Milli Məclisin plenar iclasında gələnilki büdcə müzakirələri başa çatıb. Belə ki, 2016-cı ilin büdcə zərfinə daxil olan qanun layihələri müzakirə edilib. Parlamentin plenar iclasında Milli Məclisin 2016-cı il xərclər smetası layihəsi barədə MM-in işlər idarəsinin müdiri Firuddin Hacıyev məlumat verib.
F.Hacıyev bildirib ki, MM və onun aparatının saxlanması ilə bağlı 2016-cı ilin xərclər smetası layihəsi qanunvericilikdə nəzərdə tutulmuş qaydalara uyğun hazırlanıb və xərclər smetası, ştat cədvəlləri, inzibatı binaların mühəndis qurğularına xidmət göstərən təşkilatlarla bağlanan müqavilələr və proqnozlar əsasında tərtib edilib.
Onun sözlərinə görə, 2016-cı il dövlət büdcəsində Milli Məclis və onun aparatının saxlanması üçün 22 mln. 745 min manat 955 manat vəsait nəzərdə tutulub ki, bu da 2015-ci il ilə müqayisədə 1 mln. 061 min 139 manat azdır. F.Hacıyev əlavə edib ki, xərclər smetasının ümumi dəyərinin 71,7%-ni əməkhaqqı fondu və əməkhaqqına olan əlavələr təşkil edir: "Bildiyiniz kimi, son illər ölkədə aparılan məqsədyönlü siyasətin nəticəsi olaraq Azərbaycan parlamentinə xarici ölkələrdən gələn qonaqların və Milli Məclisin deputatlarının xaricə səfərlərinin, eləcə də ölkədaxili ezamiyyətlərin sayı xeyli artıb. Bununla bağlı 2016-cı ilin xərclər smetasında ezamiyyə xərcləri üzrə 1 milyon 273 min 900 manat məbləğində vəsait ayrılması nəzərdə tutulub".
Diqqətçəkən məqamlardan biri də ondan ibarətdir ki, gələnilki büdcədə parlamentə yeni avtomobillərin alınması üçün vəsait nəzərdə tutulmayıb. Bir növ, MM-in bu addımı dövlət vəsaitinə qənaət etmək baxımından digər qurumlara nümunə olmalıdır. Çünki dövlət qurumlarına hər il yeni avtomobillərin alınmasına böyük həcmdə vəsait tələb olunurdu. Sözügedən məsələ barədə fikirlərini bildirən ekspert İlqar Hüseynli bunu müsbət dəyərləndirdi: "Çünki bəzi qurumlar, yeri gəldi-gəlmədi, avtomobillərini təzələyirdilər. Bir sıra hallarda bu amil korrupsiya mənbəyi rolunda çıxış edirdi. Özü də ən bahalı avtomobillərin alınmasına üstünlük verirdilər. Nəticədə hər il dövlət bundan milyonlarla vəsait itirirdi. Hesab edirəm ki, analoji tədbirlər digər dövlət qurumlarında da görülməlidir. Zərurət yoxdursa, dövlət qurumlarının avtomobillərinin yenilənməsinə ehtiyac yoxdur. Fikrimcə, büdcə vəsaitinə qənaət etmək baxımından bu çox düzgün addımdır. Bununla bağlı daha geniş təbliğat və təşviqat xarakterli tədbirlərin görülməsinə ehtiyac var. İndiki qlobal iqtisadi böhran şəraitində bu olduqca vacib və gərəkli addımdır".
Vidadi ORDAHALLI
