Cıdır düzü, İsa bulağı, İstisu, Xudafərin. Hərəsi bir aləm, hərəsi bir cənnətməkan. İllərdir yağı düşmənin xarabaya qoyduğu bu ərazilər qısa zamanda cənnətə dönəcək. Xarıbülbül indi ayrı təravətlə açacaq. Dünyaya yeni bir turizm məkanı olacaq. İsveçrə ilə yarışacaq Kəlbəcərimiz, tarixi əhəmiyyətli Şuşa qalamız, Azıx mağaramız, Xudafərinimiz dünya üçün kəşf olunmamış bir aləmdir.
İşğaldan azad edilən Kiçik Qafqazın dağlıq zonası Azərbaycanın iri meşə rayonudur. Regionun ümumi meşə sahəsi təxminən 246,7 min hektardır, o cümlədən, 13 min 197 hektarı qiymətli meşə sahələridir.
Azərbaycan Respublikasının Prezidenti, Ali Baş Komandan İlham Əliyevin güclü siyasi iradəsi, xalqın ona güvənib ətrafında sıx birləşməsi, rəşadətli müzəffər ordumuzun əzmi sayəsində uzun illər işğal altında olan bütün Qarabağ torpaqları azad edildi.
Prezident İlham Əliyevin gördüyü nəhəng işlər nəticəsində Qarabağda Azərbaycan ücün çox böyük əhəmiyyət kəsb edən turizm təsərrüfatının inkişafı naminə böyük islər görmək üçün yeni cəbhə açıldı. Qarabağın mövcud turizm potensialının inkişaf etdirilməsi ən mühüm dövlət əhəmiyyətli problemlərdən biri olub, bu sahənin inkişafı üçün Qarabağda hər cür şərait var.
Otuz il ərzində erməni vandalizmi nəticəsində işğal olunmuş əzəli torpaqlarrımızda saysız-hesabsız sərvətimiz, tarixi, dini, mədəni, təbiət abidələrimiz, meşələrimiz, mineral və termal bulaqlarımız, turizmin inkişafı üçün çox vacib olan bir çox turistik məkanımız və s. sahələr viran edilib. Artıq bu yerlər bir neçə ildən sonra turistlərin sevimli məkanına çevriləcək.
Yanvarın 6-da 2020-ci ilin yekunlarına həsr olunmuş videoformatda keçirilən müşavirədə iştirak edən Prezident İlham Əliyev bildirib ki, Qarabağ bölgəsinin çox zəngin turizm potensialı var. Ona görə indidən turizm marşrutları işlənib hazırlanmalıdır ki, artıq həyat bu bölgəyə qayıdandan sonra vaxt itirmədən turizm sektoru da inkişaf etsin: “İndidən beynəlxalq turizm sərgilərində, – pandemiyadan sonra bu sərgilər bərpa ediləcək, – Qarabağ bölgəsinin turizm potensialı, turizm marşrutları, tarixi abidələri göstərilməlidir ki, biz bu bölgəni doğrudan da dünya üçün çox cəlbedici bölgə kimi təqdim edək. Nəzərə alsaq ki, Qarabağ bölgəsinin çox zəngin, füsunkar, təkrarolunmaz təbiəti və tarixi abidələri var, əminəm, Azərbaycanın əsas turizm zonalarından birinə çevriləcək”.
Onu da qeyd edək ki, Azərbaycanın işğaldan azad edilmiş ərazilərinin turizm inkişaf strategiyası hazırlanır. Qarabağda turizm infrastrukturunun inkişaf etdirilməsindən öncə bir neçə komponent təmin edilməlidir.
Ruslan Quliyev: “Qarabağ dini, ekoloji, aqroturizm, eləcə də turizmin digər növləri üçün əlverişli imkanlara malikdir”
Azərbaycan Sağlamlıq və Termal Turizmə Dəstək Assosiasiyasının prezidenti, turizm mütəxəssisi Ruslan Quliyev bildirdi ki, Sovet dövründə də ümumittifaq əhəmiyyətli marşrutlar içərisində Qarabağ marşrutu çox populyar olub.
Həmsöhbətimizin sözlərinə görə, Şuşada balneoloji mərkəzlər mövcud olub: "İşğaldan azad olunmuş ərazilərimizdə kanat yollarının çəkilməsi üçün böyük potensial var. Bu bölgələrin unikallığı ondadır ki, bu ərazilərdə dini, ekoloji, aqroturizm, eləcə də turizmin digər növləri üçün əlverişli imkanlar var. Təkcə Zəngilanda çoxlu sayda termal su mənbəyi mövcuddur".
Səkinə Əsgərova: “Qarabağ turistlərin sevdiyi məkan olacaq”
Azərbaycan Turizm Bələdçiləri Assosiasiyası (ATBA) Sənaye Dərnəklərinin müdiri Səkinə Əsgərova bildirdi ki, noyabrın 16-dan etibarən Dövlət Turizm Agentliyi və Azərbaycan Turizm Bürosu Azərbaycan Turizm Bələdçiləri Assosiasiyası (ATBA) ilə birgə Qarabağın turizm potensialı ilə bağlı bələdçilər hazırlamaq üçün vebinarlara start verib: "Müsabiqə nəticəsində seçilmiş yerli və beynəlxalq sertifikasiyalardan keçmiş 30 turizm bələdçisinə Qarabağ irsinin turizm çəkisi, Qarabağ etnoqrafiyası (zərgərlik, geyimlər, rəqslər, folklor), Qarabağ atları, “Qarabağ” futbol klubu, Qarabağ mədəni irsi, Qarabağ damğaları, Qarabağ memarlıq məktəbi, Qarabağ xalçaçılıq məktəbi, Alban dini abidələri, Alban memarlıq irsi, qastronomiya, şərabçılıq, hərbi jurnalistika, Qarabağ klassik musiqi və muğam, erməni mifləri, flora və fauna ehtiyatları, etnoqrafik məqamlar və digər mövzuları əhatə edən 20-dən artıq istiqamət üzrə təlim-tədris edilməkdədir. Qarabağ turistlərin sevdiyi məkan olacaq".
Tam əminliklə demək olar ki, işğaldan azad edilmiş ərazilərimizdə ermənilərin törətdikləri vandalizm əməllərinin nəticələri qısa müddət ərzində dövlətimiz tərəfindən aradan qaldırılacaq və Dağlıq Qarabağ və ətraf rayonlar gülüstana və turistlərin ən çox sevdiyi məkanlardan birinə çevriləcək. Bu bölgənin təbii və coğrafi şəraiti, zəngin mədəniyyəti, tarixi memarlıq abidələri, flora və fauna aləmi də burada turizmin inkişafı üçün əvəzolunmaz amillərdəndir. İllər öncə də bu bölgə turizm üşün cəlbedici məkan olmuş, burada geniş çeşidli turizm obyektləri fəaliyyət göstərib. Bir sözlə, ənənə var və onu bərpa və davam etdirmək lazımdır. Turizmin inkişafı bölgənin çiçəklənməsinə təkan verəcək və turizm iqtisadiyyatından əldə olunacaq gəlirlər hesabına əhalinin sosial rifah halı daha da yüksələcək, ümumi iqtisadiyyatımızın inkişafına öz töhfəsini verəcək.
Günel CƏLİLOVA
