Son illər Azərbaycanda nəqliyyat xidmətinin inkişafı sahəsində bir sıra işlər görülüb. Yeni yol infrastrukturu, körpülər salınıb. Bu vaxta qədər beynəlxalq təşkilatlar Bakıda ictimai nəqliyyatın keyfiyyətinin yaxşılaşdırılması ilə bağlı bir neçə layihəni həyata keçirmək üçün Azərbaycan hökuməti ilə əməkdaşlıq ediblər. Bunların arasında Asiya İnkişaf Bankının Bakıda davamlı şəhər nəqliyyatının inkişafını nəzərdə tutan 1 milyona yaxın ABŞ dolları məbləğində investisiya proqramı və Dünya Bankının dəstəklədiyi İntellektual Nəqliyyat Sistemləri layihəsi var.
Qeyd edək ki, Nəqliyyatın İntellektual İdarəetmə Mərkəzi ilə bağlı ölkə başçısının 26 oktyabr 2007-ci il tarixli Fərmanı olub. Ötən müddət ərzində nəqliyyat sahəsində idarəetmə sistemi formalaşıb. Müntəzəm olaraq məlumatlandırma aparılır. Dayanacaqlarda monitorlar quraşdırılıb. Avtobusların hərəkəti ilə bağlı naviqasiya sistemi qurulub.
Həmçinin, Birinci Avropa Oyunları ərəfəsində nəqliyyat sahəsində bir sıra işlər görülüb. Lakin bütün bunlarla bərabər problemlər də az olmayıb. Ona görə də Prezidentin son dövrlər bu sahədə imzaladığı Fərmana əsasən, artıq taksi fəaliyyəti üçün lisenziya və fərqlənmə nişanının verilməsi səlahiyyəti Nəqliyyat Nazirliyindən alınaraq şəffaf fəaliyyəti ilə seçilən "ASAN xidmət"ə həvalə olunub. Dəmir yolu nazirliyin tabeliyindən çıxarılıb. Eyni zamanda, nəqliyyat müfəttişlərinin səlahiyyətləri alınaraq Dövlət Yol Polisinə verilib.
Ölkə başçısının bu addımı atmasında əsas məqsəd insanların üzləşdiyi süründürməçilik, əlavə ödəniş tələbetmə kimi neqativ halların aradan qaldırılması ilə bağlı idi.
NN-in tabeliyində olan zaman bu sahədə çox ciddi problemlər mövcud idi. Nəqliyyat müfəttişləri ilə taksi sürücüləri arasında baş verən davalar, sürücülərə qarşı qanun pozuntuları, şikayətlər zaman-zaman mətbuatda işıqlandırılır, problem ictimailəşdirilirdi. Amma kəskin tənqidlərə baxmayaraq, insanların şikayəti, nəqliyyat "qoçuları"nın özbaşınalığı ara vermirdi. Bu baxımdan ölkə başçısının qərarı sürücülər tərəfindən alqışla qarşılandı.
Bütün bu deyilənlərin fonunda nəqliyyat sahəsində hansı köklü islahatlara ehtiyac var? Məsələyə münasibət bildirən "Təhlükəsiz Yol" Alyansının koordinatoru Şahin Camalovun sözlərinə görə, xüsusilə Bakı şəhərində nəqliyyat xidməti ilə bağlı bir sıra işlər görülməlidir: "Çünki Bakı paytaxt olmaqla yanaşı, həddən artıq sıxlıq mövcuddur. Ona görə də avtobuslarda sərnişin daşınmasına daha ciddi nəzarət olmalıdır. Bir ekspert olaraq bunu lazımi səviyyədə görmürəm. Təklif edirəm ki, bütün sərnişin avtobusları kart sisteminə keçsin. Sürücülər xidmətə görə sərnişindən əlbəəl pul almamalıdır. Həmçinin, piyadaların maarifləndirilməsi ilə bağlı ciddi tədbirlər görülməlidir. Bu sahədə vəziyyət heç yaxşı deyil. Sözügedən məsələnin həlli, nəticə etibarilə, nəqliyyat sferasına kömək edən amillərdən biri ola bilər. Digər vacib məqam ondan ibarətdir ki, sürücülərin davranışına, iş rejiminə müşahidə kameraları vasitəsilə nəzarət artırılmalıdır. Hansı sürücü tələblərə cavab vermirsə, xətdən dərhal uzaqlaşdırılmalıdır. Bununla bağlı optimal layihələr ortaya qoyulub həyata keçirilməlidir. Vətəndaş cəmiyyəti ciddi şəkildə bu prosesə cəlb olunmalıdır. Çünki maarifləndirmə işini NN vətəndaş cəmiyyətindən yaxşı apara bilməz. Struktur dəyişikliklərindən biri də bu istiqamətdə olmalıdır".
Vidadi ORDAHALLI
