Vətən müharibəsi şəhidlərinin məhkum qohumlarına Prezidentdən növbəti humanist yanaşma...
Ədliyyə Nazirliyinin Cəzaların icrasına nəzarət üzrə müfəttişliyinin rəisi Malik Ələkbərov media nümayəndələrinə açıqlamasında qeyd edib ki, Vətən müharibəsində şəhid olmuş şəxslərin cəzaçəkmə müəssisələrində olan valideynləri, yaxın qohumlarının bir hissəsi azadlığa buraxılıb:
"Həmin şəxslərin sayı 30-dan çoxdur və dəqiq uçotu hazırlanıb. Qanunun yol verdiyi hallara uyğun olaraq, onların bir hissəsi şərti azadlığa buraxılıb, bir hissəsinin həbs-qətimkan tədbirləri dəyişdirilib, 1 şəhid ailəsi oğlunun dəfnində iştirak etmək üçün səfərə buraxılıb”.
Vətən müharibəsində şəhid olmuş şəxslərin məhkum qohumlarının azadlığa buraxılması həmin ailələrə psixoloji müsbət təsir edəcək.
- “Elə ailələr var ki, oğul vətən yolunda şəhid olub, ata isə məhbəs həyatı yaşayır, bu tip ailələrə mənəvi dəstək olmaq...”
Psixoloq Könül İsmayılova bildirdi ki, dövlət tərəfindən şəhid ailələrinə hər cür dəstək var. O ailələrə sosial, psixoloji, maddi dəstək göstərilir: “Şəhid ailələrinə göstərilən diqqətin formalarından biri də yaxın qohumu şəhid olan şəxslərin cəzasının yüngülləşdirilməsidir. Yaxın qohumu şəhid olan məhkumların cəzalarının yüngülləşdirilməsi düzgün addım olar: “Yaxın qohumu şəhid olan məhkum azadlığa çıxandan sonra ailəsinə dəstək olacaq. Elə ailələr var ki, oğul vətən yolunda şəhid olub, ata isə məhbəs həyatı yaşayır. Bu tip ailələrə mənəvi dəstək olmaq üçün məhbəs həyatı yaşayan şəxsin cəzasının yüngülləşdirilməsi və ya onun vaxtından əvvəl azad olunması şəhid anasına təsəlli olacaq”.
Həmsöhbətimiz onu da əlavə etdi ki, şəhid ailələri hər zaman diqqətdə saxlanmalı və onlara lazımi qayğı göstərilməsi davam etməlidir.
Günel CƏLİLOVA
