Bildiyimiz kimi, Baş nazir Əli Əsədov “Azərbaycan Respublikasının ərazi bütövlüyü uğrunda aparılan hərbi əməliyyatlarda iştirak etmiş hərbi qulluqçulara və şəhid ailələrinə psixoloji yardımla bağlı bəzi məsələlər barədə” qərar imzalayıb.
Qərara əsasən, Azərbaycan Respublikasının ərazi bütövlüyü uğrunda aparılan hərbi əməliyyatlarda iştirak etmiş hərbi qulluqçulara və şəhid ailələrinə operativ, vaxtında, keyfiyyətlə və əlaqəli şəkildə psixoloji yardım göstərilməsini təmin etmək məqsədilə aşağıdakı tərkibdə komissiya yaradılır.
Azərbaycan Respublikasının səhiyyə naziri komissiyanın sədri təyin edilib.
Azərbaycan Respublikası müdafiə nazirinin müavini, Azərbaycan Respublikası fövqəladə hallar nazirinin müavini, Azərbaycan Respublikası əmək və əhalinin sosial müdafiəsi nazirinin müavini; Azərbaycan Respublikası Müdafiə Nazirliyinin Tibb Baş İdarəsinin rəisi, İcbari Tibbi Sığorta üzrə Dövlət Agentliyinin İdarə Heyəti sədrinin müavini;
Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri;
Azərbaycan Respublikası Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri, tabeliyində hərbi-həkim komissiyaları və həkim-uçuş komissiyaları olan dövlət orqanlarının səlahiyyətli şəxsləri komissiya üzvü olaraq təsdiqləniblər.
Komissiyaya tapşırılıb ki, 2020-ci il 27 sentyabr tarixindən başlayan, Azərbaycan Respublikasının ərazi bütövlüyü uğrunda aparılan hərbi əməliyyatlarda iştirak etmiş hərbi qulluqçulara və şəhid ailələrinə operativ, vaxtında, keyfiyyətlə və əlaqəli şəkildə “Psixoloji yardım haqqında” Azərbaycan Respublikasının Qanununa uyğun olaraq psixoloji yardım göstərilməsinin təmin edilməsi üçün zəruri tədbirlər görsün və bu qərardan irəli gələn digər tədbirlərin həyata keçirilməsini təmin etsin. Azərbaycan Respublikasının Səhiyyə Nazirliyi, Azərbaycan Respublikasının Əmək və Əhalinin Sosial Müdafiəsi Nazirliyi, Azərbaycan Respublikasının Müdafiə Nazirliyi və İcbari Tibbi Sığorta üzrə Dövlət Agentliyi bu qərardan irəli gələn məsələləri həll etsinlər.
Bu komissiyanın yaradılması müsbət haldır. Amma onun tərkibində insan psixologiyasının elmi-metodiki tədqiqi ilə məşğul olan qurumların təmsilçiləri yoxdur.
Bu normal sayıla bilərmi?
“Komissiyada insan psixologiyasının elmi-metodiki tədqiqi ilə məşğul olan qurumların, psixoloqların olmamasına gəlincə...”
Professor, tanınmış tibb mütəxəssisi Adil Qeybulla hesab edir ki, yaradılan Dövlət Komissiyası təşkilati işlərə baxacaq, proses zamanı isə aidiyyəti tibb qurumları bu işə mütəxəssisləri cəlb edəcəklər. “Bütövlükdə, müharibədən sonra belə bir Dövlət Komissiyasının yaradılması müsbət haldır. Yaradılan komissiya təşkilati işləri həyata keçirəcək. Azərbaycanda xeyli sayda psixoloq var, onların da potensilandan istifadə edilməlidir. Komissiyada insan psixologiyasının elmi-metodiki tədqiqi ilə məşğul olan qurumların, psixoloqların olmamasına gəlincə, bu elə də vacib deyil. Proses zamanı bu işə mütəxəssislər cəlb ediləcəklər. Ümumiyyətlə, bu qəbildən olan şəxslərə psixoloji yardım göstərilməsi işi genişləndirilməlidir. Bu iş həm fərdi, həm də elektron KİV vasitəsilə həyata keçirilməlidir. Çünki onların psixoloji reabilitasiyaya çox ciddi ehtiyacları var. Xüsusən də hərbi əməliyyatlardan sonra bu insanlar psixoloji yardımla əhatə olunmalıdırlar. Eyni zamanda da “COVID-19” pandemiyasından evdə oturub depressiyaya düşən xəstələr də bu xidmətlə təmin olunmalıdırlar. Məlumatlandırma, maarifləndirmə və psixoloji reabilitasiya paralel getməlidir. Hesab edirəm ki, komissiya təşkilati işləri həyata keçirəcək, amma psixoloji yardım xidməti isə mütəxəssislər tərəfindən həyata keçiriləcək”.
A.Qeybullanın sözlərinə görə, ölkəmizdə olan psixoloq kadrlarından istifadə edilərsə, yaxşı olar. O qeyd etdi ki, ölkəmizdə xeyli sayda peşəkar var və onlar hərbi əməliyyatlarda iştirak etmiş hərbi qulluqçulara və şəhid ailələrinə operativ, vaxtında, keyfiyyətlə xidmət göstərə bilər, sadəcə, bu işə onları cəlb etmək lazımdır.
İradə SARIYEVA
