Bu il Azərbaycandan Həcc ziyarətinə getmiş zəvvarlardan bir çoxunda virus aşkarlanıb. Azərbaycandan olan Həcc missiyasının həkim briqadasının rəhbəri Hacı Kitabullah Əkbərov bununla bağlı mətbuata açıqlamasında bildirib ki, zəvvarlar bu virusa Səudiyyə Ərəbistanında yoluxublar. Bunun kəskin respirator virus infeksiyası olduğunu deyən K.Əkbərov onu da qeyd edib ki, xəstəliyin əlamətləri ağır öskürək, asqırma, iştahasızlıq, oynaq-əzələ ağrıları və sairdir: "Həccdən qayıdan 500-dən çox hacı bu virusun daşıyıcısıdır. Buna da səbəb onların orada düzgün pəhriz saxlamamaları, soyuq su içmələri və digər məsələlərdir".
Qeyd edək ki, bu il Azərbaycandan Həccə 2400 zəvvar gedib, onlardan 3-ü orada dünyasını dəyişib.
Qafqaz Müsəlmanları İdarəsinin Beynəlxalq əlaqələr şöbəsinin müdiri Müqəddəs Payızov məsələyə öz münasibətin bildirib. Onun sözlərinə görə, bu il 500-dək ziyarətçinin qrip olması böyük rəqəm sayıla bilməz. O bunu onunla əsaslandırıb ki, ötən illərdə də xəstələnən ziyarətçilərin sayı bu səviyyədə olub: "Azərbaycandan Həcc ziyarətinə getmiş zəvvarlarda qrip virusuna yoluxma halı hər zaman olub və bu il də belə hal baş verib".
M.Payızov əlavə edib ki, qrip virusuna yoluxma hallarının mümkünlüyü nəzərə alındığından, hər il ziyarətçilərə qripə qarşı peyvəndin aparılması tövsiyə edilir. Ancaq zəvvarlar bu peyvəndi etməkdə maraqlı olmurlar. Nəticədə də belə hallar baş verir.
Səhiyyə Nazirliyinin mətbuat xidmətinin əməkdaşı Səfayə Əhmədova isə Həcc ziyarətindən qayıdan zəvvarların yoluxduqları virusun qorxulu olmadığını deyib. Onun sözlərinə görə, zəvvarlar sərhəddən keçərkən səhiyyə məntəqələrində yoxlanılır: "Əgər təhlükəli virus olsaydı, o zaman diqqətə çatdırılardı. Amma zəvvarlarımız ölkəyə qayıtdıqdan sonra onlarla bağlı bizə müraciət edən olmayıb".
İstənilən halda, zəvvarların ziyarət zamanı virusa yoluxmaları yaxşı hal deyil. Bunun qarşısını almaq üçün müvafiq tədbirlər görülməlidir. Kim zəmanət verə bilər ki, ziyarət zamanı virusa yoluxan şəxs ciddi fəsadların yaranmasına səbəb olmayacaq? Məsələyə münasibət bildirən şərqşünas Seyid Camal Əzimbəylinin sözlərinə görə, belə hallarla üzləşməmək üçün çıxış yolu ziyarətə gedənlərin məcburi şəkildə peyvənd edilməsidir: "İnsafən ziyarəti təşkil edən qurumlar bununla bağlı tövsiyələr verir, amma bəziləri buna əməl etmir. O üzdən yaxşı olardı ki, Həcc ziyarətinə gedənlər məcburi şəkildə peyvənd edilsin. Kim peyvənd olunmaq istəmirsə, o zaman həmin şəxsin ziyarət etməsinə qadağa qoyulsun. Fikrimcə, belə olsa, zəvvarlar virusa yoluxmaz. Digər tərəfdən, bu il, məlum olduğu kimi, zəvvarların başına bir neçə müsibət gəldi. Kran faciəsi, şeytanın daşlanması zamanı minlərlə zəvvar dünyasın dəyişdi. Başqa bir tərəfdən, budəfəki Həcc mövsümü zamanı Məkkədə havalar çox isti keçib və bu da virusun geniş yayılmasında mühüm rol oynayıb. Bildiyim qədər, zəvvarlar bununla bağlı yetərincə məlumatlandırılır, amma görünən odur ki, hamı buna əməl etmir. Bütövlükdə, Həcc missiyasını həyata keçirən orqan proqramlı şəkildə iş görməlidir. İnsafən QMİ bu işlə bağlı mümkün olan qədər səy göstərir. Bununla yanaşı, zəvvarlar da üzərlərinə düşən işi yerinə yetirməlidir. Əsas məsələ həm də budur".
Vidadi ORDAHALLI
