İlqar Hüseynli: “Birincisi, o pasient və həkim arasındakı razılaşma protokolunun detalları incələnməlidir”
Məhkəmə "Dünyagöz" xəstəxanasının baş həkimi Kenan Yıldırım barəsində "Cinayət işinin başlanmasının rədd edilməsi haqqında” məhkəmə nəzarəti qaydasında şikayətə baxıb. Mətbuat yazır ki, məsələ 2024-cü ildə V.G. adlı şəxsin sol gözündə aparılan katarakt əməliyyatından sonra həmin gözün görmə qabiliyyətini itirməsi ilə bağlıdır.
V.G. iddia edir ki, əməliyyatdan sonra sol gözündə ciddi problemlər yaranıb. Onun sözlərinə görə, göz daxili təzyiq artıb, ağrılar isə dözülməz həddə çatıb. Pasiyent bununla əlaqədar Bakının müxtəlif tanınmış göz həkimlərinə müraciət edib.
Şikayətçinin bildirdiyinə görə, həkimlərin rəyi əsasında həmin dövrdə sol gözdə katarakt əməliyyatının aparılması məqsədəuyğun olmayıb. Belə ki, ilkin müayinə zamanı torlu qişada qanaxmalar müşahidə edilib və bu vəziyyət sonradan rubeozis iridis və qlaukoma xəstəliyinin yaranmasına səbəb olub. Şikayətçi Kenan Yıldırımın yol verdiyi tibbi səhv nəticəsində onun sol gözü ömürlük görmə qabiliyyətini itirdiyini deyir.
Pasiyent daha əvvəl Kenan Yıldırımdan şikayət etsə də, hüquq-mühafizə orqanları araşdırma nəticəsində cinayət işinin başlanmasının rədd edilməsi haqqında" qərar qəbul edib.
Lakin V.G.-nin şikayəti əsasında işə yenidən Bakı Şəhəri Səbail Rayon Məhkəməsində baxılıb. Məhkəmə "cinayət işinin başlanmasının rədd edilməsi haqqında" qərarın ləğv edilməsinə və materialların əlavə araşdırma aparılması üçün aidiyyəti orqana göndərilməsinə qərar verib.
Qeyd edilir ki, məhkəmənin qərarı Kenan Yıldırımın təqsirli bilinməsi anlamına gəlmir və məsələ ilə bağlı araşdırma davam etdiriləcək.
Ekspert İlqar Hüseynli baki-xeber.com-a bildirdi ki, bu məsələ ilə bağlı məlumatı olub. “Məhkəmə işinin başlanması, sonra dayandırılması və ləğv edilməsi ilə bağlı məlumatım var idi. Amma yenidən o qərarın dəyişdirilməsi, təkrar məhkəmə baxışının həyata keçirilməsi ilə bağlı qərarın qəbul olunması, işin araşdırılması məsələsi barədə indi tanış oldum. Bütün əməliyyatlar Ümumdünya Səhiyyə Təşkilatının mövcud protokolları əsasında həyata keçirilir. O protokolları əməliyyat edən həkim öncədən pasiyentə təqdim edir. Bəzi hallarda yarana biləcək patoloji vəziyyətlər və yaxud da ki, risklərlə bağlı xəbərdarlıq edilir və o protokollar ikitərəfli imzalanır. Yəni pasiyent və əməliyyat edən həkim ora imza atırlar. Kənan Yıldırımın necə mütəxəssis olduğu, hansı səviyyədə cərrah olduğu ilə bağlı detallı məlumatım yoxdur. Amma bilirəm ki, bu ad hallanır. Cinayət işi təkrar əgər açılıbsa, araşdırma nədən başlanmalıdır? Birincisi, o pasient və həkim arasındakı razılaşma protokolunun detalları incələnməlidir. İkincisi, baxmaq lazımdır ki, əməliyyata qədər hazırlıq prosesi necə baş verib, müayinələr necə və kim tərəfindən həyata keçirilib. Katarakta əməliyyatı çox sadə bir əməliyyatdır. Gözün əlifba əməliyyatı kimi qəbul olunur. Yəni abdominal əməliyyatlar, el dili ilə desək kor bağırsaq və ya apensid amputasiyası əməliyyatı abdominal əməliyyatların əlifbası kimi qəbul olunduğu kimi katarakta əməliyyatı da belədir. Amma ən kiçik əməliyyatların özündə də risk faktorları ola bilər. Onun qan testləri ilə bağlı çıxan nəticələrində incələmələr aparılmalıdır. Orada torlu qişada qanaxmadan yazılır. Torlu qişada qanaxma, qansızmalar əməliyyat öncəsi aparılan müayinələr zamanı müşahidə olunubsa və ona baxmayaraq cərrah əməliyyatı edibsə, təbii ki, bu cinayətdir.
