Azərbaycan o nadir ölkələrdəndir ki, orada igid hərbçilər, şəhid və qazilər, müharibə veteranlarına hər zaman ehtiram göstərilir. Çünki onlar torpağı göz bəbəyi kimi qoruyur, yeri gələndə bu amal yolunda canlarını qurban verirlər. Tanrı dərgahında uca məqam sahibi olan, millətin tarixi tale yaddaşında sönməz ulduza çevrilən şəhidlər ruhumuzun sərvəti, Vətən müharibəsində sağlamlığını itirən qazilərsə gözümüzün işığıdır.
Ötən ilin bizə xarı bülbüllü yaz ovqatı yaşadan qızıl payızı Azərbaycan tarixində 30 illik erməni təcavüzünə son qoyulması, Qarabağ bölgələrinin işğaldan azad edilməsi ilə əlamətdar olub. Ay yarım ərzində Ermənistan ordusu ağır məğlubiyyətə uğradılıb, qədim diyarın əsl sahibləri onu qarı düşməndən təmizləyiblər. Misilsiz qələbə müzəffər Ali Baş Komandanımızın böyük qətiyyət və rəhbərlik bacarığının, rəşadətli hərbçilərimizin əfsanəvi hünərinin nəticəsidir.
Şəhid ailələri, yaralılar və döyüşlərin bütün iştirakçılarının hər zamankından da artıq şəkildə qayğı, diqqət və nəvazişlə əhatə olunmaları aşkar uğur faktıdır. Artıq minlərlə şəxsi əhatə edən sosial dəstək paketi reallaşdırılıb.
Danılmaz faktdır ki, Azərbaycanın ərazi bütövlüyü uğrunda döyüşlərdə şəhid olmuş qəhrəmanlarımızın ailələri və bu döyüşlərdə sağlamlığını itirmiş insanlarımız cənab Prezidentin tapşırığına uyğun olaraq, hərtərəfli sosial təminat sistemi ilə əhatə olunublar. Müharibə əlillərinin və şəhid övladlarına ödənişsiz təhsil hüququ verilməsi məsələsi də müzakirə olunur. Danılmaz faktdır ki, müharibə əlillərinin və şəhid övladlarının pulsuz təhsil almaq hüquqi hər kəs tərəfindən təqdir edilir.
Məlumat üçün qeyd edək ki, şəhid statusu verilmiş mülki şəxslərin ailə üzvləri təhsil haqqı ödəməkdən azad ediləcək.
- Musa Quliyev: “Ödənişli formada təhsil alan şəhid ailələrinin üzvləri təhsil haqqı ödəməkdən azad olunurlar”
Milli Məclisin Əmək və sosial siyasət komitəsinin sədri Musa Quliyev bidirdi ki, dövlət ali, orta ixtisas və peşə təhsili müəssisələrində və müvafiq icra hakimiyyəti orqanının müəyyən etdiyi elmi təşkilatda ödənişli formada təhsil alan şəhid ailələrinin üzvləri təhsil haqqı ödəməkdən azad olunublar: “Bu təminatlar I Qarabağ müharibəsi şəhidlərinin ailə üzvləri ilə yanaşı, Vətən müharibəsi şəhidlərinin də ailə üzvlərinə şamil edilir. Məlumat üçün qeyd edim ki, Vətən müharibəsi zamanı erməni terroru nəticəsində həlak olan 94 mülki şəxsə şəhid statusu verilib”.
- Nizami Hüseynov: “Müharibə əlilləri, şəhid ailələri və şəhid statusu almış mülki şəxslərin övladlarının təhsil haqqından azad edilməsi təqdir olunmalıdır”
Təhsil eksperti Nizami Hüseynov bildirdi ki, müharibə əlilləri, şəhid ailələri və şəhid statusu almış mülki şəxslərin övladlarının təhsil haqqından azad edilməsi təqdir olunmalıdır: “Müharibə əlillərinin və şəhid övladlarının təhsil haqqı pulsuz olmalıdır. Bu kateqoriyadan ailələrə daim diqqət və qayğı göstərilməlidir. Ümumiyyətlə, bu tip ailələrin övladları bütün xidmətlərin ödənişindən azad olunmalıdırlar. O uşaqların ödənişini ataları vətən uğrunda gedən döyüşlərdə ödəyiblər. Məlumdur ki, məcburi köçkünlərin övladları təhsil haqqından azad idilər. Artıq pulsuz təhsil hüququ şəhid övladlarına şamil edilməlidir. Eyni zamanda, müharibə əlillərinin övladlarına da bu güzəşt şamil olunmalıdır”.
Günel CƏLİLOVA
