46 saylı məktəb Azərbaycanın üç dövlət bayramını geniş şəkildə qeyd etdi

Tarix: 14.11.2015 / 01:13
Bölmə: Sosial

Tədbirin əlamətdar cəhəti - məktəbin yəhudi əsilli şagirdləri də...

Noyabr ayı Azərbaycan Respublikasının dövlətçilik tarixi üçün böyük əhəmiyyət daşıyan aydır desək yanılmarıq. Çünki bu ayın təqviminə dövlətçiliyimizlə bağlı mühüm tarixi günlər yazılıb - 9 noyabr - Dövlət Bayrağı Günü, 12 noyabr - Konstitusiya Günü və 17 noyabr - Milli Dirçəliş Günü. Hər üç bayram dövlət səviyyəsində, respublikanın bütün yerlərində, təhsil müəssisələrində - orta və ali məktəblərdə, mədəniyyət mərkəzlərində qeyd edilir.

Orta ümumtəhsil məktəblərinin bu bayramlara xüsusi önəm verməsinin əhəmiyyəti böyükdür. Uşaq və yeniyetmələrin milli vətənpərvərlik tərbiyəsində, onlarda dövlətçilik sevgisinin formalaşdırılmasında, şagirdlərin dövlət atributlarına, dəyərlərimizə münasibətində bu tədbirlərin keçirilməsi əvəzsiz rol oynayır.

Bildiyimiz kimi, müxtəlif orta ümumtəhsil məktəblərində Azərbaycan Bayrağı Günü, Konstitusiya Günü, eləcə də Milli Dirçəliş Günü böyük təntənə ilə qeyd edilir. Şagirdlərin bu mərasimlərdə böyük ruh yüksəkliyi ilə iştirak etməsində məktəb rəhbərliyinin, müəllimlərin və valideynlərin rolu danılmazdır.

Paytaxtın seçilən orta ümumtəhsil məktəblərindən olan Nəsimi rayonu A.Novruzbəyli adına 46 saylı tam orta məktəbi də çağdaş dövlətçilik tariximizdə mühüm əhəmiyyət kəsb edən bayramları xüsusi hazırlıqla qeyd edir. Noyabrın 12-də 46 saylı tam orta məktəbdə Azərbaycan Bayrağı Günü, Konstitusiya Günü, eləcə də Milli Dirçəliş Günü böyük təntənə ilə qeyd edildi. Qonaq qismində tədbirə dəvət edilməyimiz imkan yaratdı ki, gələcəyimiz olan şagirdlərin bayram töhfəsinə biz də şərik olaq.

Nəsimi rayonu 46 saylı tam orta məktəbdə Azərbaycan Bayrağı Günü, Konstitusiya Günü və Milli Dirçəliş Gününə həsr edilən geniş tədbir olduqca maraqlı keçdi. Əvvəlcədən onu da qeyd edək ki, doğrudan da şagirdlərdə vətənpərvərlik ruhunun formalaşmasında, onlarda dövləti, bayrağı sevmək, onu qorumaq hissinin yaranmasında ədəbi-bədii, vətənpərvər ovqatlı tədbirlərin əhəmiyyəti danılmazdır. Səhnəyə çıxan hər bir şagirdi, sözün əsl mənasında, vətən müdafiəçisi kimi görə bildik.

Tədbirin ilk hissəsi Dövlət Bayrağı Günü ilə bağlı idi. Səhnəyə xalqımızın, dövlətimizin müstəqillik rəmzi olan üçrəngli Azərbaycan bayrağı gətirildi, məktəbin şagirdləri Elşən və Ayan bayrağımıza xitabən "Bayraq" şeirini söylədilər. Onların ardınca məktəbin digər şagirdləri "Torpağın səsi" mahnısını xorla ifa etdilər. Məktəbin şagirdləri Tünar və Məryəm rəqs təqdim etdilər. Mərasimdə Azərbaycanın dövlət himni səsləndirildi. Tədbirin aparıcıları Mirmövsüm Mirzəzadə və Fəridə Rüstəmli səhnəyə məktəbin şagirdləri Zəhra, Şahnaz, Elşəni dəvət etdilər, onlar bayrağa aid şeir söylədi. Şagirdlər bayrağımızın daşıdığı məna, rəmzləri, rəngləri barədə ətraflı danışdılar. Nuray və Nərgizin rəqsi də maraqlı alındı.

