İlqar Hüseynli: “Bölgələrdəki həkim çatışmazlığını aradan qaldırmaq üçün tətbiq olunan yaş məhdudiyyətinin aradan qaldırılması daha faydalı olardı”
Bölgələrdə həkim çatışmazlığı ciddi bir problemə çevrilib. Çünki həkimlərin, tibb işçilərinin yaşı 65-ə çatar-çatmaz səhiyyə müəssisələri onlarla vidalaşdırlar, onları əvəz edən kadrlar isə tapılmır. Daha doğrusu, gənc nəsil həkimlər işləmək üçün bölgələrə getmək istəmir. Bu da nəticədə həkim çatışmazlığına gətirib çıxarıb. Bu problemin həlli ən vacib məsələlərdən biri kimi qarşıda durur.
Milli Məclisin Səhiyyə komitəsinin bu gün keçirilən iclasında “Psixiatriya yardımı haqqında” qanuna təklif edilən dəyişikliyin müzakirəsi zamanı komitə sədri Əhliman Əmiraslanov deyib ki, regionlarda 65 yaşı tamam olan həkimlərin işləməsinə icazə veriləcək.
“Bu gün həkim çatışmazlığı var. Regionlarda həkim çatışmazlığı problemini dəfələrlə qaldırmışıq, müzakirə etmişik. Həm geniş dinləmələr keçirilib, həm də aidiyyəti qurumların nümayəndələrinin iştirakı ilə məhdud tərkibdə görüşlər təşkil olunub. Əminəm ki, artıq aparılan islahatlar öz nəticəsini verəcək. Artıq Tibb Universitetini bitirən, rezidentura təhsili almamış həkimlər Təkmilləşdirmə İnstitutu vasitəsilə regionlara göndəriləcək. Digər problem isə 65 yaşı tamam olan həkimlərin təqaüdə göndərilməsi məsələsidir. Bu gün həmin məsələyə baxılır. Regionlarda 65 yaşı tamam olan həkimlərin peşə fəaliyyətini davam etdirməsinə şərait yaradılacaq. Bu istiqamətdə ciddi iş aparılır”, – deyə komitə sədri qeyd edib.
Bu bölgələrdə həkim çatışmazlığının həlli üçün yaxşı təşəbbüsdür. Bundan başqa nə ermək olar? Bölgələrdə həkim çatışmazlığının aradan qaldırılması üçün daha hansı işlər görülməlidir?
Sosial sahə üzrə ekspert İlqar Hüseynli baki-xeber.com-a bildirdi ki, bu problem çoxdan məlumdur və onun həlli vacibdir. “O qanun qüvvəyə minən gündən mütamadi olaraq bu məsələni qaldırmışıq. Çünki dövlət bölgələrdə həkim çatışmazlığı ilə bağlı həmişə narahatdır. Bölgələrdə tibbi xidməti yerinə yetirmək üçün həkimlər çatışmır. Həkimlərin 65 yaşları tamam olan kimi onları işdən azad edirlər. Nəticə etibarilə həkimlər yüksək peşəkarlıq səviyyəsinə çatdığı bir dövrdə işindən ayrılır. Halbuki, onlar ən azı bir neçə il işləyə bilərlər. Həkimlərimiz ən azı minimum 5-7 il işləmək imkanı itirirlər, bu fürsətdən məhrum olurlar. Bu amil də regionlardakı həkim çatışmazlığını bir qədər də çoxaldırdılar. Problemi dərinləşdirdilər. Bu problemin həlli istiqamətində bizim bir neçə təklifimiz olub. Bu təkliflər sırasında olanlardan biri həkimlərin yaş həddinin artırılmasıdır. Yəni bölgələrdə ciddi həkim çatışmazlığı varsa bu halda həkimlərin işləmək üçün yaş məhdudiyyətini ən azı minimum 70-ə qədər qaldırmaq lazımdır. Onlar işdə saxlanılmalıdır.
Bu təşəbbüs olduqca yerində olan təşəbbüssdür, işin xeyrinədir. Onu da deyim ki, bu vətəndaş cəmiyyətindən gələn təşəbbüsdür. Bölgələrdəki həkim çatışmazlığını aradan qaldırmaq üçün tətbiq olunan yaş məhdudiyyətinin aradan qaldırılması daha faydalı olardı”.
İ.Hüseynli hesab edir ki, eyni zamanda gənclərin bölgələrdə həkim kimi çalışmasını stimullaşdıra biləcək yeniliklərə başlamaq lazımdır. “Gənclərin həkim kimi bölgələrə cəlb edilməsi üçün stimullaşdırıcı addımlar atılmalıdır. Bu vacibdir. Burada söhbət nədən gedir? Bir sıra məsələlər var ki, onlar öz həllini tapmalıdır. Burada əsas məsələlərdən biri mənzil təminatıdır, əmək haqlarına xüsusi olaraq əlavə dividentlərin, stavkaların qoyulması məsələsidir. Məsələn, əgər şəhərdə həkim 1 stavka maaş alacaqsa, bölgələrdəki həkimlərə 1, 1, 5 stavka maaş təminatı yaratsaq onda təbii ki, bu stimullaşdırıcı faktor olacaq. Tutaq ki, bir gənc Bakıda 1000 manat maaş alacaqsa və onun mənzil təminatı məsələsi həll olunacaqsa o halda niyə gedib Qəbələdə, Füzulidə, Qarabağda 1500-2000 min manat maaş almasın? Mənə elə gəlir ki, bu stimullaşdırıcı faktorlar bu istiqamətdə əhəmiyyətli rol oynaya bilər. Əmək haqqının artırılması, sosial imkanların yaxşılaşdırılması, mənzil təminatının həll edilməsi ilə bağlı stimullaşdırıcı faktorları ortaya qoyaraq gənclərin də regionlarda çalışmasına dəstək ola, imkan yarada, stimul verə bilərik. Bu hallar çox yaxşı olar ki, tətbiq edilsin”-deyə İ.Hüseynli vurğuladı.
İradə SARIYEVA
