Mehman Muradlı: “Vəziyyətdən çıxış yolu ancaq vəkilliyə qəbulu sadələşdirib, Kollegiyaya üzvlük haqqının artırılması olardı”
Azərbaycan Vəkillər Kollegiyasının sədri Anar Bağırov deyib ki, sonuncu qəbuldan sonra Azərbaycanda hər 10 min nəfərə 11 vəkil düşür.
O qeyd edib ki, gələcəkdə vəkillərin sayı hər ay artacaq: "Biz nəzərdə tutmuşuq ki, yaxın bir neçə ay ərzində 100 nəfərdən çox namizədi vəkilliyə qəbul edək. Bu, sonuncu qəbul deyil. Daha bir qəbul keçiriləcək. Təxminən 200 nəfərə yaxın namizəd vəkilliyə sənəd verib. Beləliklə, artıq iyun ayında 10 000 nəfərə haradasa 12 vəkil düşəcək. Təbii ki, bu rəqəm getdikcə artacaq. Bu sevindirici haldır".
Bununla belə, A.Bağırov qeyd edib ki, vəkillərin sayını kortəbii şəkildə artırmaq olmaz: "Biz çalışırıq ki, savadlı, hazırlıqlı, təcrübəli hüquqşünaslar vəkilliyə qəbul olunsunlar. Çünki bizim mövqeyimiz ondan ibarətdir ki, vəkillərin hazırlığı, bilik səviyyəsi heç də hakimdən, prokurordan aşağı olmamalıdır. Vəkilin işi bəlkə də onlardan daha çətindir".
Göründyü kimi, Anar Bağırov vəkillərin azlığından şikayət edir. Bu amil hüquqi yardımın keyfiyyətinə necə təsir edir və vəziyyətdən çıxış yolu nədədir?
Hüquqşünas Mehman Muradlı qəzetimizə açıqlamasında bildirdi ki, vəkillərin azlığı məhkəmədə işlərin keyfiyyətinə ciddi təsir edən məqamdır: “Statistikaya baxsaq, ortalama il ərzində elə birinci instansiya məhkəmələrində 400 minə yaxın tək mülki və iqtisadi işlər olur. Buna inzibati qaydada baxılan işləri və cinayət işlərini də əlavə etsək, rəqəm göz qorxudacaq. Vəkillər Kollegiyasının sədri Anar Bağırov doğru bildirir ki, vəkil hakimdən də, prokurordan da savadlı olmalıdır. Amma gəlin baxaq, buna bu gün şərait varmı? Yoxdur. Kollegiyanın üzvlərinin sayı mini keçib. Hər 12 000 nəfərə bir vəkil düşür. Əgər işləri vəkillər arasında bölsək, hər vəkilin sutka ərzində iş saatı 36-nı keçəcək. Bu isə işin keyfiyyətinin aşağı düşməsinə səbəb olur. Məsələnin digər tərəfini mütləq bildirmək vacibdir. Kollegiya üzvlərinin sayı mini keçib. Amma bu gün həmin o min vəkili attestasiya etsələr, görən neçəsi Kollegiyanın yeni rəhbərliyinin tələbinə cavab verə bilər? Sizi inandırıram ki, bu rəqəm 50 faizi keçməyəcək.
Bir məsələni də nəzərinizə çatdırım ki, hazırkı vəkillərin əksəriyyəti keçmiş məhkəmə hakimləri, istintaq orqanlarının müstəntiqləridir. Onların isə vətəndaşa münasibəti vəkil kimi deyil, hakim və istintaqçı nəzəri ilə baxması hüquqi yardımın keyfiyyətinə ciddi təsir edir.
Vəziyyətdən çıxış yolu ancaq vəkilliyə qəbulu sadələşdirib, Kollegiyaya üzvlük haqqının artırılması olardı. Baxmayaraq ki, Vəkilllər Kollegiyası xüsusi qeyri-hökumət təşkilatıdır, istənilən formada kommersiya məqsədi daşıyır. Yəni bazara uyğun olaraq məsələlər tənzimlənməlidir”.
Məhəmmədəli QƏRİBLİ