Tədbirin ikinci hissəsi Konstitusiya Gününə həsr olunmuşdu.

Tədbirin aparıcıları Konstitusiyamız haqqında ətraflı danışdı və müxtəlif maddələri haqqında məlumat verdilər. Hər şagird bir maddənin mənasını açıqladı. Burada vətəndaşlıq məsuliyyəti, ana dilinə münasibət, bütün dinlərə, dillərə, irqlərə müsbət münasibət özünü ifadə etdi. Şagirdlər maddələr üzrə aidiyyəti şeirlər də ifa etdilər. Maddələr haqqında məktəbin şagirdləri Səmidə, Negin, Elşən, Zəhra, Rübabə, Səma, Banu danışdı, xüsusi sevgi və qürur hissilə dövlətimizə sevgilərini ifadə etdilər.

Mərasimdə Azərbaycan Respublikasının sabiq Prezidenti mərhum Heydər Əliyevin və ölkə başçısı İlham Əliyevin andiçmə mərasimlərinin, andiçmə anlarının da videolenti qonaqlara təqdim edildi.

Tədbirin üçüncü hissəsi 17 noyabr - Milli Dirçəliş Gününə həsr edildi. Üç mühüm bayramın bir gündə, eyni arada keçirilməsi də müsbət haldır. Bu, şagirdlərin bayram əhvalına köklənməsinə daha böyük stimul verir.

Tədbirin Milli Dirçəliş Gününə həsr edilən hissəsində aparıcılar bu günün əhəmiyyətindən danışdı. Sonra isə Dirçəliş Günü münasibətilə şeirlər, mahnılar, vətənpərvərlik ruhunda bədii mətnlər səsləndirildi.

Məktəbin rus sektorunun şagirdləri Azərbaycan rəqsini ifa etdilər. Şagirdlər "Yallı" rəqsini təqdim etdi. Tədbir "Mən fəxr edirəm ki, azərbaycanlıyam" mahnısının ifası və şagird və müəllimlərin səhnədə rəqsi ilə tamamlandı.

Sonda 46 saylı tam orta məktəbin direktoru Sevinc Budaqova çıxış edərək Azərbaycan Bayrağı Günü, Konstitusiya Günü və Milli Dirçəliş Gününə həsr edilən tədbirin əhəmiyyətini qeyd etdi və hər kəsi bayram münasibətilə təbrik etdi. O bu mərasimin təşkilində və yüksək səviyyədə keçirilməsində əməyi olan Yeganə Ağayevaya, İlhamə Paşayevaya, Sevinc Ağayevaya, Ofelya və Nazilə müəlliməyə təşəkkürünü bildirdi. O bu tədbirin keçirilməsinə dəstək olan şagirdlərə və valideynlərə də minnətdarlıq etdi.

Onu da vurğulayaq ki, Nəsimi rayonu A.Novruzbəyli adına 46 saylı tam orta məktəb bir sıra özəlliklərinə görə başqa məktəblərdən fərqlənir. Məktəbin ən mühüm cəhətlərindən biri onun beynəlmiləl statusu daşımasıdır. 46 saylı tam orta məktəb respublikamızda yeganə dövlət təhsil müəssisəsidir ki, burada fransız, rus, ingilis dili ilə yanaşı, ibri dili də tədris olunan sinif var. Məktəbdə 100-ə yaxın yəhudi şagird təhsil alır və onlara ana dilləri öyrədilir. Məktəbin direktoru Sevinc Budaqova bizimlə söhbətində bildirdi ki, bütün tədbirlərdə yəhudi şagirdlər də yaxından iştirak edir və məktəbdə onların təhsili üçün lazımi şərait yaradılıb. S.Budaqova qeyd etdi ki, Azərbaycan dövləti tolerant dövlətdir və ölkəmizdə heç bir dini, milli ayrıseçkilik yoxdur, 46 saylı məktəb isə tolerantlığın kiçik modelidir.

Tədbirin ərsəyə gəlməsində 30-dan artıq şagird iştirak edib. Məlumat üçün bildirək ki, tədbirin ssenarisinin, xorun təşkili, şeirlərin seçilib hazırlanmasında 46 saylı orta ümumtəhsil məktəbinin şagirdi Mirmövsüm Mirzəzadənin əməyi keçib.

