadiləsi təşkil edəcək, həmçinin milli və beynəlxalq layihələr üzrə əməkdaşlıq imkanlarını inkişaf etdirəcəklər. Əməkdaşlığın mühüm istiqamətlərindən biri insan alveri, korrupsiya, əmək istismarı, qanunsuz işə cəlbetmə, miqrasiya ilə bağlı risklər və səlahiyyətdən sui-istifadə arasında əlaqələrin araşdırılmasıdır. Bu mövzular üzrə müqayisəli tədqiqatların, analitik hesabatların və preventiv təşəbbüslərin hazırlanması nəzərdə tutulur.
“Konstitusiya” Araşdırmalar Fondunun prezidenti Əliməmməd Nuriyev bildirib ki, imzalanmış Memoranduma yalnız üç təşkilat arasında formal əməkdaşlıq sənədi kimi baxmaq düzgün olmaz: “Bu əməkdaşlıq bizim üçün müxtəlif regionlarda fəaliyyət göstərən vətəndaş cəmiyyəti təşkilatlarının təcrübəsini bir araya gətirmək imkanıdır. İnsan alveri, korrupsiya, əmək istismarı və insanların həssas vəziyyətindən sui-istifadə çox vaxt bir-birindən ayrı problemlər deyil. Onları yaradan ortaq risklər, sosial səbəblər və institusional boşluqlar var. Ona görə də beynəlxalq QHT əməkdaşlığı yalnız tədbirlərin keçirilməsi ilə məhdudlaşmamalıdır. Birgə araşdırmalar, monitorinqlər, ekspert mübadiləsi və konkret həllərin hazırlanması bu əməkdaşlığın real nəticəsi olmalıdır. Azərbaycan QHT-lərinin beynəlxalq əlaqələrinin, o cümlədən Afrika ölkələrinin vətəndaş cəmiyyəti təşkilatları ilə birbaşa əməkdaşlığının genişlənməsini də vacib hesab edirik”.
Memorandumda əməkdaşlığın hüquqi və etik çərçivəsinə də diqqət yetirilib. Tərəflərin institusional müstəqilliyi, donor və qrant müraciətlərində təşkilatların ad və loqolarından yalnız əvvəlcədən razılıq əsasında istifadə edilməsi, fərdi və həssas məlumatların qorunması, maraqlar toqquşmasının qarşısının alınması və korrupsiyaya qarşı sıfır dözümlülük prinsipləri sənəddə əksini tapıb.
Sənədi Universal Maidens Association Cameroon-un (UNIMAC) Baş icraçı direktoru Ameh Maurice Ngwa, “XXI Əsrin Qadınları” İctimai Birliyinin sədri Mahirə Əmirhüseynova və “Konstitusiya” Araşdırmalar Fondunun prezidenti Əliməmməd Nuriyev imzalayıblar.
Üç il müddətinə nəzərdə tutulan Memorandum Azərbaycan və Kamerun vətəndaş cəmiyyəti təşkilatları arasında əlaqələrin genişləndirilməsinə, yeni beynəlxalq tərəfdaşlıqların qurulmasına və birgə təşəbbüslərin həyata keçirilməsinə imkan yaradır.
Qeyd edək ki, Universal Maidens Association Cameroon (UNIMAC) – Kamerunda fəaliyyət göstərən qeyri-kommersiya vətəndaş cəmiyyəti təşkilatıdır. Təşkilat 2020-ci ildə yaradılıb, 2021-ci ildə rəsmi qeydiyyatdan keçib. UNIMAC qadın və qızların sosial-iqtisadi imkanlarının genişləndirilməsi, gender əsaslı zorakılığın qarşısının alınması, təhsil və peşə bacarıqlarının inkişafı, insan hüquqlarının müdafiəsi, həssas icmaların dəstəklənməsi, yoxsulluğun azaldılması və davamlı icma inkişafı istiqamətlərində fəaliyyət göstərir.
Təşkilat, həmçinin ev işçilərinin hüquqları, layiqli əmək şəraiti və istismardan müdafiə məsələləri ilə məşğul olur. UNIMAC müxtəlif tərəfdaşlarla qadınların iqtisadi imkanlarının genişləndirilməsi, menstrual sağlamlıq, sülh quruculuğu, kənd icmalarının dayanıqlığının artırılması və digər sosial istiqamətlərdə layihələr həyata keçirib. Təşkilata onun təsisçisi və Baş icraçı direktoru Ameh Maurice Ngwa rəhbərlik edir.
“XXI Əsrin Qadınları” İctimai Birliyi – qadın hüquqlarının müdafiəsi, gender bərabərliyi, həssas qrupların sosial müdafiəsi, insan alverinin qarşısının alınması və insan alverindən zərər çəkmiş şəxslərə dəstək istiqamətlərində fəaliyyət göstərən Azərbaycan vətəndaş cəmiyyəti təşkilatıdır. Təşkilata Mahirə Əmirhüseynova rəhbərlik edir.
“Konstitusiya” Araşdırmalar Fondu – hüquq, insan hüquqları, konstitusionalizm, yaxşı idarəetmə, şəffaflıq və hesabatlılıq, korrupsiyanın qarşısının alınması, vətəndaş iştirakçılığı və hüquqi siyasət məsələləri üzrə araşdırma, monitorinq, maarifləndirmə və ictimai təşəbbüslər həyata keçirən Azərbaycan vətəndaş cəmiyyəti təşkilatıdır. Fondun prezidenti Əliməmməd Nuriyevdir.
