Nadir İsrafilov: “Maraqlıdır, bir yaşında uşağı ana nəvazişindən, ailə tərbiyəsindən təcrid edərək, erkən “ictimailəşdirmək” bir yana, ona hansı məzmunda və hansı formada təhsil verməkdən söhbət gedə bilər?!” Vaqif Qarayev: “1 yaşında uşağa heç anası baxa bilmir, tərbiyəçi necə baxacaq?” Könül Vaqifqızı: “Uşaqların 1 yaşında məktəbəqədər təhsilə cəlb olunması onların psixologiyasına mənfi təsir edər”
Xəbər verildiyi kimi, Azərbaycanda bağçalara qəbul 1 yaşdan aparılacaq. Bununla bağlı "Təhsil haqqında” Qanunun 18-ci maddəsinə (məktəbəqədər təhsil) dəyişiklik təklif edilir. Dəyişikliyə görə, Azərbaycan Respublikasında məktəbəqədər təhsil 1-6 yaşlı uşaqları əhatə edəcək.
Milli Məclisin Elm və təhsil komitəsinin ötən iclasında çıxış edən komitə sədri İsa Həbibbəyli bildirib ki, “Təhsil haqqında” Qanunun mövcud variantına əsasən, məktəbəqədər təhsil 3 yaşdan başlayır: “Amma uşağı 3 yaşından məktəbəqədər müəssisəyə cəlb etmək bir qədər gecdir. Əhalinin real tələbatını ödəməyə başlamaq məqsədilə “Məktəbəqədər təhsil haqqında” Qanunda məktəbəqədər təhsilin 1 yaşından başlanması qərara alınıb. Dünyada hətta 2, 3 aylıqdan uşaqların bağçalara verilməsi faktı var. Amma Azərbaycanda reallıq budur ki, uşaq 1 il ana tərbiyəsi almalıdır. Biz “Təhsil haqqında” Qanunda da uşaqların 1 yaşından bağçaya verilməsi ilə bağlı dəyişikliklərin edilməsini təklif edirik”.
Qeyd edək ki, uşaqların 1 yaşından məktəbəqədər müəssisələrə yazılması ictimaiyyət tərəfindən xoş qarşılanmır. Nəzərə almaq lazımdır ki, 1 yaşında uşaq nə tam yeriyə, nə də danışa bilir. Bu yaşda olan uşaqlar bağçaya gedib nə öyrənəcəklər?
Təhsil eksperti Nadir İsrafilov “Təhsil haqqında” Qanunda məktəbəqədər təhsillə bağlı ediləcək dəyişikliyin əslində sual doğurduğunu bildirdi: “Maraqlıdır, bir yaşında uşağı ana nəvazişindən, ailə tərbiyəsindən təcrid edərək, erkən “ictimailəşdirmək” bir yana, ona hansı məzmunda və hansı formada təhsil verməkdən söhbət gedə bilər?! Bir vaxtlar bu müəssisələr məktəbəqədər tərbiyə müəssisələri adlanırdı. Azərbaycan Respublikasının Nazirlər Kabinetinin 17 yanvar 1995-ci il, 12 nömrəli sərəncamı ilə, “Təhsil haqqında” Qanunun 30-cu maddəsinə müvafiq olaraq, bu müəssisələrin Nümunəvi Əsasnaməsi də təsdiq edilmişdi.
Sonralar “Təhsil haqqında” Qanunun tətbiq edilməsi barədə Azərbaycan Respublikası Prezidentinin 2009-cu il 5 sentyabr tarixli, 156 nömrəli Fərmanının 1.22-ci bəndinin icrasını təmin etmək məqsədilə Azərbaycan Respublikasının Nazirlər Kabineti “Məktəbəqədər təhsil müəssisəsinin Nümunəvi Nizamnaməsi”ni təsdiq etməklə bərabər, “Azərbaycan Respublikası Məktəbəqədər tərbiyə müəssisələrinin Nümunəvi Əsasnaməsinin təsdiq edilməsi haqqında” Azərbaycan Respublikası Nazirlər Kabinetinin 1995-ci il 17 yanvar tarixli, 12 nömrəli qərarını ləğv etdi.
Deməli, bu təklif qəbul olunarsa, təhsilin bu pilləsinə təhsillə yanaşı, tərbiyə sözü də əlavə olunmalıdır. Belə getsə, ondan narahatam ki, məktəbəqədər təhsilin 1 aydan başlanması barədə başqa bir yeni təklif verilsin”.
Pediatr Vaqif Qarayev təklif olunan dəyişikliklə birmənalı şəkildə razılaşmır: “Mən bunun əleyhinəyəm. 1 yaşında uşağa heç anası baxa bilmir, tərbiyəçi necə baxacaq? Tibbi tərəflər bir yana, söhbət hələ qulluqdan gedir”.
Psixoloq Könül Vaqifqızı bizimlə söhbətində qeyd etdi ki, uşaqların 1 yaşında məktəbəqədər təhsilə cəlb olunması onların psixologiyasına mənfi təsir edər: “Çünki bu, məntiqi cəhətdən mümkün deyil. Ola bilər ki, dəyişiklik istisna hallarda yerinə yetirilsin. Məsələn, valideynlərin hər ikisi ciddi şəkildə işlə məşğuldur və uşağı bağçaya qoymaq ehtiyacı duyulur. Belə məqamlar üçün bəlkə məktəbəqədər təhsil müəssisəsi yaratmaq mümkün olsun. Amma bunu məcburi etmək düzgün olmaz”.
Günel CƏLİLOVA