Həm səhnədə, həm də məktəbin foyesində məktəb şagirdlərinin rəsm əsərləri sərgilənib. Sərgilənən rəsmlərin müəllifi Sevinc Baxşəliyeva, Adil Baxşəliyev, Ayla Papanzadə, Cavidan Mirzəcanzadədir. Onu da vurğulayaq ki, tədbirdə məktəbin rəqs qrupu iştirak edirdi. Qeyd edək ki, tədbirdə Səfili Nərgiz, Məmmədzadə Nuray, Sadıqov Elşən, Mirzəcanzadə və başqa şagirdlər yaxından iştirak edib.

Nəsimi rayonu A.Novruzbəyli adına 46 saylı tam orta məktəbdə 46 sinifdə 870 şagird təhsil alır, 122 müəllim çalışır, onlardan bir nəfəri elmlər namizədi, 1 nəfər əməkdar müəllim, 1 nəfər qabaqcıl təhsil işçisi, 1 nəfər isə "İlin müəllimi" müsabiqəsinin qalibidir. Bu məktəb 2007 və 2013-cü illərdə Azərbaycan Respublikası Prezidentinin müvafiq sərəncamı ilə keçirilən "Ən yaxşı məktəb" müsabiqəsinin qalibi və mükafatçısı olub.

Məktəbin qəbul faizi 2008-ci ildə 42, 2009-cu ildə 45, 2010-cu ildə 49, 2011-ci ildə 51,3, 2012-ci ildə 52,6, 2013-cü ildə 53, 2014-cü ildə 60, bu il isə 62-dir. Məktəbin 2 məzunu 600, 4 nəfər məzunu isə 500-dən yuxarı bal toplayıb, təhsil rus və Azərbaycan dillərində həyata keçirilir. 46 saylı məktəbdə bir neçə saat ərzində görüb öyrəndiklərimizi sizə çatdırdıq. Təqdim etdikləri maraqlı bayram proqramına, qonaqpərvərliyə və səmimiyyətə görə məktəb rəhbərliyinə, kollektivinə və şagirdlərə təşəkkür düşür.

İradə SARIYEVA

DİGƏR XƏBƏRLƏR

Tarix: 01.10.2026 / 23:12

Yağıya “can” demə... düşmənə əyilmə... Dilican dərəsi...

Tarix: 01.10.2026 / 22:38

Dissertasiyaların rus dilində yazılmasının yaratdığı problemlər

Tarix: 01.10.2026 / 21:35

Azərbaycanın dövlət qulluğunda “ikili vətəndaşlıq” problemi yarana bilər...

Tarix: 01.10.2026 / 19:34

Ali Məhkəmə hüquqşünas olmayan gənclərlə bağlı mühüm layihənin sonuna yetişir...

Tarix: 01.10.2026 / 19:23

Hərbi hissəni özbaşına tərk etmiş Azərbaycan hərbçisi Ermənistan ərazisində saxlanılıb

Tarix: 01.10.2026 / 16:19

Nazir Vilayət Eyvazov MDB-nin DİN Şurasının iclasında iştirak edib - FOTO

Tarix: 01.10.2026 / 15:39

Əbədiyyət günəşinə dönən Vətən sevdalıları...

Tarix: 01.10.2026 / 14:56

“Universitetdən çıxarılmağımın qarşısını Mir Cəlal Paşayev aldı” – Nizami Təhməzov

Tarix: 01.10.2026 / 11:00

Kürdəmirdə toyda zəhərlənənlərin sayı 91-ə çatdı - AQTA araşdırmalara başladı...

Tarix: 01.10.2026 / 00:25

Kürdəmirdə toyda kütləvi zəhərlənmə - 30 nəfər xəstəxanaya müraciət etdi...

Tarix: 30.09.2026 / 21:47

Kolleclərə qəbul planı da, tələbə marağı da azalıb...

Tarix: 30.09.2026 / 17:34

“Nar” “AiNar” rəqəmsal köməkçisini istifadəyə verdi

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 01.10.2026 / 21:35

Azərbaycanın dövlət qulluğunda “ikili vətəndaşlıq” problemi yarana bilər...

Tarix: 01.10.2026 / 19:34

Ali Məhkəmə hüquqşünas olmayan gənclərlə bağlı mühüm layihənin sonuna yetişir...

Tarix: 01.10.2026 / 19:18

Rusiya Ermənistanı “qaz rıçağı" ilə inqilaba sürükləyir...

Dağ-mədən sənayesində yeni mərhələ - “Böyük Qayıdış”ın məşğulluq perspektivləri...