Azərbaycanda avtoxuliqanlıqla məşğul olan sürücülərə qarşı yeni cəzaların tətbiq edilməsi təklif edilir. Bununla bağlı Milli Məclisdən mətbuata verilən məlumata görə, bu məsələ parlamentin oktyabrın 20-də keçiriləcək iclasının gündəliyinə daxil edilən İnzibati Xətalar Məcəlləsinə təklif edilən əlavələrdə öz əksini tapıb.
Məcəllənin 296-1-1-ci maddəsinə təklif olunan əlavəyə əsasən, 296-1-1-ci maddədə nəzərdə tutulmuş hərəkətlərin aşkar surətdə iki və ya daha artıq nəqliyyat vasitəsinin iştirakı ilə, sürət yarışı təşkil edərək yolda müəyyən edilmiş hərəkət sürəti həddini 60 km/saatdan artıq aşmaqla törədilməsinə görə nəqliyyat vasitələrini idarə etmək hüququ 2 il müddətinə məhdudlaşdırılmaqla 2 min manatdan 4 min manata qədər miqdarda cərimə edilir və ya nəqliyyat vasitələrini idarə etmək hüququ iki il müddətinə məhdudlaşdırılmaqla işin hallarına görə pozuntunu törədənin şəxsiyyəti nəzərə alınmaqla bir aydan iki ayadək müddətə inzibati həbs tətbiq olunur.
Qeyd edək ki, Məcəllənin 296-1-1-ci maddəsində avtoxuliqanlıq dedikdə nəqliyyat vasitəsinin sürücüsü tərəfindən ictimai qaydanı və əhalinin dincliyini nümayişkaranə şəkildə pozan, cəmiyyətə açıqca hörmətsizlik ifadə edən, yol hərəkəti qaydalarının müxtəlif üsullarla davamlı olaraq pozulması ilə müşayiət olunan qərəzli hərəkətlər nəzərdə tutulur.
Maraqlıdır, sözügedən məsələ ilə bağlı cəzaların sərtləşdirilməsi avtoxuliqanlıq hallarının azalmasında nə kimi rol oynaya bilər?
Məsələyə münasibət bildirən "Təhlükəsiz Yol" Alyansının koordinatoru Şahin Camalov, prinsipcə, cəzaların sərtləşdirilməsini dəstəkləsə də, bunun ciddi effekt verəcəyinə birmənalı prizmadan yanaşmadı: "Nəzərə almaq lazımdır ki, "avtoş"luq bir xəstəlikdir. Xəstəliyin də müalicəsinin müxtəlif üsulları var. Təkcə cəzaları sərtləşdirməklə problemi həll etmək çətin məsələdir. Yaxşı olardı ki, "avtoş"lar üçün xüsusi ərazilər yaradılsın. Dünyanın hər yerində belə bir praktika var. Hesab edirəm ki, bu çox yaxşı nəticə verə bilər. Təklif edirəm ki, xüsusi yerlər ayrılsın və gənclər orada "avtoş"luq etsin. Hətta həmin yerlərdə "avtoş"larla bağlı yarışlar da təşkil etmək olar. Cəzaların bu qədər sərtləşdirilməsi əslində pis hal deyil və bir çoxlarını avtoxuliqanlıq etməkdən çəkindirəcək. Ancaq məsələ birdəfəlik öz həllini tapmayacaq. Hesab edirəm ki, cəzaların bu qədər sərtləşdirilməsi digər problemlərin yaranmasına gətirib çıxara bilər. Düşünürəm ki, bunları da nəzərə almaq lazımdır. Cəzaların bu dərəcədə sərtləşdirilməsi müsbət hallarla yanaşı, mənfi nəticələrə də gətirib çıxara bilər. Ona görə də problemin həllinə kompleks yanaşma olmalıdır".
Vidadi ORDAHALLI