Amma o da ola bilər ki, qanaxma halları gözün digər patologiyaları ilə bağlı olub. Amma katarakta əməliyyatı onu provokasiya çəkib və o yeni gizli patologiyalar ortalığa çıxıb, aşkarlanıb, agressivləşib. Amma əməliyyata qədər görünməyib. Yəni belə hallar var. Pasient də müəyyən mənada haqlıdır. İşi verib məhkəməyə. Qoy aydınlaşdırsınlar”.
İ.Hüseynli hesab edir ki, burada detallı araşdırılma aparılmalıdır. “Həkim və pasient arasındakı protokolların özü ciddi araşdırılmalıdır. Eyni zamanda əməliyyata qədər olan hazırlıq dövründəki müayinələrə baxmaq lazımdır ki, məsələ nə cür olub. “Bu kataraktadır, sadə əməliyyatdır, iki dəqiqənin içində bunu əməliyyat edəcəm, keçib gedəcək” yanaşması da doğru deyil. Fundamental yanaşma lazımdır ki, görək gözdə digər patologiyalar varmı, o patologiyalar fonunda katarakta əməliyyatını etmək lazımdır, yoxsa kataraktdan öncə həmin patoloji vəziyyətləri aradan qaldırıb sonra katarakt əməliyyatını etmək lazımdır? Yəni bax bütün bunlar hamısı mütəxəssislər tərəfindən incələnməlidir. Ondan sonra qərar vermək olar ki, kim haqlıdır, kim haqsızdır. Amma bizim ümumiyyətlə pasientlər də bilməlidirlər ki, yüzdə yüz tədavü deyilən bir şey yoxdur. Cərrahi əməliyyatlarından yüzdə yüz nəticə alacağımız deyilən bir şey yoxdur. Bax belə orqanizmin özündə müxtəlif formalı gizli və ya aşkar olunan bəzi hallar bəzən görürsən ki, ən sadə cərrahiyə əməliyyatının nəticəsini çətinləşdirə bilər.
Bu bir az spesifik söhbətdir. Bu bir başa fərdin üzərində qurulan məsələdir. Qabaqcadan bu tam günahkardır demək də doğru deyil. Araşdırma aparılmalıdır, insan haqqında bir qərar verməlidir. Bəzən pasientlər indi mən özüm Tibb Universitetini qırmızı diplomla qurtarmışam. Mənim əhatəm-tələbə yoldaşlarım, dostlarım həkimlərdir. Məsələyə professional münasibət bildirmək lazımdır. Pasientlər bəzən hadisəni şişirdirlər. Bir də görürsən ki, özlərinin də
üzərinə düşən məsuliyyəti həkimə yükləmək istəyirlər. Oradan əlavə maddi təminatlar və sair tələb edirlər. Bir həkimə həbs eləmə olunmalıdır? Yəni bu mənada bu bir az spesifik mövzudur”-deyə İ.Hüseynli qeyd etdi.
İradə SARIYEVA
