Apteklərdə COVID-19 testləri cəmi 35 manata - klinikalarda testlərdən 2-3 dəfə ucuzluğun sirri...

Rasif Bağırov: “Apteklərdə satılan bu tip testlərin nəticəsinin doğru çıxma ehtimalı xeyli aşağıdır”

img

COVID-19 bəlası artıq bir ildir ki, dünya ölkələrini iflic vəziyyətdə saxlamaqdadır. Statistikaya nəzər yetirsək görərik ki, son sutka ərzində dünyada koronavirus infeksiyasına yoluxma halları 75 milyonu ötüb, ölüm sayı isə 1,8 milyondan artıqdır.

COVID-19 bəlası dünyanın kabusuna çevrilməyə başladığı ilk günlərdən Azərbaycanda məhdudlaşdırıcı tədbirlər diqqət mərkəzində olub. Ölkəmizdə mütəmadi olaraq infeksiyanın yayılma sürətini zəiflətmək üçün bütün lazımi işlər həyata keçirilir.

Məlumdur ki, özündə hər hansı narahatlıq hiss edən şəxs dərhal COVID-19 testi verir. O da bəllidir ki, koronavirus testi hər xəstəxanada verilmir və testin qiyməti heç də hər kəsin büdcəsinə uyğun deyil. Koronavirus testinin qiyməti 90-100 manat arasında dəyişir.

Ancaq son günlər apteklərdə COVID-19 testləri satışına rast gəlinir. Maraqlı məqam ondan ibarətdir ki, apteklərdə satılan koronavirus testlərinin təxmini qiyməti 35 manat civarındadır. Yəni bu, klinikalarda edilən testlərdən 3-4 dəfə ucuzdur. Burundan yaxma götürüb hazır içində olan məhlulla qarışdırırıq və 15-20 dəqiqə sonra testin cavabı hazır olur. Belə ki, bir xətt çıxarsa, testin nəticəsi neqativ, 2 xətt çıxarsa, pozitiv deməkdir.

Bu testlərə inanmaq olarmı? Əgər inanmaq olarsa, o zaman niyə klinikalarda edilən testlər apteklərdəki testlərdən 3 dəfə bahadır?

  • ...koronavirusun yoxlanılması qaydası bütün ölkələrdə eynidir”

Məsələ ilə bağlı danışan həkim-ekspert Rasif Bağırov bildirdi ki, bu testlərin nəticəsinin doğru çıxma ehtimalı xeyli aşağıdır: "Koronavirusla bağlı pul qazanmaqdan ötrü min oyuna girirlər. Mən görürəm ki, Azərbaycanda bəzi analizlər var ki, heç virusla bağlı məlumatı vermir, amma o analizləri xəstədən götürürlər. Bu test haradan gəlir, necə gəlir, kim gətirir, məlum deyil. 15-20 dəqiqəyə cavab verən test nə dərəcədə dəqiq, düzgün ola bilər? Sadəcə, pul qazanmaq üçün vasitədir. Avropanın özündə belə test nəticəsi 20-30 faiz səhv, Azərbaycana Rusiyadan gətirilən test 60 faiz səhv göstərirdisə, indi bu mənşəyi bilinməyən şey nə dərəcə düzgün göstərəcək? Onun etibarlılıq dərəcəsi bəlkə 10-15 faizdir. Belə şeylərə də inanmaq düzgün deyil. Koronavirusun yoxlanılması qaydası bütün ölkələrdə eynidir”.

Həmsöhbətimiz onu da əlavə etdi ki, bu tip testlər insan səhhəti üçün zərərlidir: “Çünki insan orqanizminə bilmədiyin vasitə ilə müdaxilə edirsən. Birincisi, yaxma götürülən zaman dərinliyə gedilir, insan özü o dərinliyə qədər gedə bilmir. Çünki bəzi adamlar var ki, heç xəstəxanada həkimlərin etməsi ilə o prosedura dözmür. Burada da sual yaranır, insan özünü buna necə məcbur edə, özü yaxmanı necə götürə bilər ki? Əgər bu, doğrudan dəqiq nəticə göstərsəydi, bunu heç vaxt apteklərə verməzdilər. Elə müəyyən xəstəxanalarda özləri tətbiq edib, pul qazanardılar. Apteklərə gəlibsə, deməli, hansısa şirkət xaricdən gətirib".

Günel CƏLİLOVA

Son xəbərlər