Bütün eşqini, məhəbbətini Vətənə verən “Cəsur döyüşçü” medallı Müşfiq... - FOTO

img

Cənub bölgəsi Astara rayonunun Vəznəş kəndində təvəllüd tapan Müşfiq Abbasov məqamında canını vətən, millət yolunda fəda etməyi bacaran igiddir. Bu ilahi sevgi isə ana südü ilə axıb onun qəlbinə.

Ağlı kəsəndən saf əməlli, nəcib arzulu insanlardan görüb-götürməklə Vətənin müqəddəsliyinə ürəkdən tapınır, bütün məhəbbətini, eşqini ona verir. İllərin səfində ülvi duyğularla yaşamaqla doğma Azərbaycana yalnız fayda verir. Müdriklər diyarı, dahilər beşiyinin 44 günlük haqq savaşında isə qəlbindəki ilahi sevgini xalq və dövlət yolunda tam təmənnasiz xidmətə çevirir. Qarabağın azadlığı uğrunda mənfur dığalara qarşı mərdliklə vuruşur, adını tarixi zəfər salnaməmizə yazır.

Ömrünün 33 ilini yaşayan Müşfiqin həyat yolu olduqca şərəflidir. Humanist, bütöv xarakterli, vətənpərvər bir gənc olaraq həmişə vətənin taleyini  düşünüb. O, erməni dığalardan qisas almaq məqsədilə 2011-ci ildə müddətdən artıq hərbi xidmətə yazılır. Aprel döyüşlərində Vətənə sədaqətini dığalara vurduğu sarsıdıcı zərbələrlə göstərir. İkinci Vətən müharibəsinə işğal edilən torpaqların  hər qarışının qisasını dığalardan almaq istəyi ilə döyüşə atılır. Füzuli, Cəbrayıl istiqamətində döyüşür. Göstərdiyi şücaət onunla çiyin-çiyinə döyüşən oğulları qələbəyə aparır.  Cəbrayılın giriş qapısında yaralanan igid əsgər Müşfiq “Vətən” deyib huşunu itirir...

Müşfiqin atası deyir: - Oğlum 5 dəfə əməliyyat olunub. Komadan 12 gün sonra ayılıb. Sol ayağında və qara ciyərində qəlpələr qalıb. Bir aya yaxın xəstəxanada qalır. Bütün bunlara baxmayaraq fəxr edirəm ki, oğlum vətəninin bütövlüyü uğrunda döyüşüb. Onun, eləcə də Azərbaycan əsgərinin əldə etdiyi qələbəyə çox sevindim. İndi qürurla gəzirəm ki, qazanılan zəfərdə oğlumun da payı var.

Adı el-obanın dilindən düşməyən, Ali Baş Komandan tərəfindən “Cəsur döyüşçü” medalı ilə təltif edilən böyük ürək, həssas qəlb sahibi vətən oğlu Müşfiq Abbasovun evində körpələr böyüyür. Onların qəlbi də ataları kimi vətən eşqi ilə döyünür...

Zəfər ORUCOĞLU
Azərbaycan Jurnalistlər Birliyinin üzvü

Son xəbərlər