Bu günlərdə Azərbaycanda boşanmalara dair acınacaqlı statistika açıqlanıb. Dövlət Statistika Komitəsinin (DSK) məlumatına əsasən, 2015-ci ilin 8 ayı ərzində qeydiyyat şöbələri 43,9 min nikah və 8,6 min boşanma halları qeydə alıb.
Əvvəlki ilin müvafiq dövrünə nisbətən əhalinin hər 1000 nəfərinə hesabı ilə boşanmaların sayı 1,4-dən 1,3-ə qədər azalıb. 8 ay ərzində 8 min boşanmanın qeydə alınması vəziyyətin acınacaqlı olmasından xəbər verir.
Psixoloq Könül Vaqifqızı bizimlə söhbətində qeyd etdi ki, seksual münasibətlər boşanmalara səbəb olan mühüm faktorlardan biridir: "Məsələyə Azərbaycan reallığı ilə yanaşsaq, ər, ya arvadın məhz bu səbəbə görə boşandığını etiraf etməkdən imtina etdiyini görə bilərik. Boşanmaların səbəblərini araşdırmaq lazımdır. Ümumdünya statistikasına nəzər saldıqda boşanmaların 50 faizindən çoxuna səbəb olan amil kimi seksual münasibətlərin mühüm rol oynadığını deyə bilərik. Azərbaycanda boşanan tərəflər heç vaxt bunu etiraf etmir. Buna səbəb də sovet psixologiyasında seks deyə bir anlayış olmaması, heç kəsin bu haqda danışmamasıdır. Azərbaycan ailəsində nə ər, nə də arvad həyat yoldaşından ayrılmasına səbəb kimi qarşı tərəfin onu yataqda yaxına buraxmadığını deyə bilir. Bu cür cütlüklərlə tez-tez söhbət aparıram. Nəticə etibarilə körpə dünyaya gəldikdən sonra tərəflər arasında seksual münasibətlərdə soyuma yaranır. Bu, Azərbaycan reallığıdır. Təxminən 50 faizdən çox cütlükdə bu analoji hal müşahidə edilir. Cütlüklərin şüuraltı düşüncələrində "artıq nəsli davam etdirən var" deyə fikrin formalaşması tərəflər arasında soyuma yaradır. Belə olan halda, cütlüklər bir-birindən uzaqlaşmağa başlayır. Təbii ki, bunun sonu boşanma ilə yekunlaşır".
Həmsöhbətimizin fikrincə, yeni ailə quranlara güzəştlər verilməlidir: "Yeni ailələrin sosial problemlərinin həlli üçün layihələr, proqramlar hazırlanmalıdır. Əks halda, Azərbaycan ailə ənənəsini tamamilə itirəcək".
Psixoloq onu da əlavə etdi ki, boşanmadan əvvəl ailəyə psixoloji yardım olunmalıdır: "Əksər ölkələrdə boşanmaq istəyənlər məcburi psixoloji müayinəyə göndərilir. Psixoloji dəstək alan gənclər boşanmaq qərarını yenidən nəzərdən keçirir. Azərbaycanda da bu təcrübədən istifadə edilməlidir".
Günel CƏLİLOVA
