Xəbər verildiyi kimi, Azərbaycanda insan alverinə şərait yaradan sosial problemlərin aradan qaldırılmasına dair təkliflər hazırlanacaq. Nazirlər Kabinetindən mediaya verilən məlumata əsasən, "İnsan alverinə şərait yaradan sosial problemlərin aradan qaldırılması üzrə Proqram"a dəyişikliklər edilib. Yeni dəyişikliklərə uyğun olaraq, "İnsan alverinə şərait yaradan sosial problemlərin aradan qaldırılması üzrə Proqram"ın "Proqramın həyata keçirilməsi üzrə Tədbirlər Planı" bölməsinə yeni məsələlər daxil edilib.
Tədbirlər Planında göstərilir ki, insan alverinə məruz qalmaq ehtimalı olan əməkçi miqrantların sosial müdafiə tədbirləri ilə əhatə olunma imkanlarının asanlaşdırılması və genişləndirilməsi işləri mütəmadi olaraq Əmək və Əhalinin Sosial Müdafiəsi Nazirliyi, Dövlət Miqrasiya Xidməti tərəfindən həyata keçiriləcək. Dövlət Miqrasiya Xidməti, Dövlət Sərhəd Xidməti, Dövlət Gömrük Komitəsi qanunsuz miqrantlar arasında insan alveri qurbanlarının aşkarlanması prosesinin təkmilləşdirilməsi məqsədilə miqrasiya, sərhəd, gömrük orqanları tərəfindən əməkdaşları üçün insan alverinə qarşı mübarizəyə və qurbanların hüquqlarına dair mütəmadi olaraq təlimlər keçirəcək.
Əmək və Əhalinin Sosial Müdafiəsi Nazirliyi, Dövlət Miqrasiya Xidməti mütəmadi olaraq əmək miqrasiyası sahəsində Azərbaycan Respublikası vətəndaşlarının xarici ölkələrdə işə düzəlmələrində vasitəçilik fəaliyyətinə xüsusi razılıq (lisenziya) almış hüquqi şəxslərin siyahısını dərc edəcək.
Sosioloq Aytəkin Kamranqızı bizimlə söhbətində qeyd etdi ki,
"İnsan alverinə şərait yaradan sosial problemlərin aradan qaldırılması üzrə Proqram"a edilən dəyişiklik dəstəklənməlidir: "Edilən dəyişikliyə əsasən, insan alverinə məruz qalan şəxsin sosial müdafiə tədbirləri gücləndirilməlidir. Hazırda hökumətimiz insan alverinə şərait yaradan sosial problemlərin aradan qaldırılması istiqamətində müəyyən işlər görür. Bu istiqamətdə görülən hər bir iş təqdirəlayiqdir. Bəzi şəxslər xarici ölkələrdə işə düzəlmək adı ilə insan alveri qurbanına çevrilir. Bu kimi xoşagəlməz halların yaşanmaması üçün aidiyyəti qurumlar tərəfindən hansı ölkədə işçiyə ehtiyac olub-olmaması haqqında məlumat veriləcək. Xarici ölkədə işə dəvət olunan şəxs həmin məlumatla tanış olandan sonra gələcək taleyini müəyyən edər".
Günel CƏLİLOVA
