Dünyanın ən güclü pasportlarının yeni reytinqi açıqlanıb. "Henley & Partners" təşkilatının açıqladığı siyahıda Yaponiya və Sinqapur vətəndaşlarının azad hərəkəti baxımından ilk pillədə qərarlaşıblar.
2021-ci ilin ən etibarlı pasportları siyahısına Yaponiya başçılıq edir. Pasport reytinqi hər pasportun pulsuz giriş imkanı verdiyi ölkələrin sayını nəzərə alıb. Henli İndeksi 2021-ci il üçün etibarlı pasportların siyahısını dərc edib. Pasport reytinqi, əslində, hər pasportun pulsuz giriş imkanı verdiyi ölkələrin sayını nəzərə alıb. Azərbaycan 76-cı yerdədir, pasportu 67 ölkəyə rahat səyahət etmək imkanı verir. Ötən ilin oktyabrında açıqlanmış Pasport İndeksində isə Azərbaycan 199 ölkə və ərazi pasportu içində 61 balla 49-cu yerdə idi. Bu indeks də dünyanın ən güclü pasportlarını müəyyənləşdirir.
İndeksdə koronavirusla əlaqəli vaxt məhdudiyyəti nəzərə alınmır, əksinə, ölkələr arasında imzalanmış uzunmüddətli viza müqavilələri nəzərə alınır.
“Bu gün hər bir Azərbaycan vətəndaşı rahatlıqla xarici pasport alıb, ya viza, ya da vizasız dünyanın, demək olar ki, hər bir yerinə gedə bilər”
Dünyanın ən güclü pasportları siyahısında Azərbaycanın adının yer alması barədə danışan sosial sahə üzrə ekspert Mayis Əliyev qeyd etdi ki, bu gün hər bir Azərbaycan vətəndaşı rahatlıqla xarici pasport alıb, ya viza, ya da vizasız dünyanın, demək olar ki, hər bir yerinə gedə bilər. Bu imkanın əldə olunması üçün müstəqillik dövründə əməlli-başlı bir proses reallaşıb: “Azərbaycandan kənara gedən hər bir insan mütləq Azərbaycan Respublikasının ümumvətəndaş pasportunu əldə etməlidir. Bu sənəd ölkədən çıxan vətəndaşın şəxsiyyətini təsdiq edən, ona ölkədən getmək və ölkəyə gəlmək hüququnun reallaşması üçün verilən sənəddir. Xalq arasında bu sənəd daha çox xarici pasport kimi adlandırılır. Qanuna görə, pasport Azərbaycan Respublikasının mülkiyyəti hesab olunur. Azərbaycan Respublikasının ümumvətəndaş pasportu mahiyyətcə dünyanın istənilən ölkəsində verilən pasportlardan heç nə ilə fərqlənmir, çünki sənədlər beynəlxalq qanunlara söykənən sistemə uyğun hazırlanır. Hər hansı bir ölkə özündən xarici pasport forması uydura bilməz, bütün ölkələr üçün eyni standart işlənib hazırlanıb. Məlumat üçün qeyd edim ki, bəzi ölkələrin xarici pasportu “hörmətli”, bəzilərininki isə “hörmətsiz” sayılır. Arxasında güclü dövləti olan vətəndaş ölkəsinin pasportu ilə özünü çox rahat hiss edir. Vizasız gediş-gəliş ölkələr arasında ikitərəfli razılaşma və sazişlər əsasında baş verir. Bəzi ölkələr bu göstəricini il-ildən yaxşılaşdırır, bəziləri isə əksinə, geriləyir. Azərbaycan pasportu da dünyanın “güclü”, “hörmətli” pasportları siyahısında yer alır. Bu gün Azərbaycan biometrik tipli pasportlara keçdiyi üçün "ASAN xidmət"də vətəndaşdan barmaq izlərinin surəti alınır. Təhlükəsizlik baxımından bu daha məqbul variantdır”.
Günel CƏLİLOVA
