Natavan Əliyeva: “Dermatoloji təhsili olmayan şəxsin kosmetoloq kimi çalışmasının qarşısı alınmalıdır”
Gözəllik qurban tələb edir. Bu deyimi əbəs yerə işlətməyiblər. Çünki qadınlar bütün dövrlərdə gözəlləşmək uğrunda bir çox “qurbanlar” verməkdən çəkinməyiblər. Bu indi də belədir. Hazırda əksər qadınlar kor-koranə, rastlarına çıxan gözəllik salonlarının qeyri-peşəkar kosmetoloqlarına müraciət edib, özlərini təhlükəyə atırlar. Nəticədə isə vizual görkəmləri təhlükə altına düşür.
Bu gün kosmetoloq olmaq olduqca asandır. İstənilən şəxs hansısa mərkəzin 2 aylıq kosmetoloji kursuna yazılmaqla bu sahə ilə məşğul ola bilər. Həmin mərkəzlərdə kosmetoloq olmaq istəyənlərə dəri tiplərinin ayırd edilməsi, hər növ dəriyə uyğun kosmetik vasitələrin seçilməsi, kimyəvi və mexaniki pilinqlər, massaj, yaşlanma əlamətləri ilə mübarizə, çapıqların müalicəsi, saç tökülmələri və digər problemlərlə necə mübarizə aparmaq öyrədilir. Beləliklə, az-maz kosmetoloji anlayışı olan şəxs sərbəst şəkildə gözəllik salonlarında “kosmetoloq-həkim” kimi çalışa bilər.
Məlumat üçün bildirək ki, xarici ölkələrdə kosmetoloq işləmək bir qədər fərqlidir. Belə ki, qonşu Türkiyədə kosmetoloq işləmək istəyənlər buranın ali məktəblərində ən azı 3 il təhsil almalıdırlar. Qonşumuz Rusiyada da bu sahə kifayət qədər inkişaf edib. Burada hələ 1937-ci ildə “Baş Parfümeriya Sənayesi Kosmetika və Gigiyena İnstitutu” yaradılıb. Elə o vaxtdan bu sahədə mütəxəssis hazırlayan institut sonra 1966-cı ildə “Plastik Cərrahiyə və Kosmetologiya İnstitutu”na çevrilib. 2009-cu ildə isə həkim-kosmetoloq ixtisası rəsmi şəkildə ölkənin Səhiyyə Nazirliyi tərəfindən qeydiyyatdan keçib.
Rusiyanın Plastik Cərrahiyə və Kosmetologiya İnstitutunda hər il 80 min pasiyent müalicə alır. Bu sahədə təhsil alanlardan baza bilikləri ilə yanaşı, dermotologiya, xüsusilə də müasir avadanlığın köməyi ilə estetik problemlərin həll olunması, fizioterapiya üsulları, bərpaedici tibb sahəsində əldə olunan ən son yeniliklər, ginekologiya və qocalma əleyhinə tibbin əsasları və psixologiyanı da bilmək tələb olunur. Avropada isə kosmetoloq olmaq üçün mütləq müalicə işi üzrə ali tibbi təhsil almaq tələb olunur. Bizdə xarici ölkələrdən fərqli olaraq, adi qadın salonlarında “kosmetoloq” işləyən şəxslər çox zaman orta təhsilə malik olurlar.
Qeyd edək ki, gözəllik salonlarında çalışan kosmetoloqların qəbulunda olan xanımlar əksər hallarda onların əl işlərindən narazı olurlar. Hətta bu məsələ dəfələrlə mətbuata da yer alıb. Xanım şikayətçilər saxta kosmetoloqların onların üz dərisini və ya saçını bərbad hala saldığını bildirirlər.
Salon kosmetoloqları ilə necə mübarizə aparmağın yollarını öyrənmək məqsədilə mütəxəssislərə müraciət etdik.
Trixoloq-həkim Natavan Əliyeva bizimlə söhbətində qeyd etdi ki, gözəllik salonlarında çalışan kosmetoloqların əksəriyyəti bu sahənin mütəxəssisi deyil: “Kosmetoloq kimi çalışmaq istəyən şəxslərin dermatoloji təhsili olmalıdır. Dermatoloji biliyi olmayan şəxsin insan dərisinə hər hansı prosedur etməsi düzgün deyil. Bu gün bəzi qadınlar düşünürlər ki, üz və ya saçına mezoterapiya etsələr, onlar daha cavan və gözəl görünəcəklər. Salon kosmetoloqları da xanımların dərisini yoxlamadan, müayinə etmədən mezoterapiyanı tətbiq edirlər. Xarici ölkələrdə mezoterapiya etdirmək istəyənlər öncə qan analizi verməlidirlər və onun nəticəsinə uyğun olaraq müəyyən prosedur tətbiq olunur. Təəssüf ki, bizdə kor-koranə şəkildə xanımların üz dərisinə müəyyən iynələr yeridilir. Nəticədə isə xanımların üz dərisi bir müddət sonra daha pis vəziyyətə düşür. Yaxşı olar ki, xanımlar kosmetoloqdan mezoterapiya zamanı ona hansı dərmanların tətbiq ediləcəyini soruşsunlar. Əgər kosmetoloq “bu mənim sirrimdir”, - deyib məlumat vermirsə, o zaman həmin xanım utanıb-çəkinmədən həmin məkanı tərk etsin. Çünki müalicə zamanı müxtəlif fəsadlar ola bilər”.
Həmsöhbətimizin sözlərinə görə, gözəllik salonlarında üzə yüngül maskalar qoymaq olar, burada müalicə aparmaq, qanla bağlı əməliyyatlar keçirmək, orqanizmə yad cisimlər yeritmək yolverilməzdir.
N.Əliyevanın sözlərinə görə, dəridə baş verən problemlərin səbəbini daxildə axtarmaq lazımdır: "İndi Bakının yarısı sifəti yaralardan zədələnmiş halda gəzir. Bunun da çox zaman günahı səriştəsiz kosmetoloqlardadır. Kosmetoloqun işi sifəti bəzəmək ola bilər, daha müalicə etmək yox. Ona görə də problemli insanlar hər özünü kosmetoloq kimi təqdim edən şəxslərin yanına getməməlidirlər”.
Trixoloq-həkim hesab edir ki, salon kosmetoloqları ilə mübarizə aparılmalıdır: “Demək olar ki, gözəllik salonlarının hər birində kosmetoloq şöbəsi var. O şöbəyə onlarla qadın müraciət edir. Aidiyyəti qurumlar bu məsələnin üzərinə düşməlidirlər. Tibb təhsili olmayan şəxsin kosmetoloq-həkim kimi işləməsi düzgün deyil. İki-üç aylıq kurs keçməklə dermatoloji sirri öyrənmək mümkün deyil”.
Günel CƏLİLOVA
