Bəzi iri marketlərin qəbzlərində fiskal İD-nin olmaması vətəndaşların narazılıqlarına səbəb olub. Daha əvvəl alış-veriş qəbzlərinin fiskal İD ilə verilməsinə baxmayaraq, hazırda sözügedən kodlar qəbzdə ya yer almır, ya da alıcı marketdən uzaqlaşan kimi market işçiləri tərəfindən mənimsənilir.
Son günlər sosial şəbəkədə bu barədə çoxlu sayda şikayət paylaşılır. Qeyd edilir ki, marketlərdən alış-veriş edilən zaman qəbzdə yer alan 12 simvollu fiskal İD kodunu elektron kabinetinə daxil edə bilmirlər. Kod daxil edilən zaman bu kodun artıq daxil olması barədə bildiriş gəlir.
Yəni qəbzdə yer alan fiskal İD kodu daha əvvəl kimlərinsə tərəfindən yüklənib.
Qeyd edək ki, “Ballı” supermarketdə də bəzi hallarda belə vəziyyət yaşanır. Fiskal İD-in yer aldığı qəbz çox halda alış-veriş edən müştəriyə təqdim olunmur. Bu hal həmin marketdən alış-veriş edənlərin narazılığına səbəb olur. Məsələ ilə bağlı adıçəkilən marketlə əlaqə saxlamağa çalışsaq da, cəhdlərimiz baş tutmadı.
Xatırladaq ki, 2020-ci ilin I rübündən etibarən Azərbaycan vətəndaşlarına alış-veriş zamanı ödədikləri əlavə dəyər vergisinin (ƏDV) bir hissəsinin geri qaytarılmasına başlanıb.
Məlumat üçün qeyd edək ki, supermarket, digər pərakəndə ticarət obyektləri, restoran, kafelərdən alınmış mallara, göstərilmiş xidmətlərə görə ödənilən ƏDV-nin bir hissəsinin geri qaytarılması vacib sosial addımdır və əhali bundan faydalanır. Belə ki, vətəndaş nəzarət-kassa aparatının qəbzində yer alan 12 simvollu fiskal İD-ni elektron kabineti vasitəsilə sistemə daxil etməklə və ya QR kod vasitəsilə ƏDV-nin bir hissəsini geri ala bilər.
Günel CƏLİLOVA
