“Biləcəri Təmir Quraşdırma” QSC adlı təşkilat düz 8 ildir ki, əvvəllər heç bir ticarət münasibəti olmadığı “Cənnət Park” adlı bir qurumla məhkəmələrdə çəkişməyə məcbur qalıb. Bəlkə də məhkəmə tarixində rekord hesab oluna biləcək sayda proseslər keçirilib.
Nəticədə yenə “Biləcəri Təmir Quraşdırma” QSC borclu çıxarılıb. Yəni bu qurumun həm malı gedib, həm də canını məhkəmələrdə çürüdürlər. Mövzu barədə QSC-nin nümayəndəsi ilə söhbət etdik. Onun sözlərinə görə, 2013-cu ildə onlarla bir başqa şirkət arasında müqavilə bağlanıb ki, onlara metal boru versin: “Hazırda bizimlə məhkəmədə çəkişən “Cənnət Park” MMC-nin bu məsələyə heç bir aidiyyəti olmayıb. Biz malı 16 saylı trestə vermişik. Onlar pulu ləngitdiyi üçün məhkəməyə müraciət etdik. Bu işlə bağlı məhkəmə bizim xeyrimizə qərar çıxardı. Sonra bizə borclu olan adam tam başqa bir səbəbə görə özünü asıb öldürdü. Ardınca bu “Cənnət Park” MMC peyda oldu. Bir daha qeyd edirik ki, bu şirkətin bizim əməliyyatımıza heç bir aidiyyəti yoxdur. Sonra məlum olur ki, ölən adam güya bu şirkətdən iki milyon pul alıb, girov kimi də bizdən aldığı boruları qoyub. Klassik dələduzluq sxemidir. Bəla turbaların başında olub. Sonra “Cənnət Park” MMC başladı bizimlə çəkişməyə. 2017-ci ildə ən sonuncu instansiya olan Ali Məhkəmə bizim xeyrimizə qərar verdi. Düşündük ki, hər şey bitdi. Bunlar götürüb Konstitusiya Məhkəməsinə şikayət verdilər. Bu instansiya şikayəti heç icraata qəbul etmədi. Təzədən aşağı məhkəmə götürüb Konstutusiya Məhkəməsinin əleyhinə qərar verdi. Bu qərarı 7-8 dəfə bizim xeyrimizə qərar verən hakim qəbul etdi. Nəhayət, 2020-ci ildə bizim şikayətimiz əsasında Konstutisiya Məhkəməsinin Plenumu bunların qalib gəldiyi bütün qərarları ləğv etdi. 2021-ci ildə bu iş yenə gedib Ali Məhkəməyə çıxdı. Sonra, 2022-ci ildə yenə Konstutusiya Məhkəməsi qərarları ləğv edib, göndərdi Ali Məhkəmənin Plenumuna. Bundan sonra iş getdi Apellyasiyaya. Orada obyektiv bir hakim olan Vidadi Məmmədov 2018-ci ildən bəri qarşı tərəfin xeyrunə olan bütün qərarları ləğv etdi. May ayının 11-də “Cənnət Park” MMC-nin “Biləcəri Təmir Quraşdırma” QSC-yə qarşı iddiasına dair kommersiya mübahisəsi üzrə Ali Məhkəmənin Kommersiya Kollegiyası (sədrlik edən Bəhman Qəribov, hakimlər Aqil Abbasov, Elşad Şamoyev) baxdı.
Ali Məhkəmənin işə baxan Kollegiyasının işə qərəzli münasibəti əvvəlcədən – 11.05.2023-cü il tarixədək yol verdiyi bütün davranışları ilə özünü büruzə vermişdi. Əvvəla, mülki işlərə kassasiya icraatında baxılması qaydasını tənzimləyən Mülki-Prosessual Məcəllənin 414-cü maddəsinin tələbinə uyğun olaraq şikayətə yazılı icraat qaydasında baxılmalı olduğu halda, şifahi məhkəmə baxışı təyin etdi. Sözügedən müddəanın tələbinə görə, kassasiya şikayətinə 3 ay müddətində yazılı icraat qaydasında baxılır. Məhkəmə “hüququn inkişafının və ya məhkəmə təcrübəsinin vahidliyinin təmin edilməsi üçün əhəmiyyətli hesab etdikdə” işə məhkəmə iclasında baxılması barədə qərar qəbul edir. Yuxarıda sadalandığı kimi, hazırki iş üzrə Konstitusiya Məhkəməsini Plenumunun 14.02.2020-ci il və 07.01.2022-ci il tarixli qərarları olduğu halda, “hüququn inkişafı və məhkəmə təcrübəsinin vahidliyi” baxımından hər hansı əhəmiyyət daşımadığı halda, Kollegiya məhkəmə iclası çağırılıb, 5 dəfə iclas təyin edilib, “tərəflərin mübahisəni öz aralarında barışıqla həll etməsi üçün” bir neçə dəfə iclas təxirə salınıb, nəhayət, 11.05.2023-cü il tarixdə - iş üzrə YENİ QƏRAR qəbul edilib.
Məlum məsələdir ki, iş üzrə Ali Məhkəmə tərəfindən YENİ QƏRARIN qəbul edilməsi müstəsna hallarda mümkündür. Hazlrki iş üzrə Ali Məhkəmənin YENİ QƏRAR qəbul etməsi, əslində, hüquqa riayət etmək deyil, Konstitusiyaya, qanunlara və Konstitusiya Məhkəməsinin qərarlarının yüksək hüquqi mövqeyinə kobud hörmətsizlik olmaqla, hüquq və məhkəmə təcrübəsində nümayişkaranə surətdə “gövdə nümayişi”dir. Belə çıxır ki, Ali Məhkəmənin hakimləri və rəhbərliyi öz səlahiyyətindən sui-istifadə edərək, Konstitusiya Məhkəməsinin qərarlarını saymadan, “əhəmiyyətsiz bir kağız parçası kimi” kənara qoyaraq, öz istədikləri, özlərinin məqsədinə və məramına uyğun olan istənilən qərarı qəbul edə bilərlər.
Ali Məhkəmənin eyni iş üzrə qərarı 2 dəfə Konstitusiya Məhkəməsinin Plenumu tərəfindən qüvvədən salındığı və Plenum işin qanunauyğun həlli istiqamətində hüquqi mövqeyini göstərdiyi halda, işə təkrar baxan Ali Məhkəmə özünün “qüvvədən düşmüş” mövqeyini təkrarlayaraq qərar qəbul edirsə, o halda Konstitusiya Məhkəməsinin Plenumunun qərarları əhəmiyyətsiz olacaq. Bu mənada Ali Məhkəmənin 11.05.2023-cü il tarixli bu qərarı təkcə “Biləcəri Təmir Quraşdırma” QSC-yə qarşı qərəzçilik deyil, Konstitusiyaya və Konstitusiya Məhkəməsinin fəaliyyətinə qarşı aşkar təxribatdır, özbaşınalıqdır, hüquqa və ədalət mühakiməsinə qarşı sabotajdır!”.
Doğrudan da, hadisələrin xronologiyasına baxanda adamı dəhşət bürüyür. Ən maraqlısı budur ki, bəzi işbazlar prosesə Konstitusiya Məhkəməsini də qoşmağı bacarıblar. Belə mötəbər qurumun adının çox cılız bir mövzuda hallanması insanda yalnız təəssüf doğurur.
Məhəmmədəli QƏRİBLİ
