Kamran Əsədov: "Məqsədəuyğundur ki, səyyar məktəblər qəzalı vəziyyətdə olan məktəblərin yerləşdiyi və şagirdlərin sıx olduğu ərazilərdə daha tez quraşdırılsın"
Azərbaycanda ilk dəfə olaraq 44 rayonu əhatə edən azkomplektli və qəzalı vəziyyətdəki kənd məktəbləri modul tipli məktəblərlə əvəz olunacaq. Təhsil Nazirliyinin yaydığı məlumata əsasən, pilot layihə çərçivəsində Göyçay, İsmayıllı və Lənkəranda 3 məktəb quraşdırılaraq təhvil verilib. 2017-2018-ci illərdə 232 modul tipli məktəbin də quraşdırılması planlaşdırılıb. Bu ilin sonunadək isə 100 məktəb təhvil veriləcək.
Hazırda 25 rayonda 41 məktəbin quraşdırılmasına başlanıb. Bu məktəblərin üstünlükləri azməsrəfli olması ilə yanaşı, qısa müddətdə istənilən relyefdə quraşdırılması, asan daşınması, şagirdlərin sayına uyğun olaraq sinif otaqlarının rahatlıqla azaldılıb-artırılmasıdır.
Son 13 ildə ölkədə məktəblərin 70 faizi yenidən tikilib və ya əsaslı təmir olunub. 2016-2017-ci tədris ilində ölkə üzrə 29 yeni məktəb, o cümlədən Təhsil Nazirliyinin sifarişi ilə 7 məktəb istifadəyə verilib. 101 məktəbdə əsaslı və 384 məktəbdə təmir işləri aparılıb. 17 təhsil müəssisəsində təmir-tikinti işləri davam edir. 2017-2018-ci tədris ilinə qədər Təhsil Nazirliyinin Əsaslı Tikinti və Təchizat İdarəsinin sifarişi ilə 7 təhsil müəssisəsində təmir-tikinti işlərinin başa çatdırılması nəzərdə tutulub.
Modul tipli məktəblərin digər məktəblərdən fərqi nədir? Mövzu ilə bağlı ekspertə müraciət etdik. Təhsil eksperti Kamran Əsədovun sözlərinə görə, yeni tipli məktəblər bir neçə xüsusiyyətinə görə ənənəvi məktəblərdən seçiləcək: "Bu gün Azərbaycanda 4400-dən çox orta ümumtəhsil məktəbi var. Hazırda ölkədə onlarla yeni məktəb tikilir və onlarla qəzalı vəziyyətdə olan məktəb bərpa olunur. Bildiyiniz kimi, son illər neftin qiymətinin aşağı düşməsi ilə əlaqədar ölkə gəlirlərinin həcmi bir qədər azalıb. Məktəblərin bərpası isə böyük məbləğdə maddi vəsait tələb edir. Məsrəflərin ənənəvi məktəblərdən az olmasını nəzərə alsaq, bu gün ölkədə səyyar tipli məktəblərin istifadəyə verilməsi çox təqdirəlayiq haldır. Bu məktəblər həm də ekoloji baxımdan uğurlu sayıla bilər. Bu tipli məktəblərin istifadəyə verilməsindən sonra Azərbaycanda "Hər kəndə bir məktəb" layihəsini həyata keçirə biləcəyik. Modul tipli məktəblərin quraşdırılması bir o qədər böyük vəsait tələb etmir. Lakin məktəblər hansı rayonda və kənddə quraşdırılacaqsa, həmin ərazidə şagirdlərin sıxlığı əvvəlcədən mütləq nəzərə alınmalıdır. Məqsədəuyğundur ki, səyyar məktəblər qəzalı vəziyyətdə olan məktəblərin yerləşdiyi və şagirdlərin sıx olduğu ərazilərdə daha tez quraşdırılsın. Qeyd edim ki, bu gün ölkədə qəzalı vəziyyətdə olan məktəblərin sayı heç də az deyil. Modul tipli məktəblər ənənəvi məktəblər kimi 1500-2000 şagird tutumuna malik deyil. Belə məktəblərdə minimum 200, maksimum 400 şagird təhsil ala bilər. Belə məktəblərin yaradılması kəndlərdə və qəsəbələrdə həyata keçirilərsə, həm əlavə iş yerlərinin açılmasına, həm müəllimlərin sayının artmasına, həm də otaqların və məktəbin dizaynının dəyişməsinə səbəb olacaq. Belə məktəblər həm də dizayn baxımından şagirdləri daha çox cəlb edəcək. Bir şeyi də qeyd edim ki, yeni tipli məktəblərin dizaynının tez-tez dəyişdirilə bilməsi də çox müsbət haldır. Müasir dövrün tələblərindən biri də məktəbin görünüşüdür. Çünki bu, şagirdlərin diqqətini daha çox cəlb edir. Ənənəvi məktəblərdə isə bunu həyata keçirmək heç də asan məsələ deyil. Belə məktəblərin xüsusilə meşə, çay kənarlarında quraşdırılması da mümkündür ki, bunun da şagirdlər üçün faydalı olacağını düşünürəm. Modul tipli məktəblər Azərbaycan təhsilinə yeni nəfəs gətirəcək, şagirdlərin məktəbə cəlb olunması və qəzalı məktəblərin sayının azalması baxımından çox uğurlu bir layihədir".
Günel CƏLİLOVA
