Milli Məclisin 2025-ci il payız sessiyasının ilk plenar iclasında ölkədə tətbiq olunan icbari tibbi sığorta sistemi ilə bağlı bir sıra problemlər gündəmə gətirilib.
Regional məsələlər komitəsinin sədri Siyavuş Novruzov çıxışı zamanı bildirib ki, bu gün bəzi özəl xəstəxanalarda qalmaq xərcləri hotel qiymətləri ilə müqayisə edilə bilər və bu xərclər əməliyyat xərcini belə üstələyir. Məhz bu səbəbdən də xəstəxanada qalma xərclərinin icbari tibbi sığorta paketinə daxil edilməsi təklif olunur.
Qeyd edək ki, həqiqətən bu gün özəl xəstəxanalarda qalmaq millət vəkilinin dediyi kimi hotel qiyməti ilə eynilik təşkil edir. Bəzi xəstəlikləriklərin əməliyyatı və ya müalicəsi sığorta xidməti tərəfindən qarşılansa da, qalmaq üçün əlavə vəsait ödənilməlidir. Bu problem necə həll olunmalıdır?
İcbari Tibbi Sığorta üzrə Dövlət Agentliyi: “Vətəndaşın xəstəxanada qalması yalnız tibbi göstəriş əsasında ehtiyac olan günlər üçün təmin edilir”
İcbari Tibbi Sığorta üzrə Dövlət Agentliyindən “Bakı-Xəbər”ə bildirildi ki, vətəndaşın xəstəxanada qalması yalnız tibbi göstəriş əsasında ehtiyac olan günlər üçün təmin edilir: “İcbari tibbi sığortanın Xidmətlər Zərfinə stasionar cərrahi və terapevtik tibbi xidmətlər daxildir. Xidmətlər Zərfi çərçivəsində stasionar tibbi xidmət zamanı əməliyyat və prosedurlar üzrə tibbi xərclər – əməliyyatın icrası, anesteziya, istifadə olunan dərman vasitələri və tibbi sərf, eləcə də xəstənin əməliyyatdan sonrakı dövrdə zəruri tibbi nəzarət altında qalması üçün həkim təyinatına əsasən tələb olunan palata xərcləri icbari tibbi sığorta hesabına qarşılanır. Vətəndaş həkim tərəfindən təyin olunmuş müddətdən artıq günlər xəstəxanada qalmaq istəyərsə, həmin əlavə günlərin xərcləri vətəndaşın şəxsi vəsaiti hesabına qarşılanmalıdır”.
Rasif Bağırov: “Özəl xəstəxanaların İcbari Tibbi Sığorta ilə müqaviləsi varsa, onların xəstə yaxınlarından ödəniş tələb etməsi düzgün deyil”
Həkim ekspert Rasif Bağırov “Bakı-Xəbər”ə şərhində bildirdi ki, xəstəyə lazım olan bütün təminat icbari tibbi sığorta tərəfindən təmin olunmalıdır: “Təminatın bir hissəsi yerinə yetirilir, bir hissəsi isə icra edilmir. Bu isə icbari tibbi sığorta sayılmır. Xəstə xəstəxanaya gətirilir ki, tibbi sığorta sayəsində müayinə və müalicə olacaq. Ancaq sonda xəstəxanada qalmaq üçün şəxsin yaxınlarından ödəniş tələb edirlər. Bu isə olduqca anormal bir qərardır. Həkim göstəriş verir ki, xəstə sağalmaq üçün xəstəxanada qalmalıdır. Onun dərmanı, müayinəsi, müalicəsi sığorta tərəfindən qarşılanacaq, ancaq oturduğu, yatdığı yerin pulunu ödəməlidir”.
Həmsöhbətimiz onu da əlavə etdi ki, özəl xəstəxanaların İcbari Tibbi Sığorta ilə müqaviləsi varsa, onların xəstə yaxınlarından ödəniş tələb etməsi düzgün deyil. Bu, qanun pozuntusu sayılır: “Xəstə sığorta ilə müalicə olunacaqsa, şəxsin müalicəsi, yeməyi, dərmanı, gecə qalmağı belə pulsuz olmalıdır”.
Günel CƏLİLOVA
