İlqar Hüseynli: "Bu, xətlərə nəzarət mexanizminin çevik təşkil olunmasına zəmin yaradacaq"
Xəbər verildiyi kimi, müntəzəm sərnişindaşıma ilə məşğul olan fiziki və hüquqi şəxslərin birləşdirilməsi prosesinə başlanıb. Bakı Nəqliyyat Agentliyindən verilən məlumata görə, paytaxtın inzibati ərazisində müntəzəm sərnişindaşıma ilə məşğul olan fiziki və hüquqi şəxslərin birləşdirilməsi prosesinə start verilib. Bakı Nəqliyyat Agentliyinin təşəbbüsü ilə başlayan birləşmə prosesi daşıyıcıların istəyinə əsasən həyata keçirilir. Məqsəd müntəzəm marşrut xətlərinin müvəqqəti istismarı ilə məşğul olan daşıyıcıların sayının azaldılması yolu ilə bu sahədə nəzarət mexanizminin gücləndirilməsi və operativliyin artırılmasıdır.
Birləşmə prosesi çərçivəsində, ilkin olaraq, bir neçə marşrut xətlərinin müvəqqəti istismarını həyata keçirən 5 fiziki şəxs maddi-texniki bazalarının qənaətbəxş səviyyədə olmaması səbəbindən birləşərək vahid daşıyıcı - "6 Dost" MMC adı altında fəaliyyət göstərəcək. Sərnişindaşıma sahəsində göstərilən xidmət səviyyəsinin artırılması məqsədilə təsis edilən "6 Dost" MMC müvafiq maddi-texniki baza, avtonəqliyyat vasitələri və "D" kateqoriyalı sürücü heyəti ilə təmin edilib.
Qeyd edək ki, Bakı şəhəri üzrə marşrut sxemləri və hərəkət qrafiklərinin optimallaşdırılması işləri çərçivəsində hazırkı vəziyyətdə daşıyıcıların maddi-texniki bazası təhlil olunmaqla, onların da birləşdirilməsi prosesi davam etdiriləcək. Daşıyıclar qarşısında istehsalat bazalarının yenilənməsi ilə bağlı qoyulan tələb də yerinə yetirilir.
Ümumilikdə, bu kimi tədbirlər sərnişindaşımada xidmət keyfiyyətinin yüksəldilməsində nə kimi rol oynayacaq?
Sözügedən məsələni dəyərləndirən ekspert İlqar Hüseynli buna müsbət prizmadan yanaşır: "Heç şübhəsiz ki, marşrut xətlərinin birləşdirilməsi ümumən bu yöndə görülən işlərin xeyrinədir. Bu, xətlərə nəzarət mexanizminin çevik təşkil olunmasına və sərnişinlərə göstərinlən xidmətin keyfiyyətinin artırılmasına zəmin yaradacaq. Görürsən ki, ayrı-ayrı fiziki və hüquqi şəxslərin bu işlə məşğul olması tez-tez müəyyən çətinliklərin yaranmasına səbəb olur. Məsələn, hansısa marşrut xəttinin normal işləməsi üçün 12 avtobus tələb olunursa, reallıqda 4-5 avtobus xətdə olur. Marşrut sahibinin imkanı olmur ki, xəttə lazım olan qədər avtobus çıxarsın. Bu da sərnişinlərin saatlarla dayanacaqlarda avtobus gözləməsinə, eyni zamanda, sıxlığın yaranmasına səbəb olur. Çünki marşrut xətti normal interval üzrə işləmədikdə, istər-istəməz, bu, müəyyən problemlərin yaranmasına yol açır. Görürsən ki, fiziki şəxsin marşrut xəttində avtobusların sayını artırmağa, yaxud da sərnişinlərə xidmət göstərən avtobusları yeniləməyə imkanı olmur. Bu və digər problemlərin həlli baxımından sərnişindaşıma ilə məşğul olan fiziki və hüquqi şəxslərin birləşdirilməsi müsbət effekt verə bilər".
Vidadi ORDAHALLI
