Bakı şəhərində tıxacların qarşısının alınması istiqamətində aidiyyəti qurumlar tərəfindən müəyyən tədbirlər görülür. Görülən tədbirlər nəticəsində paytaxt ərazisində nəqliyyat sıxlığı ötən illərə nisbətən azalıb. Amma ekspertlər yollarda tıxacların aradan qaldırılması ilə bağlı bəzi tədbirlərin görülməsinə ehtiyac olduğunu düşünür.
Məsələn, yol kənarında olan dükanlara mal gətirən firma maşınları mal boşaldarkən həmin ərazidə nəqliyyat sıxlığı yaşanır. Belə olan halda, o yolda tıxac yaranır.
Xatırladaq ki, "Bakı-2015" İlk Avropa Oyunları zamanı həmin maşınlar yalnız gecələr fəaliyyət göstərirdi. Yəni dükan və ya aptekə malı gecələr təhvil verirdilər. Belə olan halda, paytaxt yollarında avtomobil sıxlığı müşahidə olunmurdu.
Ekspertlər təklif edir ki, analoji addım yenidən bərpa olunsun.
Məsələ ilə bağlı fikir bildirən sosial sahə üzrə ekspert İlqar Hüseynli qeyd etdi ki, "Bakı-2015" İlk Avropa Oyunları zamanı nəqliyyat sıxlığının yaşanmaması üçün atılan hər bir addım öz müsbət nəticəsini verdi: "Belə ki, rayon qeydiyyatı olan avtomobillərin paytaxt ərazisinə buraxılmaması, iş saatlarında qrafikin dəyişməsi, firma maşınlarının dükanlara malı gecə saatlarında təhvil verməsi və başqa bu kimi tədbirlər nəticəsində şəhərdə tıxac faktına rast gəlinmədi. Yarış bitəndən sonra sınaqdan çıxan təcrübələr yenidən tətbiq olundu. Məsələn, rayon qeydiyyatı olan avtomobillərin paytaxt ərazisinə buraxılmamasını göstərmək olar. Rayon qeydiyyatı olan minik vasitələrinin paytaxt ərazisinə buraxılmaması nəticəsində şəhərdə, demək olar ki, nəqliyyat sıxlığına rast gəlinmir. Yarış əsnasında dükan və ya əczaxanalara mallar gecə saatlarında paylanırdı. Eyni addım yenidən tətbiq olunmalıdır. Firma maşını yol kənarında olan dükana malı bir neçə saata boşaldır. Təbii ki, bu müddət ərzində həmin istiqamətdə hərəkət edən maşınlar firma maşınına görə tıxacda qalmalı olur. Bu kimi halların yaşanmaması üçün firma maşınları dükanlara malı gecə saatlarında təhvil verməlidir. Ya da həmin maşınlar üçün ayrıca yol çəkilməlidir ki, sürücülər əziyyət çəkməsin".
Günel CƏLİLOVA
